Primeiru Krónikas

23 Bainhira David katuas loos ona no besik atu mate, nia foti ninia oan-mane Salomão nuʼudar liurai atu ukun Izraél.+ 2 Tuirmai nia halibur ulun-naʼin hotu iha Izraél, amlulik sira+ no ema Levi sira.+ 3 Nia sura ema Levi neʼebé tinan 30 ba leten,+ mane sira-neʼe hamutuk naʼin-38.000. 4 Husi ema Levi sira-neʼe, mane naʼin-24.000 halaʼo knaar atu tau matan ba serbisu iha Jeová nia uma, no naʼin-6.000 halaʼo knaar nuʼudar xefe no juís,+ 5 no naʼin-4.000 halaʼo knaar nuʼudar guarda neʼebé hein portaun,+ no naʼin-4.000 fó hahiʼi+ ba Jeová hodi toka instrumentu múzika. Kona-ba instrumentu sira-neʼe mak David dehan: “Haʼu halo instrumentu sira-neʼe atu fó hahiʼi ba Maromak.”

6 Tuirmai David organiza* sira ba grupu oioin+ hodi tuir númeru husi Levi nia oan-mane sira: Gerson, Kohat no Merari.+ 7 Gerson nia oan-mane sira mak Ladan no Simei. 8 Ladan nia oan-mane naʼin-tolu mak Jeiel neʼebé nuʼudar ulun-naʼin, tuirmai Zetam no Joel.+ 9 Simei* nia oan-mane naʼin-tolu mak Selomot, Haziel no Haran. Mane sira-neʼe mak ulun-naʼin ba Ladan nia umakain sira. 10 No Simei* nia oan-mane sira mak Jaat, Zina, Jeus no Berias. Mane naʼin-haat neʼe mak Simei nia oan-mane. 11 Jaat mak ulun-naʼin, no Zizá mak segundu. Maibé tanba Jeus no Berias la iha oan-mane barak, entaun ema sura sira hamutuk nuʼudar umakain ida deʼit no halaʼo knaar ida deʼit.

12 Kohat nia oan-mane naʼin-haat mak Amram, Izar,+ Hebron no Uziel.+ 13 Amram nia oan-mane sira mak Arão+ no Moisés.+ Maibé Maromak haketak Arão+ no ninia oan-mane sira ba nafatin atu serbí iha* Fatin Santu Liu Hotu, atu hasaʼe sakrifísiu iha Maromak Jeová nia oin, atu serbí Maromak, no atu nafatin haraik bensaun ba povu hodi Maromak nia naran.+ 14 Kona-ba Maromak loos nia atan Moisés nia oan-mane sira, ema sura hamutuk ho suku Levi. 15 Moisés nia oan-mane sira mak Gerson+ no Eliezer.+ 16 Sebuel+ mak ulun-naʼin ba Gerson nia oan-mane sira. 17 Reabias+ mak ulun-naʼin ba Eliezer nia jerasaun.* Eliezer la iha tan oan-mane seluk, maibé Reabias iha oan-mane barak. 18 Selomit+ mak ulun-naʼin ba Izar+ nia oan-mane sira. 19 Hebron nia oan-mane sira mak Jerias neʼebé serbí nuʼudar ulun-naʼin, segundu mak Amarias, terseiru mak Jaaziel, no haat mak Jekameam.+ 20 Uziel+ nia oan-mane sira mak Miqueias neʼebé serbí nuʼudar ulun-naʼin no segundu mak Isias.

21 Merari nia oan-mane sira mak Mali no Musi.+ Mali nia oan-mane sira mak Eleazar no Kis. 22 Eleazar mate, no nia la iha oan-mane ida, só oan-feto sira deʼit. Tan neʼe, sira-nia tiu Kis nia oan-mane sira hola sira nuʼudar feen. 23 Musi nia oan-mane naʼin-tolu mak Mali, Eder no Jeremot.

24 Neʼe mak Levi nia oan-mane sira tuir sira-nia umakain, no tuir ulun-naʼin ba sira-nia aman nia umakain. Sira-nia tinan mak 20 ba leten no sira-nia naran rejistu ona iha lista no sira halaʼo knaar iha Jeová nia uma. 25 Tanba David dehan ona: “Jeová, Izraél nia Maromak, halo ona ninia povu moris hakmatek,+ no nia sei hela iha Jeruzalein ba nafatin.+ 26 No mós ema Levi la presiza lori tan tenda santu ka lori sasán sira neʼebé uza ba adorasaun iha tenda neʼe.”+ 27 Hodi tuir David nia mandamentu ikus, sira sura Levi nia oan-mane sira neʼebé tinan 20 ba leten. 28 Ema Levi sira-neʼe nia knaar mak atu ajuda Arão nia oan-mane sira+ hodi halo serbisu iha Jeová nia uma, tau matan ba pátiu* sira,+ ba sala han-fatin sira, hamoos sasán santu sira hotu, no halo serbisu seluk iha Maromak loos nia uma. 29 Sira ajuda hodi prepara paun santu,+ trigu uut neʼebé diʼak atu hasaʼe nuʼudar sakrifísiu trigu nian, paun mihis neʼebé la iha fermentu,+ paun neʼebé tunu, trigu neʼebé kahur ho mina,+ no sira mós ajuda atu sukat buat hotu. 30 Dadeer no kalan sira tenke hamriik atu fó agradese no fó hahiʼi ba Jeová.+ 31 Sira ajuda bainhira amlulik hasaʼe sakrifísiu sunu nian ba Jeová iha loron Sábadu,+ fulan-foun,+ no durante tempu festa nian,+ hodi tuir ukun-fuan neʼebé hakerek ona kona-ba hasaʼe sakrifísiu, no sira halo nuneʼe beibeik iha Jeová nia oin. 32 Sira mós halaʼo sira-nia knaar atu tau matan ba tenda reuniaun nian, fatin santu, no ajuda sira-nia maun-alin sira, katak Arão nia oan-mane sira, hodi halo serbisu iha Jeová nia uma.