Apóstolu sira-nia atividade
21 Ho triste ami husik hela sira no saʼe ró hodi bá loos deʼit toʼo Kos. Loron tuirmai ami bá Rodes, no husi neʼebá ami bá Patara. 2 Kuandu ami hetan ró atu bá Fenísia, ami saʼe ró neʼe no bá. 3 Kuandu ami haree ona illa Xipre iha ami-nia sorin karuk,* ami liu deʼit hodi bá Síria, no ami para iha Tiro, tanba iha neʼebá mak ró neʼe hatún sasán sira. 4 Ami buka-hetan dixípulu sira no hela iha neʼebá toʼo loron hitu. Maibé liuhusi Maromak nia espíritu, sira fó avizu beibeik ba Paulo atu la bá Jeruzalein.+ 5 Depois neʼe, ami husik fatin neʼe hodi kontinua ami-nia viajen. Maibé sira hotu, inklui mós feto no labarik sira, lori ami toʼo tasi. Ami hakneʼak iha tasi-ibun no halo orasaun. 6 Tuirmai, ami fó adeus ba malu no ami saʼe ró, no sira fila fali ba sira-nia uma.
7 Ami husik hela Tiro, no halo viajen ho ró hodi toʼo iha Tolome. Ami kumprimenta maun-alin sira iha neʼebá no hela ho sira loron ida. 8 Loron tuirmai ami sai husi neʼe no toʼo iha Sezareia. Ami bá Filipe nia uma, nia mak haklaken-naʼin ba liafuan diʼak, nia mós ema ida husi ema naʼin-hitu+ neʼebé apóstolu sira hili, no ami hela ho nia. 9 Nia iha oan-feto naʼin-haat neʼebé fó sai profesia no sira sei klosan hela.*+ 10 Bainhira ami hela tiha ba loron balu, profeta ida naran Ágabo+ tun mai husi Judeia. 11 Nia mai hasoru ami no foti Paulo nia sintu hodi kesi ninia ain no liman rasik no dehan: “Espíritu santu dehan nuneʼe: ‘Iha Jeruzalein, ema Judeu sei kesi sintu neʼe nia naʼin iha dalan hanesan neʼe+ no sei entrega nia ba ema husi nasaun seluk nia liman.’”+ 12 Rona tiha ida-neʼe, ami no mós ema sira iha fatin neʼe, husu beibeik ba Paulo atu labele saʼe ba Jeruzalein. 13 Tuirmai Paulo hatán: “Tanbasá mak imi tanis hodi halo haʼu sai laran-susar?* Imi hatene bá katak, haʼu prontu atu ema kesi haʼu, no mós prontu atu mate iha Jeruzalein tanba Naʼi Jesus nia naran.”+ 14 Kuandu ami labele ona troka ninia hanoin, ami la obriga tan nia* no dehan: “Husik Jeová* nia hakarak mak sai loos.”
15 Liutiha neʼe, ami prepara an hodi halo viajen no ami saʼe ba Jeruzalein. 16 Dixípulu balu husi Sezareia mós laʼo hamutuk ho ami atu lori ami ba Menason nia uma. Nia husi Xipre, no nia mós dixípulu neʼebé primeiru, no ami atu hela iha nia uma. 17 Kuandu ami toʼo iha Jeruzalein, maun-alin sira simu ami ho kontente. 18 Maibé loron tuirmai Paulo bá hamutuk ho ami atu hasoru Tiago,+ no katuas sira hotu mós iha neʼebá. 19 Nia kumprimenta sira no hahú konta ba sira buat hotu neʼebé Maromak halo ona iha nasaun sira-nia leet liuhusi ninia serbisu haklaken.
20 Rona tiha ida-neʼe, sira fó glória ba Maromak, no sira dehan ba Paulo: “Ami-nia belun, ó hatene katak iha ona ema Judeu rihun ba rihun neʼebé sai fiar-naʼin, no sira hotu laran-manas atu halo tuir Ukun-Fuan.+ 21 Maibé sira rona lia-anin katak ó hanorin ona ema Judeu hotu iha nasaun seluk nia leet kona-ba buat neʼebé kontra* Moisés nia Ukun-Fuan no atu husik Ukun-Fuan neʼe, hodi fó-hatene sira atu la halo sirkunsizaun* ba sira-nia oan no la halo tuir sira-nia toman.+ 22 Entaun, saida mak ita sei halo? Tanba sira sei rona duni katak ó iha neʼe ona. 23 Entaun, halo tuir bá buat neʼebé ami atu dehan ba ó: Iha mane naʼin-haat iha ami-nia leet neʼebé halo ona juramentu. 24 Lori mane sira-neʼe ho ó no hamoos ó-nia an tuir ukun-fuan hamutuk ho sira no selu buat neʼebé sira presiza, atu nuneʼe sira bele koi tiha sira-nia fuuk. Tuirmai, ema hotu sei hatene katak lia-anin neʼebé ema koʼalia kona-ba ó mak la loos, maibé katak ó-nia hahalok loos no ó rasik mós halo tuir Ukun-Fuan.+ 25 Kona-ba fiar-naʼin husi nasaun seluk, ami haruka tiha ona ami-nia desizaun ba sira iha karta katak sira tenke hasees an husi buat sira neʼebé hasaʼe ona ba estátua,*+ husi raan,+ husi animál neʼebé buti mate*+ no husi sala seksuál.”*+
26 Iha loron tuirmai Paulo lori mane sira-neʼe no hamoos nia an rasik tuir ukun-fuan hamutuk ho sira,+ no sira tama ba templu atu fó-hatene kona-ba bainhira mak sira-nia loron sira atu hamoos an nian sei remata hodi nuneʼe amlulik bele hasaʼe sakrifísiu ba Maromak ba sira ida-idak.
27 Kuandu loron hitu* neʼe besik ona atu remata, ema Judeu sira husi Ázia haree Paulo iha templu no sira hahú halo ema-lubun sai hirus. No sira kaer nia, 28 no hakilar dehan: “Ema Izraél sira, ajuda ami! Mane neʼe mak ida neʼebé hanorin ema iha fatin hotu hodi kontra ita-nia povu no ita-nia Ukun-Fuan no mós fatin neʼe. Laʼós neʼe deʼit, nia mós lori ema Gregu mai iha templu no halo foʼer ona fatin santu neʼe.”+ 29 Sira dehan ida-neʼe tanba uluk sira haree Trófimo+ husi Éfeso hamutuk ho nia iha sidade, no sira hanoin katak Paulo lori ona nia tama ba templu. 30 Sidade tomak sai runguranga, no povu halai hamutuk ba templu hodi kaer Paulo no dada nia ba templu nia liʼur, no sira taka kedas odamatan. 31 Bainhira sira koko atu oho nia, ema fó-hatene ba komandante tropa nian katak Jeruzalein tomak agora runguranga loos. 32 Entaun komandante neʼe lori kedas ninia tropa no xefe tropa nian sira no halai tun ba sira. Kuandu ema sira-neʼe haree komandante no mós tropa sira, sira la baku tan Paulo.
33 Tuirmai, komandante neʼe mai besik no kaer Paulo no haruka atu kesi nia ho korrente rua;+ no komandante neʼe husu ba sira kona-ba nia mak sé no saida mak nia halo. 34 Maibé ema-lubun neʼe hahú hakilar, balu dehan buat ida, maibé balu fali dehan buat seluk. Tanba ema-lubun runguranga loos, komandante neʼe la hatene ho loloos saida mak akontese, entaun nia haruka atu lori Paulo ba fatin tropa nian. 35 Maibé kuandu nia toʼo iha eskada, situasaun sai aat liu toʼo tropa sira tenke hiʼit no lori nia tanba violénsia neʼebé ema-lubun halo, 36 tanba ema-lubun kontinua laʼo tuir sira no hakilar dehan: “Oho nia!”
37 Kuandu tropa sira besik ona atu lori tama nia ba fatin tropa nian, Paulo dehan ba komandante: “Haʼu bele koʼalia buat ruma ba Ita?” Nia hatán: “Ó hatene koʼalia lian Gregu ka? 38 Ó mak ema Ejitu neʼebé foin lalais neʼe book ema atu kontra governu no lori ohodór naʼin-4.000 hodi bá rai-fuik ka lae?” 39 Tuirmai Paulo dehan: “Loloos, haʼu mak ema Judeu ida,+ haʼu husi Tarsu+ iha Silísia, haʼu sidadaun husi sidade neʼebé naran-boot. Haʼu husu Ita, fó lisensa mai haʼu atu koʼalia ba povu neʼe.” 40 Bainhira Paulo hetan tiha lisensa husi nia, Paulo hamriik iha eskada no nia halo sinál ho nia liman ba povu neʼe. Kuandu ema hotu nonook ona, nia koʼalia ba sira ho lian Ebreu,+ hodi dehan: