Lamentasaun
א [Alef]
2 Jeová taka Siaun nia oan-feto ho kalohan metan ho hirus!
Nia soe tun ona Izraél nia kmanek husi lalehan ba rai.+
Iha ninia loron hirus, nia la hanoin-hetan fatin atu tau ninia ain.+
ב [Bet]
2 Jeová tolan ona Jacob nia hela-fatin hotu hodi la hatudu laran-sadiʼa.
Nia harahun Judá*+ nia fatin sira neʼebé seguru ho laran-nakali.
Nia halo ukun neʼe+ no ulun-naʼin sira+ rahun toʼo rai no halo sira sai foʼer.
ג [Gimel]
3 Nia halakon ona Izraél nia forsa tomak* ho hirus makaʼas.
Nia dada fali ninia liman-loos bainhira inimigu hakbesik mai,+
Ninia hirus ba Jacob mak hanesan ahi neʼebé lakan nafatin toʼo han buat hotu neʼebé haleʼu Jacob.+
ד [Dalet]
4 Nia dada* ona ninia rama hanesan inimigu ida. Nia liman-loos prontu atu ataka hanesan inimigu ida.+
Nia kontinua oho ema hotu neʼebé ita hafolin.+
Nia fakar sai ninia hirus hanesan fakar ahi+ ba Siaun* nia tenda.+
ה [Hei]
5 Jeová sai ona hanesan inimigu ida.+
Nia tolan ona Izraél.
Nia tolan ona uma aas* hotu.
Nia halakon ona fatin hotu neʼebé seguru.
No nia halo ema tanis no lelir makaʼas iha Judá.
ו [Vau]
6 Nia sobu ninia barraka,+ hanesan sobu barraka ida neʼebé iha jardín laran.
Jeová halo ema haluha kona-ba festa no loron Sábadu iha Siaun,
No ho laran-nakali makaʼas, nia la hafolin liurai no amlulik.+
ז [Zain]
7 Jeová la simu ona ninia altár.
Nia la simu ona ninia fatin sagradu.+
Nia entrega ona Siaun nia uma aas* sira neʼebé seguru ba inimigu nia liman.+
Sira hakilar ho lian makaʼas iha Jeová nia uma,+ hanesan iha loron festa nian.
ח [Hetes]
8 Jeová deside ona atu harahun Siaun nia moru.+
Nia dada loos ona tali sukat nian.+
Nia la hanetik ninia liman atu harahun* buat barak.
No nia halo moru sira tanis.
Nia halo sira hotu sai fraku.
ט [Tet]
9 Portaun sira monu ona ba rai.+
Nia harahun no estraga ai-lolon sira neʼebé xave Siaun nia portaun.
Liurai no ulun-naʼin sira hela ona iha nasaun seluk nia leet.+
La iha ukun-fuan.* Ninia profeta sira mós la simu vizaun husi Jeová.+
י [Iod]
10 Siaun nia katuas sira tuur nonook deʼit iha rai.+
Sira soe rai-rahun ba sira-nia ulun no hatais hena karón.*+
Jeruzalein nia feto virjen sira hakruʼuk ho ulun ba rai.
כ [Kaf]
11 Haʼu-nia matan kole ona tanba hasai matan-been barak.+
Haʼu-nia laran* la hakmatek.
Haʼu-nia laran rahun* tanba haʼu-nia povu nia oan-feto* monu,+
Tanba labarik no bebé sira dezmaia iha sidade nia fatin públiku.+
ל [Lamed]
12 Sira dezmaia hanesan ema neʼebé kanek todan iha fatin públiku,
No sai fraku neineik-neineik iha sira-nia inan nia liman laran,
Sira husu beibeik sira-nia inan: “Ai-han no tua-uvas iha neʼebé?”+
מ [Mem]
13 Oh Jeruzalein nia oan-feto, saida mak haʼu bele hatudu ba ó nuʼudar sasin?*
Haʼu bele kompara ó ho saida?
Oh Siaun nia oan-feto virjen, haʼu bele kompara ó ho saida atu bele fó kmaan ba ó?
Tanba ó-nia kanek mak boot hanesan tasi.+ Sé mak bele kura ó?+
נ [Nun]
14 Vizaun sira neʼebé ó-nia profeta sira haree ona kona-ba ó mak la loos no folin-laek.+
Sira la hatudu sai ó-nia sala atu ó labele sai dadur,+
Maibé sira kontinua fó sai vizaun neʼebé la loos hodi bosok ó.+
ס [Samek]
15 Ema hotu neʼebé laʼo liu iha dalan basa liman hodi goza ó.+
Sira hakfuʼik atu goza+ no doko ulun ba Jeruzalein,* hodi dehan:
“Neʼe mak sidade neʼebé uluk ema dehan: ‘Sidade neʼe nia furak mak perfeitu loos, no halo ema iha mundu tomak haksolok’, loos ka lae?”+
פ [Pei]
16 Ó-nia inimigu hotu loke ibun hodi hatún ó.
Sira hakfuʼik no ruun nehan, hodi dehan: “Ita tolan ona nia.+
Neʼe mak loron neʼebé ita hein!+ Loron neʼe mai ona, no ita haree ona!”+
ע [Ain]
17 Jeová halo ona buat neʼebé nia hakarak.+ Nia kumpre ona ninia liafuan,+
Mandamentu neʼebé nia fó sai ona iha tempu uluk.+
Nia harahun ona ó hodi la hatudu laran-sadiʼa.+
Nia husik ó-nia inimigu sira sai kontente tanba manán ó. Nia aumenta sira-nia kbiit.*
צ [Sade]
18 Oh Siaun nia moru, povu nia laran halerik ba Jeová.
Husik ó-nia matan-been suli hanesan mota loron no kalan.
Ó labele deskansa, keta husik ó-nia matan deskansa.
ק [Kof]
19 Hamriik bá! Tanis makaʼas durante kalan tomak.
Fó sai buat hotu iha ó-nia laran iha Jeová nia oin hanesan fakar sai bee.
Foti saʼe ó-nia liman hodi harohan ba nia atu salva ó-nia oan sira,
Neʼebé dezmaia iha dalan sikun hotu tanba hamlaha boot.+
ר [Reix]
20 Oh Jeová, haree ba povu sira neʼebé Ita fó kastigu makaʼas.
Feto sira tenke han sira-nia oan rasik neʼebé sira partus ka?+
Ema tenke oho amlulik no profeta sira iha Jeová nia fatin sagradu ka?+
ש [Xin]
21 Labarik-mane no katuas sira mate no latan hela iha dalan sira.+
Haʼu-nia feto virjen* no mane joven sira mate ho surik.+
Iha Ita-nia loron hirus, Ita oho sira hodi la hatudu laran-sadiʼa.+
ת [Tau]
22 Ita bolu buat neʼebé halo haʼu taʼuk atu mai husi fatin hotu, hanesan bolu ema iha loron festa nian.+