Segundu Samuel

15 Liutiha neʼe, Absalão halo kuda-karreta ida ba nia an no hetan kuda sira no mós mane naʼin-50 atu halai iha ninia oin.+ 2 Absalão iha toman atu hadeer sedu no hamriik besik dalan neʼebé tama ba sidade nia portaun.+ Bainhira ema ruma mai atu hatoʼo ninia kazu ba liurai hodi hetan tesi-lia,+ Absalão bolu ema neʼe no dehan: “Ó mai husi sidade ida-neʼebé?” Ema neʼe hatán: “Ita-nia atan mai husi suku ida iha Izraél.” 3 Tuirmai Absalão dehan ba nia: “Ó mak loos no la halo sala, maibé liurai la haruka ema ida atu rona ba ó-nia kazu.” 4 Baibain Absalão dehan: “Se karik haʼu mak sai juís iha rai neʼe, ema hotu neʼebé iha kazu ka presiza atu hatene desizaun kona-ba buat ruma, sei mai hasoru haʼu no haʼu sei haree didiʼak atu sira hetan justisa.”

5 Bainhira mane ida hakbesik mai hodi hakruʼuk ba Absalão, Absalão lolo liman hodi kaer mane neʼe no reʼi ninia hasan.+ 6 Absalão halo ida-neʼe ba ema Izraél hotu neʼebé mai hasoru liurai atu hetan tesi-lia. Ho ida-neʼe, Absalão halo ema Izraél gosta nia.*+

7 Iha tinan haat* nia rohan, Absalão dehan ba liurai: “Favór ida, husik haʼu bá Hebron+ hodi kumpre haʼu-nia juramentu neʼebé haʼu halo ona ba Jeová. 8 Tanba Ita-nia atan halo ona juramentu espesiál+ neʼe bainhira hela iha Gesur+ iha rai-Síria, hodi dehan: ‘Se Jeová lori haʼu fila ba Jeruzalein, haʼu sei hasaʼe sakrifísiu ida ba* Jeová.’” 9 Entaun liurai hatete ba nia: “Laʼo bá ho dame.” Ho ida-neʼe, nia hamriik no bá Hebron.

10 Absalão haruka espiaun ba Izraél nia suku hotu, hodi dehan: “Bainhira imi rona dikur nia lian, imi tenke fó sai kedas: ‘Absalão sai ona liurai iha Hebron!’”+ 11 No mane naʼin-200 husi Jeruzalein bá ona hamutuk ho Absalão. Nia mak konvida sira no sira la deskonfia buat ida, no la hatene saida mak akontese daudaun. 12 Liután neʼe, bainhira hasaʼe sakrifísiu, Absalão haruka atu bolu David nia konsellu-naʼin+ Ahitofel,+ ema Gilo, husi ninia sidade Gilo.+ No ema neʼebé apoia Absalão nia planu aat sai barak ba beibeik.+

13 Liutiha tempu balu, ema ida mai dehan ba David: “Povu Izraél apoia ona Absalão.” 14 Entaun, David koʼalia kedas ba ninia atan hotu neʼebé hamutuk ho nia iha Jeruzalein, hodi dehan: “Hamriik bá, mai ita halai,+ tanba Absalão sei la husik ita ida atu moris! Lalais, se lae, nia bele toman ita no lori susar ba ita no oho ema iha sidade neʼe ho surik!”+ 15 Liurai nia atan sira hatán ba liurai: “Buat naran deʼit neʼebé liurai deside, Ita-nia atan sira prontu atu halo tuir.”+ 16 Entaun liurai sai hodi bá, no ninia umakain tomak tuir nia, maibé liurai husik hela ninia feen-kiʼik naʼin-sanulu+ atu tau matan ba palásiu. 17 Liurai kontinua laʼo no ema hotu tuir nia, no sira para iha Bet-Merak.

18 David nia atan hotu bá hamutuk ho nia,* neʼe inklui ema Kereti, ema Peleti,+ no ema Gat+ hotu, katak mane naʼin-600 neʼebé laʼo tuir ona nia husi Gat.+ Sira laʼo liu iha liurai nia oin no liurai sura sira. 19 Liurai hatete ba Itai+ ema Gat: “Tanbasá mak ó mós bá hamutuk ho ami? Fila fali bá no hela hamutuk ho liurai foun, tanba ó mak ema estranjeiru no mós uluk ó tenke halai husi ó-nia rai. 20 Horiseik ó foin mai, entaun ohin haʼu tenke halo ó laʼo-lemo ho ami hodi bá fatin neʼebé ami la hatene ka? Fila fali bá no lori mós ó-nia maun-alin sira hamutuk ho ó, no haʼu hein katak Jeová sei hatudu domin boot* no laran-metin ba ó!”+ 21 Maibé Itai hatete ba liurai: “Haʼu jura hodi Jeová, Maromak neʼebé moris, no hodi haʼu-nia naʼi liurai nia moris, katak iha fatin naran deʼit neʼebé haʼu-nia naʼi liurai bá, maski ba mate ka moris, Ita-nia atan mós sei bá!”+ 22 Ho ida-neʼe, David hatete ba Itai:+ “Bá, laʼo ba foho-leet sorin.” Entaun Itai ema Gat laʼo ba foho-leet sorin hamutuk ho ninia ema hotu no ninia oan sira.

23 Povu hotu iha rai neʼe tanis makaʼas bainhira ema sira-neʼe hotu laʼo ba foho-leet nia sorin, no liurai hamriik besik Foho-Leet Sedron;+ no ema hotu laʼo ba foho-leet sorin hodi toʼo iha dalan atu bá rai-fuik. 24 Zadoc+ mós iha neʼebá hamutuk ho ema Levi+ hotu neʼebé hulan hela Maromak loos+ nia Arka+ Aliansa nian. Sira hatún Maromak loos nia Arka neʼe, no Abiatar+ mós laʼo bá neʼebá nuʼudar ema hotu sai husi sidade neʼe hodi bá sorin. 25 Maibé liurai hatete ba Zadoc: “Lori fali Maromak loos nia Arka ba sidade.+ Se haʼu monu loos ba Maromak Jeová nia laran, nia mós sei lori haʼu fila no husik haʼu haree Arka neʼe no haree ninia hela-fatin.+ 26 Maibé se Maromak dehan: ‘Haʼu la kontente ona ho ó’, entaun husik nia halo ba haʼu tuir buat naran deʼit neʼebé nia hanoin mak diʼak.” 27 Liurai hatete ba amlulik Zadoc: “Ó mak konsellu-naʼin,* loos ka lae?+ Fila fali ba sidade ho dame, no lori mós imi-nia oan-mane naʼin-rua ho imi, neʼe mak ó-nia oan-mane Ahimaz no Abiatar nia oan-mane Jonatan.+ 28 Haʼu sei hein besik dalan sira atu hakur mota iha rai-fuik neʼe toʼo loron neʼebé imi hatoʼo fali liafuan ruma ba haʼu.”+ 29 Entaun Zadoc no Abiatar foti Maromak loos nia Arka no fila fali ba Jeruzalein, no sira hela iha neʼebá.

30 David tanis bainhira nia laʼo saʼe daudaun ba Foho Oliveira.+ Nia taka ninia ulun no laʼo ain-tanan deʼit. Ema hotu neʼebé hamutuk ho nia mós taka sira-nia ulun no tanis. 31 Iha tempu neʼebá ema dehan ba David: “Ahitofel mós hamutuk ho ema sira neʼebé apoia Absalão+ nia planu aat.”+ Rona tiha neʼe, David hatete: “Favór ida, oh Jeová,+ halo Ahitofel nia konsellu sai fali nuʼudar buat beik!”+

32 Bainhira David toʼo foho-tutun, iha fatin neʼebé uluk povu adora Maromak,* Husai+ ema Arki+ mós iha neʼebá atu hasoru nia. Husai lees ona ninia roupa no tau rai-rahun iha nia ulun. 33 Maibé David hatete ba nia: “Se ó bá hamutuk ho haʼu, ó sei sai hanesan naha todan ba haʼu. 34 Maibé se ó fila fali ba sidade no ó dehan ba Absalão: ‘Oh Liurai, haʼu mak Ita-nia atan. Uluk haʼu sai atan ba Ita-nia aman, maibé agora haʼu sai Ita-nia atan’,+ ho ida-neʼe mak ó bele halo runguranga Ahitofel nia konsellu hodi ajuda haʼu.+ 35 Amlulik Zadoc no amlulik Abiatar iha neʼebá hamutuk ho ó, loos ka lae? Ó tenke konta ba amlulik Zadoc no amlulik Abiatar buat hotu neʼebé ó rona iha liurai nia uma.+ 36 Iha neʼebá iha mós sira-nia oan-mane naʼin-rua, neʼe mak Zadoc nia oan-mane Ahimaz+ no Abiatar nia oan-mane Jonatan.+ Liuhusi sira mak imi tenke fó-hatene mai haʼu liafuan hotu neʼebé imi rona.” 37 Nuneʼe David nia belun*+ Husai tama ba sidade iha tempu neʼebé Absalão tama ba Jeruzalein.