Segundu Samuel
16 Bainhira David liu uitoan ona foho-tutun,+ Mefiboset+ nia atan-mane Ziba+ mós iha neʼebá atu hasoru nia, no Ziba lori kuda-burru rua neʼebé tula paun fuan 200, dose 100 husi uvas-maran, dose 100 husi ai-fuan oioin neʼebé maran* no tua-uvas iha buli boot ida.+ 2 Entaun liurai dehan ba Ziba: “Tanbasá mak ó lori buat sira-neʼe?” Ziba hatán: “Kuda-burru sira-neʼe ba liurai nia família atu saʼe, paun no ai-fuan maran oioin neʼe ba mane joven sira atu han, no tua-uvas neʼe ba sira neʼebé sai kole iha rai-fuik atu hemu.”+ 3 Liurai hatete ba nia: “Ó-nia naʼi nia oan-mane* iha neʼebé?”+ Ziba hatán ba liurai: “Nia hela iha Jeruzalein, tanba nia dehan: ‘Ohin umakain Izraél sei entrega fali haʼu-nia aman nia ukun ba haʼu.’”+ 4 Rona tiha neʼe, liurai hatete ba Ziba: “Buat hotu neʼebé Mefiboset nian agora sai fali ó-nian!”+ Ziba hatán: “Haʼu hakruʼuk iha Ita-Boot nia oin. Haʼu hein katak haʼu-nia naʼi liurai sei kontente ho haʼu.”+
5 Bainhira Liurai David toʼo iha Baurim, mane ida husi Saul nia umakain naran Simei+ sai mai. Nia hakbesik hodi hakilar atu fó-malisan ba liurai.+ Simei mak Gera nia oan-mane. 6 Nia tuda fatuk ba Liurai David no ninia atan sira, no mós ba ema hotu no asuwaʼin sira neʼebé iha liurai nia liman-loos no liman-karuk. 7 Simei fó-malisan, hodi dehan: “Sai tiha, sai tiha husi neʼe, ó neʼebé ohodór!* Ó mak mane folin-laek! 8 Jeová selu fali ba ó tanba ó oho Saul nia umakain* no foti tiha ukun husi nia. Entaun Jeová fó fali ukun neʼe ba ó-nia oan-mane Absalão. Agora ó iha susar laran, tanba ó mak ohodór!”+
9 Entaun Zeruia nia oan-mane Abisai+ dehan ba liurai: “Tanbasá mak asu neʼebé mate ona+ neʼe fó-malisan ba haʼu-nia naʼi liurai?+ Favór ida, husik haʼu bá neʼebá, no tesi tiha ninia ulun.”+ 10 Maibé liurai hatete: “Oh Zeruia nia oan-mane sira,+ tanbasá mak imi hakarak mete ho ida-neʼe? Husik nia fó-malisan ba haʼu,+ tanba Jeová dehan ona ba nia:+ ‘Fó-malisan ba David!’ Entaun sé mak bele dehan: ‘Tanbasá mak ó halo nuneʼe?’” 11 Tuirmai David dehan ba Abisai no ninia atan sira hotu: “Agora haʼu-nia oan-mane neʼebé sai husi haʼu-nia isin rasik mak buka atu oho haʼu,+ sá tan ho ema Benjamim ida!+ Husik nia bá, atu nuneʼe nia bele fó-malisan ba haʼu, tanba Jeová mak haruka nia atu halo nuneʼe! 12 Karik Jeová sei haree haʼu-nia terus,+ no Jeová sei haraik bensaun ba haʼu duké malisan sira neʼebé Simei hakilar ba haʼu ohin.”+ 13 Ho ida-neʼe, David no ninia ema sira kontinua laʼo tun iha dalan neʼe. Simei mós laʼo iha foho sorin tuir nia, no hakilar hodi fó-malisan+ ba nia no tuda fatuk no kari rai-rahun barak ba sira.
14 Ikusmai, liurai no ninia ema hotu neʼebé laʼo hamutuk ho nia toʼo iha sira-nia fatin ho kole loos, no sira deskansa.
15 Iha tempu neʼebá, Absalão no mane Izraél hotu toʼo iha Jeruzalein, no Ahitofel+ mós hamutuk ho nia. 16 Bainhira David nia belun* Husai+ ema Arki+ tama hodi hasoru Absalão, Husai dehan ba Absalão: “Viva liurai!+ Viva liurai!” 17 Ho ida-neʼe, Absalão dehan ba Husai: “Ó-nia domin neʼebé laran-metin ba ó-nia belun iha neʼebé? Tanbasá mak ó la bá hamutuk ho ó-nia belun?” 18 Husai hatete ba Absalão: “Lae, haʼu sei apoia deʼit ema neʼebé Jeová hili ona, no mós ema neʼebé povu ho mane hotu iha Izraél hili ona. Haʼu sei hela ho nia. 19 Dala ida tan haʼu dehan: Sé mak haʼu sei serbí? Haʼu tenke serbí ninia oan-mane, loos ka lae? Haʼu sei serbí Ita hanesan haʼu serbí ona Ita-nia aman.”+
20 Tuirmai Absalão dehan ba Ahitofel: “Fó sai ó-nia hanoin* ba haʼu.+ Saida mak ita tenke halo?” 21 Ahitofel hatete ba Absalão: “Halo relasaun seksuál ho ó-nia aman nia feen-kiʼik sira,+ katak sira neʼebé nia husik hela atu tau matan ba palásiu.+ Depois neʼe, ema Izraél hotu sei rona katak ó halo ona ó-nia an nuʼudar buat dois ba ó-nia aman, no ema sira neʼebé apoia ó sei sai metin liu.” 22 Entaun sira dada tenda ba Absalão iha uma-leten,+ no nia halo relasaun ho ninia aman nia feen-kiʼik sira+ iha povu Izraél hotu nia oin.+
23 Iha tempu neʼebá, ema haree Ahitofel nia konsellu sira+ hanesan liafuan husi Maromak neʼebé loos.* Nuneʼe mak David no Absalão hafolin Ahitofel nia konsellu sira.