Apokalipse
7 Depois neʼe, haʼu haree anju haat hamriik iha rai nia lidun haat, no kaer metin hela anin haat husi rai, atu nuneʼe anin labele huu ba rai ka ba tasi ka ba ai-hun sira. 2 Tuirmai haʼu haree anju ida seluk saʼe husi parte leste,* no nia kaer hela selus* neʼebé nia simu husi Maromak neʼebé moris; no nia bolu ho lian makaʼas ba anju haat neʼebé simu ona podér atu halo aat ba rai no tasi, 3 dehan: “Keta halo aat ba rai ka tasi ka ba ai-hun sira toʼo ami tau tiha sinál*+ ba ita-nia Maromak nia atan sira-nia reen-toos.”+
4 Tuirmai haʼu rona númeru husi sira neʼebé hetan sinál,* sira hamutuk naʼin-144.000,+ no sira mai husi Izraél nia suku hotu:+
5 Husi suku Judá naʼin-12.000 mak hetan sinál,*
husi suku Ruben naʼin-12.000,
husi suku Gad naʼin-12.000,
6 husi suku Aser naʼin-12.000,
husi suku Naftali naʼin-12.000,
husi suku Manasés+ naʼin-12.000,
7 husi suku Simeão naʼin-12.000,
husi suku Levi naʼin-12.000,
husi suku Issacar naʼin-12.000,
8 husi suku Zebulão naʼin-12.000,
husi suku José naʼin-12.000,
husi suku Benjamim naʼin-12.000 mak hetan sinál.*
9 Liutiha buat sira-neʼe, haʼu hateke no haree ema-lubun boot neʼebé sura labele, neʼebé mai husi nasaun, suku, povu no língua hotu.+ Sira hamriik iha kadunan nia oin no iha Bibi-Oan nia oin, sira hatais roupa mutin+ no kaer ai-palmeira sanak iha sira-nia liman.+ 10 Sira kontinua haklalak ho lian makaʼas, dehan: “Ami-nia salvasaun mai husi ita-nia Maromak neʼebé tuur iha kadunan,+ no husi Bibi-Oan.”+
11 Anju hotu hamriik haleʼu kadunan no haleʼu katuas sira+ no mós haleʼu kriatura moris naʼin-haat, no sira hakneʼak no hakruʼuk ho oin ba rai iha kadunan nia oin no adora Maromak, 12 hodi dehan: “Amen! Fó hahiʼi, glória, agradese, respeitu tinan ba tinan ba nafatin ba ita-nia Maromak neʼebé iha podér, kbiit no matenek.+ Amen.”
13 Tuirmai katuas sira-neʼe ida husu haʼu: “Ó hatene sé mak ema sira neʼebé hatais roupa mutin neʼe?+ Sira mai husi neʼebé?” 14 Haʼu hatán kedas ba nia: “Haʼu-nia naʼi, Ita mak hatene.” Nia dehan ba haʼu: “Sira mak ema neʼebé liu terus boot.+ Sira fase ona sira-nia roupa no halo mutin ona sira-nia roupa ho Bibi-Oan nia raan.+ 15 Tan neʼe mak sira hamriik iha Maromak nia kadunan oin, no sira halo serbisu sagradu ba nia loron no kalan iha ninia templu. No Ida neʼebé tuur iha kadunan+ sei harii ninia tenda atu proteje sira.+ 16 Sira sei la hamlaha no la hamrook tan. Loro-matan no rai-manas makaʼas sei la kona sira,+ 17 tanba Bibi-Oan+ neʼebé besik kadunan neʼe* sei tau matan ba sira hanesan bibi-atan+ no sei dirije sira ba bee-matan moris nian.+ No Maromak sei hamaran ema nia matan-been hotu husi sira-nia matan.”+