Isaias
8 Jeová hatete ba haʼu: “Foti ai-kabelak boot+ no hakerek liafuan ‘Maer-Salal-Has-Baz’* iha ai neʼe nia leten hodi uza kaneta* baibain. 2 No haʼu hakarak sasin sira neʼebé laran-metin atu hakerek katak sira sai sasin bainhira dokumentu neʼe hakerek tiha, sasin sira-neʼe mak amlulik Urias+ no Jeberekias nia oan-mane Zacarias.”
3 Tuirmai haʼu halo relasaun ho* haʼu-nia feen neʼebé mós nuʼudar profeta, no nia sai isin-rua. Liutiha tempu balu, nia tuur-ahi oan-mane ida.+ Depois neʼe, Jeová dehan ba haʼu: “Hanaran labarik neʼe Maer-Salal-Has-Baz, 4 tanba antes labarik-mane neʼe hatene oinsá atu bolu: ‘Apá!’ no ‘Amá!’, ema sei lori sai tiha Damasku nia rikusoin no Samaria nia sasán ba liurai Asíria nia oin.”+
5 Dala ida tan Jeová koʼalia mai haʼu, hodi dehan:
6 “Povu neʼe la simu ona bee Siloa* nian neʼebé suli ho neineik+
No sira haksolok fali ho Rezin no Remalias nia oan-mane,+
7 Tan neʼe mak Jeová sei haruka liurai Asíria+
Hamutuk ho ninia glória hotu atu halo funu hasoru sira.
Nia sei mai ho ninia tropa neʼebé forte,
Nia sei mai lalais hanesan bee boot husi Mota Eufrates*
Neʼebé saʼe liu nia ninin sira,
8 No suli liuhusi rai-Judá.
Nia sei sai hanesan bee barak neʼebé suli makaʼas, no saʼe toʼo kakorok;+
Ninia liras sei loke atu taka hotu ó-nia rai tomak!”
9 Imi nasaun sira, halo aat bá, maibé imi sei lakon mohu.
Imi povu hotu husi fatin dook, rona bá!
Sai prontu bá atu funu,* maibé imi sei lakon mohu!+
Sai prontu bá atu funu, maibé imi sei lakon mohu!
10 Halo planu bá, maibé ida-neʼe sei sai runguranga!
11 Jeová nia liman neʼebé forte mak iha haʼu-nia leten, no nia fó avizu ba haʼu atu labele halo tuir povu neʼe, hodi dehan:
12 “Imi labele hatete: ‘Neʼe mak planu ida!’ bainhira povu sira-neʼe hatete: ‘Neʼe mak planu ida!’
Keta taʼuk ba buat neʼebé sira taʼuk;
Keta nakdedar kona-ba neʼe.
13 Jeová neʼebé ukun tropa lalehan nian mak Ida neʼebé imi tenke hafolin nuʼudar santu,+
Nia mak Ida neʼebé imi tenke hamtaʼuk,
No nia mak Ida neʼebé tenke halo imi nakdedar.”+
14 Nia sei sai nuʼudar fatin sagradu ida,
Maibé nia mós sei sai nuʼudar fatuk ida neʼebé halo sidi
No nuʼudar fatuk boot neʼebé halo monu+
Izraél nia umakain rua;
Nia sei sai nuʼudar rai-kuak no lasu
Ba ema neʼebé hela iha Jeruzalein.
15 Sira barak sei sidi, monu no rahun;
Ema sei lasu no kaer sira.
16 Taka tiha surat-tahan lulun neʼebé hakerek ona liafuan sira;*
Tau selus* ba ukun-fuan* no rai hela iha haʼu-nia dixípulu nia leet!
17 Haʼu sei hein nafatin* ba Jeová,+ neʼebé subar nia oin husi Jacob nia umakain,+ no haʼu sei tau esperansa ba nia.
18 Haree bá! Haʼu iha neʼe hamutuk ho oan sira neʼebé Jeová fó ona ba haʼu.+ Ami mak sinál+ no milagre sira iha Izraél husi Jeová neʼebé ukun tropa lalehan nian, neʼebé hela iha Foho Siaun.
19 Se sira dehan ba imi: “Buka toʼok matadalan husi ema neʼebé koko atu koʼalia ba ema mate ka ema neʼebé siʼik futuru neʼebé koʼalia ho lian neineik no bisubisu”, entaun imi tenke halo tuir ka? Povu sira tenke husu ba ema mate kona-ba ema moris ka?+ Loloos, povu tenke husu ba sira-nia Maromak rasik. 20 Sira tenke buka konsellu husi ukun-fuan no liafuan seluk* neʼebé hakerek tiha ona!
Bainhira sira la koʼalia tuir ninia liafuan, sira sei la haree naroman.*+ 21 Ema ida-idak sei laʼo liu rai neʼe ho susar no hamlaha.+ Sira sei koʼalia aat sira-nia liurai no sira-nia Maromak nuʼudar sira hateke ba leten tanba hamlaha no hirus. 22 Tuirmai sira sei hateke ba rai no haree deʼit terus no nakukun, la iha esperansa no moris susar, nakukun loos no la iha naroman.