Tito
1 Husi Paulo, Maromak nia atan no Jesus Kristu nia apóstolu, haʼu-nia fiar no haʼu-nia serbisu nuʼudar apóstolu tuir fiar husi sira neʼebé Maromak hili ona, no tuir koñesimentu neʼebé loos kona-ba lia-loos, neʼebé hatudu oinsá atu laran-metin ba Maromak,* 2 no bazeia ba esperansa moris rohan-laek nian+ neʼebé Maromak promete ona iha tempu uluk kedas, no Maromak nunka bosok,+ 3 maibé iha tempu neʼebé nia deside ona, nia fó sai ninia liafuan liuhusi serbisu haklaken, neʼebé nia entrega mai haʼu atu halo,+ hodi tuir mandamentu husi ita-nia Salvadór, Maromak. 4 Haʼu hakerek karta neʼe ba haʼu-nia maluk fiar-naʼin Tito, neʼebé hanesan haʼu-nia oan rasik:
Haʼu harohan katak Aman Maromak no Kristu Jesus ita-nia Salvadór sei hatudu laran-diʼak neʼebé boot no haraik dame ba ó.
5 Haʼu husik ó hela iha Kreta, atu nuneʼe ó bele korrije buat sira neʼebé la loos* no foti katuas sira iha sidade ida-idak, hanesan haʼu hanorin ona ó atu halo: 6 Atu sai katuas ida, mane ida tenke halaʼo ninia moris ho didiʼak atu ema la hetan razaun atu duun nia, tenke iha feen ida deʼit, ninia oan sira mak fiar-naʼin, neʼebé ema la duun katak sira moris arbiru* ka kontradór.+ 7 Nuʼudar Maromak nia atan,* katuas ida* tenke halaʼo ninia moris ho didiʼak atu ema la hetan razaun atu duun nia, la halo tuir deʼit ninia hakarak rasik,+ la hirus lalais,+ la lanu-teen, la halo violénsia,* no la buka atu manán buat ruma ho laran-makerek, 8 maibé nia gosta simu ema ho laran-diʼak,*+ hadomi buat diʼak, iha hanoin neʼebé loos,*+ iha hahalok loos,+ laran-metin, kontrola an,+ 9 no bainhira nia hanorin nia tenke kaer metin ba Maromak nia liafuan* neʼebé ema bele tau fiar,+ atu nuneʼe nia bele anima no hametin* ema hodi hanorin buat neʼebé loos*+ no bele korrije+ sira neʼebé koʼalia kontra.
10 Iha ema barak neʼebé kontradór, koʼalia buat neʼebé folin-laek no lohidór, liuliu sira neʼebé dehan katak tenke hetan sirkunsizaun.*+ 11 Ó tenke taka ema sira-neʼe nia ibun, tanba sira kontinua estraga umakain sira-nia fiar liuhusi hanorin buat neʼebé sira labele hanorin. Sira halo nuneʼe tanba sira hakarak manán buat ruma ho laran-makerek. 12 Profeta ida husi sira-nia rai hatete: “Ema Kreta sempre bosok-teen, sira hanesan animál fuik neʼebé siʼak, no sira mak ema baruk-teen neʼebé gosta atu han demais.”
13 Liafuan neʼe mak loos. Tanba razaun neʼe, kontinua korrije sira* ho makaʼas, atu nuneʼe sira-nia fiar bele metin, 14 no la tau atensaun ba ema Judeu sira-nia istória bosok no ba mandamentu husi ema sira neʼebé fila kotuk ba lia-loos. 15 Buat hotu mak moos ba ema sira neʼebé moos,+ maibé buat hotu la moos ba ema sira neʼebé foʼer ona no la iha fiar, tanba sira-nia neon no konxiénsia sai foʼer ona.+ 16 Sira fó sai iha ema nia oin katak sira hatene Maromak, maibé sira nega nia liuhusi sira-nia hahalok,+ tanba sira-nia hahalok aat, sira lakohi halo tuir no nia la simu sira atu halo buat ida neʼebé diʼak.