Roma
7 Maun-alin sira, haʼu koʼalia ba imi neʼebé hatene ukun-fuan. Imi hatene ka lae, katak Ukun-Fuan mak naʼi ba ema ida kuandu nia sei moris hela? 2 Porezemplu, tuir ukun-fuan feto ida neʼebé kaben ona kesi metin ba ninia laʼen kuandu ninia laʼen sei moris. Maibé se ninia laʼen mate, nia sai livre husi ninia laʼen nia ukun-fuan.+ 3 Entaun, bainhira nia laʼen moris hela no nia kaben ho mane seluk, ema sei dehan katak nia halo sala seksuál.*+ Maibé se ninia laʼen mate ona, nia sai livre husi ninia laʼen nia ukun-fuan. Tan neʼe, se nia kaben fali ho mane seluk, nia la halo sala seksuál.*+
4 Nuneʼe mós, haʼu-nia maun-alin sira, imi livre ona husi Ukun-Fuan* liuhusi Kristu nia isin atu imi bele sai fali Kristu nian,+ ida neʼebé moris fali husi mate,+ hodi nuneʼe ita bele hatudu hahalok neʼebé fó glória ba Maromak.+ 5 Tanba uluk kuandu ita moris tuir hakarak isin nian, Ukun-Fuan hatudu sai ho klaru katak hakarak aat iha ita-nia isin lori ita ba sala, no sala lori ita ba mate.+ 6 Maibé agora ita sai livre ona husi Ukun-Fuan neʼe,+ tanba Ukun-Fuan la hanetik tan ita.* Tan neʼe, ita bele sai atan iha dalan foun hodi tuir Maromak nia espíritu,+ laʼós iha dalan tuan hodi halo tuir ukun-fuan neʼebé hakerek ona.+
7 Entaun, ita bele dehan saida? Ukun-Fuan mak sala ka? Lae duni! Tuir loloos, se la iha Ukun-Fuan haʼu la hatene sala.+ Porezemplu, se haʼu la hatene Ukun-Fuan neʼebé dehan: “Imi labele kaan buat neʼebé ema seluk nian”, haʼu sei la hatene katak sala atu sai kaan-teen.+ 8 Maibé ho ukun-fuan neʼe mak sala hetan oportunidade atu halo haʼu kaan buat oioin neʼebé ema seluk nian, tanba sala la iha kbiit* se la iha ukun-fuan.+ 9 Tuir loloos, uluk haʼu moris ketak husi ukun-fuan. Maibé, kuandu ukun-fuan toʼo mai, sala mak moris fali,* no haʼu mate.+ 10 Ukun-fuan neʼebé loloos lori ba moris,+ haʼu haree katak neʼe lori ba mate. 11 Tanba ho ukun-fuan mak sala hetan oportunidade atu lohi haʼu no oho haʼu liuhusi ukun-fuan neʼe. 12 Entaun Ukun-Fuan no mandamentu mak santu, loos no diʼak.+
13 Entaun, neʼe katak buat neʼebé diʼak oho haʼu ka? Lae duni! Maibé sala mak oho haʼu. Liuhusi buat neʼebé diʼak sala lori haʼu ba mate, no ida-neʼe hatudu sai saida mak sala neʼe.+ No ukun-fuan hatudu sai katak sala mak aat tebes.+ 14 Ita hatene katak Ukun-Fuan neʼe mak husi Maromak, maibé haʼu mak isin nian, no faʼan ona hodi sai atan ba sala.+ 15 Haʼu la komprende saida mak haʼu halo. Tanba buat neʼebé haʼu hakarak halo, haʼu la halo, maibé haʼu halo fali buat neʼebé haʼu odi. 16 Maski nuneʼe, se haʼu halo buat neʼebé haʼu lakohi halo, haʼu konkorda katak Ukun-Fuan mak diʼak. 17 Maibé, laʼós haʼu mak halo ida-neʼe. Sala neʼebé iha haʼu-nia isin mak halo ida-neʼe.+ 18 Tanba haʼu hatene katak haʼu mak ema deʼit, no la iha buat diʼak ida mak iha haʼu-nia isin. Haʼu hakarak atu halo buat neʼebé loos, maibé haʼu la iha kbiit atu halo ida-neʼe.+ 19 Tanba buat diʼak neʼebé haʼu hakarak halo, haʼu la halo, maibé buat aat neʼebé haʼu lakohi halo, haʼu halo beibeik. 20 Entaun se haʼu halo buat neʼebé haʼu lakohi, neʼe katak laʼós haʼu mak halo ida-neʼe, maibé sala neʼebé hela iha haʼu.
21 Entaun, haʼu haree ukun-fuan tuirmai neʼe domina haʼu: Bainhira haʼu hakarak halo buat neʼebé loos, buat neʼebé aat mós hamutuk ho haʼu.+ 22 Iha haʼu-nia laran, haʼu haksolok duni ho Maromak nia ukun-fuan,+ 23 maibé haʼu haree ukun-fuan seluk iha haʼu-nia isin neʼebé halo funu kontra ukun-fuan iha haʼu-nia neon,+ no ida-neʼe lori haʼu sai atan ba sala nia ukun-fuan+ neʼebé iha haʼu-nia isin. 24 Haʼu mak ema neʼebé kuitadu loos! Sé mak sei salva haʼu husi isin neʼebé lori haʼu ba mate neʼe? 25 Obrigadu ba Maromak liuhusi Jesus Kristu ita-nia Naʼi! Entaun, ho haʼu-nia neon, haʼu atan ba Maromak nia ukun-fuan, maibé haʼu-nia isin mak atan ba sala nia ukun-fuan.+