Ezequiel

8 Iha loron lima fulan-neen tinan neen,* bainhira haʼu tuur daudaun iha haʼu-nia uma no Judá nia katuas sira mós tuur daudaun iha haʼu-nia oin, Jeová, Naʼi Ukun-Naʼin Boot Liu, nia kbiit tun ba haʼu.* 2 Bainhira haʼu hateke, haʼu haree ema ida neʼebé haree hanesan ahi. Husi ninia knotak ba kraik, haʼu haree buat ida hanesan ahi,+ no husi ninia knotak ba leten, haʼu haree nabilan hanesan besi neʼebé nabilan.*+ 3 Tuirmai nia lolo liman hodi kaer haʼu-nia fuuk, no espíritu* ida hiʼit saʼe haʼu entre rai no lalehan no lori haʼu ba Jeruzalein liuhusi vizaun ida husi Maromak, hodi toʼo portaun iha pátiu kiʼik+ neʼebé hateke ba norte. Iha neʼebá iha estátua neʼebé halo Maromak sai laran-moras.*+ 4 No iha neʼebá, haʼu haree glória husi Izraél nia Maromak,+ hanesan glória neʼebé haʼu haree ona iha rai-tetuk.+

5 Tuirmai nia dehan ba haʼu: “Oan-mane husi ema, favór ida, hateke ba parte norte.” Entaun haʼu foti matan hodi hateke ba parte norte, no iha portaun neʼebé besik altár nia sorin parte norte, haʼu haree estátua neʼebé halo Maromak sai laran-moras.* 6 Nia dehan ba haʼu: “Oan-mane husi ema, ó haree ona buat neʼebé umakain Izraél halo iha neʼe ka lae? Sira halo buat neʼebé aat neʼebé haʼu hakribi,+ no buat sira-neʼe halo haʼu dook husi haʼu-nia fatin sagradu.+ Maibé ó sei haree sira-nia hahalok foʼer neʼebé aat liután.”

7 Tuirmai nia lori haʼu ba portaun atu tama ba pátiu,* no bainhira haʼu hateke, haʼu haree kuak ida iha didin. 8 Nia dehan ba haʼu: “Oan-mane husi ema, favór ida, halo kuak borus didin neʼe.” Entaun haʼu halo kuak didin neʼe, no haʼu haree odamatan ida. 9 Nia dehan ba haʼu: “Tama bá hodi haree hahalok aat no buat foʼer neʼebé sira halo iha neʼe.” 10 Entaun haʼu tama hodi haree. Haʼu haree estátua oioin neʼebé reprezenta animál neʼebé dolar, animál neʼebé foʼer,+ no haree mós umakain Izraél nia estátua hotu neʼebé Maromak hakribi.*+ Sira bahat estátua sira-neʼe haleʼu didin hotu. 11 No umakain Izraél nia katuas naʼin-70 hamriik daudaun iha estátua sira-neʼe nia oin, no Safan+ nia oan-mane Jazanias mós hamriik iha sira-nia leet. Sira ida-idak kaer hela insensu-fatin, no morin husi insensu nia suar saʼe ba leten.+ 12 Nia dehan ba haʼu: “Oan-mane husi ema, ó haree ona buat neʼebé umakain Izraél nia katuas sira halo daudaun iha nakukun laran ka lae? Ó haree ona sira ida-idak nia hahalok iha sira-nia kuartu laran neʼebé tau sira-nia estátua sira ka lae? Sira dehan: ‘Jeová la haree ita. Jeová husik ona rai neʼe.’”+

13 Nia hatutan tan ba haʼu: “Ó sei haree sira-nia hahalok foʼer neʼebé aat liután.” 14 Entaun nia lori haʼu ba portaun norte husi Jeová nia uma, no iha portaun neʼe nia oin, haʼu haree feto sira tuur hela no tanis ba maromak Tamuz.

15 Nia hatutan tan ba haʼu: “Oh oan-mane husi ema, ó haree ona ida-neʼe ka lae? Ó sei haree buat foʼer sira neʼebé aat liu fali buat sira-neʼe.”+ 16 Entaun nia lori haʼu ba pátiu kiʼik iha Jeová nia uma.+ Haʼu haree mane maizumenus naʼin-25 iha odamatan oin husi Jeová nia templu, entre varanda no altár, sira hamriik hodi fila kotuk ba Jeová nia templu no sira-nia oin hateke ba parte leste. Sira hakruʼuk ba loro-matan iha parte leste.+

17 Nia dehan ba haʼu: “Oan-mane husi ema, ó haree ona ida-neʼe ka lae? Umakain Judá hatudu hahalok aat sira-neʼe, hodi halo nakonu rai neʼe ho violénsia+ no kontinua hakanek haʼu-nia laran, neʼe mak buat baibain deʼit ka lae? Sira see ai-sanak* ba haʼu-nia inus. 18 Tan neʼe, haʼu sei hatudu haʼu-nia laran-nakali. Haʼu* sei la hanoin sira, no haʼu mós sei la sente laran-sadiʼa.+ Maski sira hakilar makaʼas iha haʼu-nia tilun, haʼu sei la rona ba sira.”+