Apóstolu sira-nia atividade
6 Iha tempu neʼebá, kuandu dixípulu sira aumenta ba beibeik, ema Judeu sira neʼebé koʼalia lian Gregu hahú muramura hasoru ema Judeu neʼebé koʼalia lian Ebraiku, tanba sira-nia feto-faluk sira la hetan ai-han neʼebé fahe loroloron.+ 2 Tan neʼe, sira naʼin Sanulu-Resin-Rua* bolu dixípulu hotu hodi halibur hamutuk no dehan: “La diʼak se ami tenke husik Maromak nia liafuan tan deʼit atu fahe ai-han iha meza.+ 3 Entaun, maun-alin sira, hili mane naʼin-hitu husi imi-nia leet, sira neʼebé iha naran diʼak,*+ nakonu ho Maromak nia espíritu no matenek,+ atu nuneʼe ami bele hili sira atu kaer knaar neʼe.+ 4 Maibé ami sei uza ami-nia forsa no tempu atu halo orasaun no atu halo serbisu ba Maromak nia liafuan.” 5 Dixípulu hotu kontente ho buat neʼebé apóstolu sira dehan, no sira hili Estevão neʼebé fiar metin no nakonu ho espíritu santu, no mós Filipe,+ Prókoro, Nikanor, Timão, Pármenas, no Nicolau ema Antiokia neʼebé simu ona relijiaun Judeu nian.* 6 Sira lori ema sira-neʼe ba apóstolu sira no halo tiha orasaun apóstolu sira tau liman ba ema sira-neʼe.+
7 Tan neʼe Maromak nia liafuan kontinua habelar,+ no dixípulu sira kontinua aumenta barak tan+ iha Jeruzalein, no amlulik barak mós sai fiar-naʼin.+
8 Estevão, nakonu ho Maromak nia laran-diʼak no kbiit, halo milagre boot no sinál sira iha povu nia leet. 9 Maibé ema balu husi grupu neʼebé hanaran Sinagoga husi Ema neʼebé sai Livre mai hamutuk ho ema Sirene, ema Alexandria, no sira neʼebé husi Silísia no Ázia, atu diskute malu ho Estevão. 10 Maibé sira labele manán ninia matenek no mós Maromak nia espíritu neʼebé ajuda nia atu koʼalia.+ 11 Tuirmai, ho subasubar deʼit sira book ema atu dehan: “Ami rona nia koʼalia aat Moisés no Maromak.” 12 Sira soran povu, katuas sira no eskriba sira, no sira mai hasoru nia derrepente deʼit. Sira kaer nia hodi obriga no lori nia ba Sinédriu. 13 Tuirmai, sira lori sasin falsu sira neʼebé dehan: “Mane neʼe la para atu koʼalia kontra fatin santu neʼe no kontra Ukun-Fuan. 14 Porezemplu, ami rona nia dehan katak Jesus ema Nazaré sei harahun tiha fatin neʼe no troka kostume sira neʼebé Moisés fó ona ba ita.”
15 Bainhira sira hotu neʼebé tuur iha Sinédriu hateke ba nia, sira haree katak ninia oin kalma hanesan anju ida nia oin.