Primeiru Korinto

9 Haʼu laʼós ema livre ka? Haʼu laʼós apóstolu ida ka? Haʼu seidauk haree ita-nia Naʼi Jesus ka?+ Imi laʼós haʼu-nia serbisu iha Naʼi ka? 2 Se haʼu laʼós apóstolu ba ema seluk, haʼu apóstolu duni ba imi, tanba imi sai ona prova* neʼebé hatudu katak haʼu mak Naʼi nia apóstolu.

3 Ba sira neʼebé tesi-lia ba haʼu, haʼu defende haʼu-nia an hanesan tuirmai neʼe: 4 Ami iha direitu* atu han no hemu, loos ka lae? 5 Hanesan apóstolu sira seluk no Naʼi nia alin sira+ no Cefas,*+ ami mós iha direitu atu kaben ho feto neʼebé fiar-naʼin hodi bele akompaña ami,+ loos ka lae? 6 Haʼu no Barnabé+ deʼit mak la iha direitu atu la serbisu hodi buka moris ka? 7 Sé mak sai nuʼudar tropa hodi uza ninia osan rasik? Sé mak kuda uvas iha toʼos no la han ninia fuan?+ Ka sé mak sai nuʼudar bibi-atan no la hemu bibi nia susubeen balu?

8 Haʼu la koʼalia buat sira-neʼe tuir deʼit ema nia hanoin, loos ka lae? Ukun-Fuan mós koʼalia kona-ba buat sira-neʼe, loos ka lae? 9 Tanba Moisés nia Ukun-Fuan dehan: “Imi labele taka netik karau-aman nia ibun kuandu nia sama hela trigu-fulin.”+ Ida-neʼe katak Maromak hanoin deʼit kona-ba karau-aman ka? 10 Ka nia dehan nuneʼe ba ita-nia diʼak? Tuir loloos, ukun-fuan neʼe hakerek ba ita-nia diʼak, tanba ema neʼebé fila rai no ema neʼebé haketak trigu-musan* husi ninia kain, sira halo ida-neʼe ho esperansa atu bele simu trigu balu.

11 Se ami kuda ona iha imi-nia leet buat sira neʼebé mai husi Maromak, entaun sala ka lae atu ami simu sasán balu husi imi tuir ami-nia presiza?+ 12 Se ema seluk iha direitu atu simu buat ruma husi imi, ami iha direitu barak liután, loos ka lae? Maski nuneʼe, ami la aproveita direitu* neʼe,+ maibé ami tahan buat hotu, atu nuneʼe ami labele hanetik liafuan diʼak kona-ba Kristu.+ 13 Imi hatene ka lae katak mane sira neʼebé halaʼo knaar sagradu, sira mós han buat neʼebé iha templu? No sira neʼebé halaʼo knaar iha altár simu parte balu husi altár, loos ka lae?+ 14 Iha dalan hanesan neʼe mós, Naʼi haruka sira neʼebé fó sai liafuan diʼak atu moris husi liafuan diʼak neʼe.+

15 Maibé haʼu la aproveita buat sira-neʼe.+ Tuir loloos, haʼu hakerek ida-neʼe laʼós atu obriga imi hodi halo buat sira-neʼe ba haʼu, tanba diʼak liu haʼu mate deʼit duké husik ema halakon haʼu-nia razaun atu sente orgullu.+ 16 Tanba se haʼu fó sai liafuan diʼak, neʼe laʼós razaun ba haʼu atu gaba an, tanba haʼu tenke halo ida-neʼe. Tuir loloos, se haʼu la fó sai liafuan diʼak neʼe, susar boot mai haʼu!+ 17 Se haʼu fó sai liafuan diʼak ho laran-kontente, haʼu sei hetan kolen. Maibé se haʼu fó sai liafuan diʼak ho laran-todan, haʼu halo nafatin serbisu neʼe tanba Naʼi fó ona mai haʼu.+ 18 Entaun, haʼu-nia kolen mak saida? Katak bainhira haʼu fó sai liafuan diʼak, haʼu fó sai ida-neʼe hodi la simu osan, atu nuneʼe haʼu labele uza sala haʼu-nia direitu* nuʼudar haklaken-naʼin kona-ba liafuan diʼak.

19 Maski haʼu livre husi ema hotu, maibé haʼu halo haʼu-nia an nuʼudar atan ba ema hotu, atu nuneʼe haʼu bele manán ema barak liu. 20 Ba ema Judeu haʼu sai hanesan ema Judeu, atu nuneʼe haʼu bele manán ema Judeu.+ Ba sira neʼebé iha ukun-fuan nia okos haʼu sai hanesan ema neʼebé iha ukun-fuan nia okos, maski haʼu laʼós iha ukun-fuan nia okos, atu nuneʼe haʼu bele manán sira neʼebé iha ukun-fuan nia okos.+ 21 Ba ema neʼebé la iha ukun-fuan, haʼu mós sai hanesan ema neʼebé la iha ukun-fuan, maski ba Maromak haʼu iha ukun-fuan no haʼu iha Kristu nia ukun-fuan nia okos,+ atu nuneʼe, haʼu bele manán sira neʼebé la iha ukun-fuan. 22 Ba ema neʼebé fraku haʼu mós sai fraku, atu nuneʼe haʼu bele manán ema neʼebé fraku.+ Haʼu sai buat hotu ba ema oioin, atu nuneʼe liuhusi dalan oioin haʼu bele salva sira balu. 23 Maibé haʼu halo buat hotu tan liafuan diʼak, atu nuneʼe haʼu mós bele fahe ida-neʼe ba ema seluk.+

24 Imi la hatene ka? Sira neʼebé halai-taru, sira hotu halai atu manán, maibé ida deʼit mak simu prémiu. Halai bá atu imi bele manán prémiu.+ 25 Ema hotu neʼebé hola parte iha kompetisaun,* sira kontrola an iha buat hotu. Sira halo ida-neʼe atu bele hetan koroa neʼebé bele mohu,+ maibé ita atu simu koroa neʼebé labele mohu.+ 26 Tan neʼe, haʼu halai laʼós hanesan ema neʼebé la hatene atu bá neʼebé,+ no haʼu tuku laʼós hanesan tuku anin deʼit. 27 Haʼu kontrola* haʼu-nia isin+ no ukun haʼu-nia an hanesan atan, atu nuneʼe, kuandu haʼu haklaken tiha ba ema seluk, haʼu rasik la sai fali ema neʼebé Maromak la simu.*