Ezequiel
9 Tuirmai nia koʼalia mai haʼu ho lian makaʼas, hodi dehan: “Bolu sira neʼebé atu lori kastigu ba sidade neʼe, sira ida-idak kaer hela armas atu harahun sidade!”
2 Haʼu haree mane naʼin-neen mai daudaun husi portaun leten nian+ neʼebé hateke ba norte, sira ida-idak kaer hela sira-nia armas atu harahun sidade. Iha sira-nia leet iha mane ida neʼebé hatais hena-liñu, no sekretáriu* nia tinta-fatin mak iha ninia knotak. Sira mai no hamriik besik altár riti.+
3 Tuirmai glória husi Izraél nia Maromak+ hiʼit saʼe husi ninia fatin iha kerubín leten no muda ba templu nia odamatan,+ no Maromak komesa bolu mane neʼebé hatais hena-liñu, neʼebé tara hela sekretáriu nia tinta-fatin iha ninia knotak. 4 Jeová dehan ba nia: “Laʼo haleʼu sidade Jeruzalein, no tau marka ba ema nia reen-toos, katak sira neʼebé triste no halerik+ tanba buat aat hotu neʼebé ema halo iha sidade neʼe.”+
5 No haʼu rona nia dehan ba sira seluk: “Laʼo tuir nia hodi haleʼu sidade no oho ema. Keta hanoin sira no keta sente laran-sadiʼa.+ 6 Imi tenke oho hotu katuas, mane joven, feto virjen, labarik no feto sira.+ Maibé imi keta hakbesik ba ema neʼebé iha marka.+ Imi tenke halo ida-neʼe komesa husi haʼu-nia fatin sagradu.”+ Entaun sira hahú oho katuas sira neʼebé hamriik iha templu nia oin.+ 7 Tuirmai nia dehan ba sira: “Halo foʼer templu no halo nakonu ninia pátiu* sira ho ema nia mate-isin.+ Bá ona!” Entaun sira bá no oho ema iha sidade neʼe.
8 Bainhira sira oho daudaun ema, haʼu mesak deʼit mak moris, no haʼu hakneʼak ho oin ba rai no halerik: “Aii Jeová, Naʼi Ukun-Naʼin Boot Liu! Ita-Boot sei halakon hotu Izraél nia ema restu sira bainhira Ita fakar sai Ita-nia hirus ba Jeruzalein ka?”+
9 Entaun nia dehan ba haʼu: “Umakain Izraél no Judá nia sala mak boot tebetebes.+ Rai neʼe nakonu ho ema nia raan,+ no sidade neʼe nakonu ho hahalok aat.+ Tanba sira dehan: ‘Jeová husik ona rai neʼe, no Jeová la haree.’+ 10 Kona-ba haʼu, haʼu* sei la hanoin sira, no haʼu mós sei la hatudu laran-sadiʼa.+ Haʼu sei lori kastigu ba sira-nia hahalok.”
11 Tuirmai haʼu haree mane neʼebé hatais hena-liñu, neʼebé tara hela tinta-fatin iha ninia knotak, nia mai fali, no dehan: “Haʼu halo tuir duni mandamentu hotu neʼebé Ita fó mai haʼu.”