Provérbios
26 Hanesan jelu-rahun iha tempu manas no udan iha tempu koʼa nian,
Nuneʼe mós ema neʼebé beik-teen la merese simu glória.+
2 Hanesan manu ida iha razaun atu halai sees no manu-andoriña iha razaun atu semo,
Nuneʼe mós ema la hetan malisan se la iha razaun loos.*
3 Ema uza xikote atu baku kuda no uza kuda-freun ba kuda-burru,+
No ema uza rota atu baku ema beik nia kotuk.+
4 Keta hatán ba ema beik tuir ninia liafuan beik,
Atu nuneʼe ó rasik labele sai beik hanesan nia.
5 Hatán ba ema beik tuir ninia liafuan beik,
Atu nuneʼe nia labele hanoin katak nia mak ema matenek.+
6 Ema neʼebé tau fiar ba ema beik atu halo serbisu ruma
Mak hanesan ema neʼebé hakanek ninia an no halo tohar ninia ain.
7 Lia-dadolin neʼebé iha ema beik sira-nia ibun
Mak hanesan ema ain-kudeʼik nia ain neʼebé laʼo la metin.+
9 Lia-dadolin neʼebé iha ema beik sira-nia ibun
Mak hanesan ai-tarak neʼebé ema lanu-teen kaer hela iha ninia liman.
10 Patraun neʼebé fó serbisu ba ema beik ka ba ema neʼebé laʼo liu deʼit
Mak hanesan ema neʼebé hana arbiru no hakanek ema oioin.*
11 Ema beik neʼebé halo nafatin ninia hahalok beik
Mak hanesan asu neʼebé fila no han fali ninia muta.+
12 Ó haree ona ema neʼebé hanoin katak nia mak matenek liu ka lae?+
Fasil liu atu ajuda ema beik duké ajuda ema hanesan neʼe.
13 Ema baruk-teen dehan: “Iha leaun ida iha dalan,
Iha leaun iha sidade nia fatin públiku!”+
14 Odamatan loke-taka beibeik iha ninia dobralisa,
No ema baruk-teen duir an bá-mai iha ninia toba-fatin.+
15 Ema baruk-teen tau deʼit ninia liman iha manko festa nian,
No nia sente baruk atu foti ninia liman atu hatama hahán ba ninia ibun.+
16 Ema baruk-teen hanoin katak nia mak matenek liu
Duké ema naʼin-hitu neʼebé hatán ho matenek.
17 Ema neʼebé laʼo liu deʼit no sai hirus kona-ba* ema seluk nia problema
Mak hanesan ema neʼebé kaer metin asu nia tilun.+
18 Hanesan ema bulak hana rama-oan neʼebé lakan ho ahi, no hana rama-oan neʼebé halo mate ema
19 Nuneʼe mós ho ema neʼebé lohi tiha ninia maluk no dehan: “Haʼu halimar deʼit!”+
20 Ahi sei mate kuandu la iha ai,
Nuneʼe mós istori malu sei la iha tan kuandu la iha ema neʼebé koʼalia aat hodi hafoʼer ema seluk nia naran.+
21 Hanesan tau ahi-anar ba ahi-klaak no tau ai ba ahi,
Nuneʼe mós ema neʼebé bukaliadór hamosu istori malu.+
22 Liafuan husi ema neʼebé koʼalia aat hodi hafoʼer ema seluk nia naran mak hanesan ai-han gostu*
Neʼebé ema tolan lalais deʼit no tun ba ninia kabun laran.+
23 Ema laran-aat nia liafuan midar
Mak hanesan sanan-rai rohan ida neʼebé taka ho osan-mutin.+
24 Ema neʼebé odi ema seluk subar ninia odi neʼe ho ninia liafuan,
Maibé nia haburas laran-makerek iha ninia laran.
25 Maski nia koʼalia liafuan midar, keta fiar nia,
Tanba iha buat hitu iha ninia laran neʼebé aat tebes.*
26 Maski ema bele taka ninia odi ho lia-bosok,
Maibé ninia hahalok aat sei hatudu sai iha kongregasaun nia oin.
27 Ema neʼebé keʼe rai-kuak sei monu ba rai-kuak neʼe nia laran,
No ema neʼebé duir sai fatuk, fatuk neʼe sei fila fali ba nia.+
28 Ema ho nanál neʼebé bosok, odi sira neʼebé nia hanehan,
No ibun neʼebé gaba ema ho laran-makerek bele halo aat ema.+