Ezequiel

4 “Kona-ba ó, oan-mane husi ema, foti bloku* ida no tau iha ó-nia oin. Bahat dezeñu kona-ba sidade Jeruzalein iha bloku neʼe. 2 Ó tenke halo serku ba sidade neʼe.+ Harii moru no ateru rai hodi halo aas atu ataka sidade neʼe,+ no harii tropa nia hela-fatin, no tau ekipamentu funu nian*+ haleʼu atu harahun sidade neʼe. 3 Foti besi belar ida no tau neʼe nuʼudar moru besi nian entre ó no sidade neʼe. Tuirmai hateke metin ba sidade neʼe, ho ida-neʼe mak ó hatudu oinsá ema sei halo serku ba sidade neʼe. Neʼe mak sinál ida ba umakain Izraél.+

4 “Tuirmai ó tenke toba ho sorin karuk deʼit no ó rasik mak lori umakain Izraél nia sala.+ Ó sei lori sira-nia sala durante loron sira neʼebé ó toba ho sorin karuk. 5 No haʼu sei haruka ó atu toba hanesan neʼe ba loron 390, tuir tinan neʼebé sira halo sala,+ no ó sei lori umakain Izraél nia sala. 6 Ó tenke halo nuneʼe toʼo loron sira-neʼe remata.

“Tuirmai, ba dala segundu, ó sei toba ho sorin loos deʼit, no ó sei lori umakain Judá nia sala+ ba loron 40. Loron ida ba tinan ida, sin, loron ida ba tinan ida, neʼe mak haʼu haruka ó atu halo. 7 No ho ó-nia roupa nia liman neʼebé lulun ona, ó tenke hateke metin ba Jeruzalein neʼebé serku daudaun,+ no ó tenke fó sai profesia hodi kontra Jeruzalein.

8 “Haʼu sei kesi metin ó ho tali atu nuneʼe ó labele fila ó-nia an husi sorin ida ba sorin seluk toʼo loron sira neʼebé ó remata halo serku ba sidade neʼe.

9 “No ó tenke foti trigu oioin,* sevada, koto, lentilla no espelta,* no tau buat sira-neʼe iha fatin ida no halo paun ba ó-nia an. Ó sei han ida-neʼe durante loron sira neʼebé ó toba ho sorin karuk deʼit, katak durante loron 390.+ 10 Ó sei tetu ó-nia hahán, loron ida ó sei han deʼit hahán grama 230.* Ó tenke han tuir tempu neʼebé hili ona.

11 “Ó tenke sukat bee neʼebé ó hemu, loron ida ó tenke hemu deʼit mililitru 600.* Ó tenke hemu tuir tempu neʼebé hili ona.

12 “Ó sei han paun neʼe hanesan ó han paun kabuar neʼebé halo husi sevada. Ó tenke tunu paun neʼe iha sira-nia oin, no sunu ema nia tee maran hodi tunu paun neʼe.” 13 Jeová hatutan tan: “Iha dalan neʼe mak ema Izraél sei han sira-nia paun neʼebé la moos bainhira haʼu halo sira namkari iha nasaun sira-nia leet.”+

14 Tuirmai haʼu dehan: “Labele, oh Jeová, Naʼi Ukun-Naʼin Boot Liu! Husi haʼu-nia tempu joven toʼo agora, haʼu nunka hafoʼer haʼu-nia an hodi han naʼan husi animál neʼebé mate mesak deʼit ka animál neʼebé animál seluk mak lees mate,+ no haʼu nunka han naʼan neʼebé la moos.”+

15 Entaun nia dehan ba haʼu: “Se nuneʼe, haʼu sei husik ó uza karau-teen duké ema nia tee, no ó tenke tunu paun hodi uza karau-teen.” 16 Tuirmai nia dehan ba haʼu: “Oan-mane husi ema, haʼu sei hamenus ai-han* iha Jeruzalein,+ no povu sei tetu sira-nia paun atu han ho laran-susar,+ no sira sei sukat sira-nia bee atu hemu ho taʼuk.+ 17 Ida-neʼe sei akontese, atu nuneʼe sidade neʼe nia ai-han no bee sai menus, no sira sei hateke ba malu ho hakfodak no mate tanba sira-nia sala.