Job
13 “Neʼe duni, haʼu-nia matan haree ona buat hotu neʼe,
Haʼu-nia tilun rona ona no komprende.
2 Buat neʼebé imi hatene, haʼu mós hatene,
Haʼu mós la beik liu fali imi.
3 Maski nuneʼe haʼu hakarak koʼalia ho Maromak neʼebé Kbiit Boot Liu Hotu,
Haʼu hakarak defende haʼu-nia kazu iha Maromak nia oin.+
4 Maibé imi hafoʼer haʼu-nia naran ho lia-bosok,
Imi hotu mak doutór neʼebé folin-laek.+
5 Se karik imi bele nonook deʼit,
Neʼe sei hatudu katak imi matenek.+
6 Favór ida, rona lai ba haʼu-nia razaun sira,
See tilun ba buat neʼebé haʼu hatoʼo husi haʼu-nia ibun.
7 Imi koʼalia buat la loos hodi apoia Maromak ka?
No imi koʼalia lia-bobar hodi apoia Maromak ka?
8 Imi todan ba sorin hodi apoia Maromak ka?
Imi koko atu defende Maromak loos iha kazu neʼe ka?
9 Se Maromak buka-hatene didiʼak kona-ba imi, neʼe sei lori buat diʼak ba imi ka lae?+
Imi bele lohi nia hanesan imi lohi ema ka?
10 Se imi ho subasubar koko atu todan ba sorin,+
Nia sei korrije kedas imi.
11 Ninia glória sei la halo imi nakdedar ka?
No imi sei la taʼuk ba nia ka?
12 Imi-nia lia-dadolin matenek sira mak hanesan ahi-kadesan deʼit,
Imi-nia liafuan sira fraku hanesan eskudu neʼebé halo husi rai-mean.
13 Imi nonook lai, atu nuneʼe haʼu bele koʼalia.
Tuirmai buat neʼebé sei akontese mai haʼu, husik ida-neʼe akontese bá!
14 Tanbasá mak haʼu tau haʼu-nia moris iha perigu laran?
Tanbasá mak haʼu fó an ba mate?
17 Rona didiʼak ba haʼu-nia liafuan,
See tilun ba buat neʼebé haʼu hatoʼo.
18 Haree, agora haʼu prepara ona haʼu-nia kazu,
Haʼu hatene duni katak haʼu mak loos.
19 Sé mak bele diskute malu ho haʼu?
Haʼu sei mate deʼit se haʼu nonook nafatin!*
20 Oh Maromak, buat rua deʼit mak haʼu husu,
Atu nuneʼe haʼu sei la subar an tan husi Ita:
21 Hasai Ita-nia liman neʼebé todan husi haʼu,
No keta kontinua halo haʼu taʼuk.+
22 Bolu haʼu bá no haʼu sei hatán,
Se lae, husik haʼu koʼalia no Ita hatán mai haʼu.
23 Sala saida mak haʼu halo?
Fó sai haʼu-nia sala sira mai haʼu.
25 Ita sei halo taʼuk ai-tahan neʼebé anin huu bá-mai ka?
Ita sei duni tuir duʼut-maran ka?
26 Tanba Ita hakerek nafatin liafuan todan hodi duun haʼu,
No Ita fó kastigu mai haʼu tanba haʼu-nia sala sira iha tempu joven.
27 Ita xave metin haʼu-nia ain,*
Ita buka-hatene haʼu-nia dalan hotu,
No Ita tau marka ba haʼu-nia ain-fatin ida-idak.