Segundu Samuel
20 Iha neʼebá iha ema ida neʼebé bukaliadór naran Seba.+ Nia mak Bikri nia oan-mane, ema Benjamim. Nia huu dikur+ no dehan: “Ita la iha relasaun ho David, no ita la hetan liman-rohan husi Jessé nia oan-mane.+ Oh ema Izraél, fila fali ba imi ida-idak nia maromak sira!”*+ 2 Ho ida-neʼe, ema Izraél hotu la tuir tan David no laʼo tuir fali Bikri nia oan-mane Seba.+ Maibé ema Judá laran-metin nafatin ba sira-nia liurai, husi Mota Jordaun toʼo Jeruzalein.+
3 Bainhira liurai David toʼo iha ninia palásiu iha Jeruzalein,+ nia foti ninia feen-kiʼik naʼin-sanulu neʼebé uluk nia husik hela atu tau matan ba palásiu,+ no nia tau sira iha uma neʼebé guarda sira mak hein. Nia fó ai-han ba sira, maibé nia la halo relasaun ho sira.+ Sira sulan deʼit toʼo loron neʼebé sira mate, sira moris hanesan feto-faluk, maski sira-nia laʼen moris hela.
4 Liurai dehan ba Amasa:+ “Halibur mane Judá sira mai haʼu iha loron tolu nia laran, no ó mós tenke mai.” 5 Entaun Amasa halibur mane Judá sira hamutuk, maibé nia rasik mai tarde liu fali tempu neʼebé deside ona ba nia. 6 Tuirmai David dehan ba Abisai:+ “Bikri nia oan-mane Seba+ sei halo susar barak liu ba ita duké susar husi Absalão.+ Entaun lori haʼu-nia atan sira* hodi duni tuir nia, atu nuneʼe nia labele hetan sidade sira neʼebé iha moru aas no halai husi ita.” 7 Entaun Joab nia ema sira,+ ema Kereti, ema Peleti,+ no asuwaʼin sira hotu duni tuir nia. Sira sai husi Jeruzalein hodi duni tuir Bikri nia oan-mane Seba. 8 Bainhira sira toʼo iha fatuk boot iha Gibeão,+ Amasa+ sai mai hasoru sira. Iha tempu neʼebá Joab uza ninia roupa funu nian, no ninia surik kesi hela iha ninia knotak. Bainhira nia hakat ba oin, surik neʼe monu.
9 Joab hatete ba Amasa: “Haʼu-nia maun, ó diʼak ka lae?” Tuirmai ho ninia liman-loos, Joab kaer Amasa nia hasarahun hodi finje atu reʼi nia. 10 Amasa la haree surik neʼebé iha Joab nia liman, no Joab sona ninia kabun ho surik neʼe,+ no ninia tee-oan fakar sai ba rai. Joab la presiza sona nia dala ida tan; sona dala ida deʼit toʼo ona atu oho Amasa. Tuirmai Joab no ninia maun Abisai duni tuir Bikri nia oan-mane Seba.
11 Joab nia mane joven ida hamriik besik nia no dehan: “Ema neʼebé apoia Joab no ema neʼebé apoia David, mai laʼo tuir Joab!” 12 Iha tempu neʼebá, Amasa duir an hela iha dalan boot nia klaran ho ninia raan. Bainhira mane joven neʼe haree katak povu hotu para, nia muda Amasa husi dalan boot ba rai-luan. Tuirmai nia taka Amasa ho roupa ida, tanba nia haree katak ema hotu para bainhira sira toʼo ba Amasa. 13 Depois nia muda tiha Amasa husi dalan boot, mane hotu laʼo tuir Joab hodi duni Bikri nia oan-mane Seba.+
14 Seba laʼo liuhusi Izraél nia suku hotu hodi toʼo iha Abel-Bet-Maaka.+ Ema Bikri sira mós halibur hamutuk no laʼo tuir nia.
15 Joab no ninia ema sira* toʼo no halo serku ba Abel-Bet-Maaka no sira ateru rai hodi halo aas atu ataka sidade nia moru. No ema hotu neʼebé hamutuk ho Joab keʼe rai iha sidade nia moru okos atu bele harahun moru neʼe. 16 Feto matenek ida hakilar husi sidade neʼe, hodi dehan: “Imi rona lai! Favór ida, fó-hatene ba Joab: ‘Mai, husik haʼu koʼalia ho Ita-Boot.’” 17 Entaun Joab hakbesik ba feto neʼe, no feto neʼe dehan: “Ita mak Joab ka?” Nia hatán: “Sin.” Feto neʼe dehan ba nia: “Rona ba Ita-nia atan neʼe nia liafuan.” Nia dehan: “Haʼu rona hela.” 18 Feto neʼe hatutan tan: “Uluk ema sempre dehan: ‘Se ema hakarak rezolve problema ruma, husik sira bá husu iha sidade Abel’, no sira-nia problema sei rezolve duni. 19 Haʼu reprezenta ema Izraél sira neʼebé laran-metin no buka dame. Agora Ita buka atu halakon sidade neʼebé hanesan inan ida iha Izraél. Tanbasá mak Ita tenke halakon* Jeová nia liman-rohan?”+ 20 Joab hatán: “Haʼu labele atu halakon no sobu sidade neʼe. 21 Haʼu sei la halo duni ida-neʼe. Maibé iha mane ida naran Seba,+ nia mak Bikri nia oan-mane husi área foho nian iha Efraim.+ Nia kontra ona* Liurai David. Se imi entrega mane ida-neʼe, haʼu sei hakiduk husi sidade neʼe.” Feto neʼe hatete ba Joab: “Diʼak! Ami sei soe tun ninia ulun ba Ita-Boot liuhusi moru neʼe!”
22 Entaun feto matenek neʼe tama kedas hasoru povu hotu neʼe, no sira tesi Bikri nia oan-mane Seba nia ulun, no soe tun neʼe ba Joab. Ho ida-neʼe, Joab huu dikur, no sira sai husi sidade neʼe hodi fila ba sira ida-idak nia uma,+ no Joab mós fila fali ba liurai iha Jeruzalein.
23 Joab mak xefe ba tropa Izraél hotu,+ no Jeoada+ nia oan-mane Benaias+ mak xefe ba ema Kereti no ema Peleti.+ 24 Adorão+ mak xefe ba mane sira neʼebé liurai bolu atu halo serbisu, no Ahilud nia oan-mane Jeosafát+ mak hakerek-naʼin. 25 Seva mak sekretáriu. Zadoc+ no Abiatar+ mak amlulik. 26 No Ira ema Jair mós sai nuʼudar xefe boot* ba David.