Isaias
17 Tuirmai neʼe mak liafuan kastigu nian kona-ba Damasku:+
“Haree bá! Damasku sei la sai tan sidade ida,
No Damasku sei sai fatin neʼebé rahun.+
2 Aroer nia sidade sira+ sei sai mamuk;
Sira sei sai fali fatin ba bibi-lubun atu deskansa,
No la iha ema ida mak halo sira taʼuk.
3 Efraim nia sidade sira neʼebé iha moru aas sei lakon,+
No Damasku nia ukun sei lakon.+
Kona-ba ema restu husi rai-Síria,
Sira-nia glória sei lakon hanesan ema Izraél nian”, Jeová neʼebé ukun tropa lalehan nian mak dehan.
4 “Iha loron neʼebá, Jacob nia glória sei sai menus,
No ninia isin bokur sei sai krekas.
5 Jacob sei sai hanesan toʼos iha Rai-Tetuk Refaim+
Neʼebé toʼos-naʼin koʼa hotu ona ninia trigu,
No husik hela trigu uitoan deʼit ba ema seluk.
6 Hanesan tempu neʼebé ema baku tiha ona ai-oliveira,
Sei hela deʼit buat restu atu halibur:
Hela deʼit oliveira-fuan tasak rua ka tolu iha sanak leten liu,
Hela deʼit oliveira-fuan haat ka lima iha ninia sanak sira”,+ Jeová, Izraél nia Maromak, mak dehan.
7 Iha loron neʼebá ema sei hateke ba ninia Kriadór, no ninia matan sei hateke ba Izraél nia Maromak neʼebé Santu. 8 Nia sei la hateke ba altár sira,+ katak buat neʼebé nia halo rasik,+ no nia mós sei la hateke ba ai-riin lulik sira* ka altár insensu nian neʼebé nia halo ho ninia liman.
9 Iha loron neʼebá, ninia sidade sira neʼebé metin sei sai hanesan fatin mamuk iha ai-laran,+
Sira sei sai rai-fuik
Hanesan ai-sanak ida neʼebé husik hela iha ema Izraél nia oin.
10 Tanba ó* haluha ona Maromak+ neʼebé salva ó;
Ó la hanoin-hetan ona Fatuk Boot+ ba ó-nia uma aas neʼebé seguru.
Tan neʼe mak ó halo jardín furak sira,
No kuda ai-oan husi rai seluk.*
11 Durante loron ó harii didiʼak lutu ba ó-nia ai-horis,
No iha dadeer fini komesa moris,
Maibé loron koʼa nian sei lakon iha tempu neʼebé ó sente moras tebes ho moras neʼebé labele kura.+
12 Rona bá! Povu barak halo barullu,
Sira la hakmatek hanesan tasi!
Nasaun sira sai runguranga,
No sira-nia lian boot hanesan tarutu husi laloran boot!
13 Nasaun sira sei halo lian hanesan tarutu husi laloran.
Nia sei korrije sira, no sira sei halai tiha,
Nia duni sira hanesan trigu-kulit neʼebé anin huu husi foho sira,
Hanesan ai-tarak sira neʼebé anin-fuik huu.
14 Kalan sei hamosu taʼuk.
Sira sei lakon mohu antes dadeer-saan.
Neʼe sei sai liman-rohan ba ema neʼebé hadau ita-nia sasán
No ba sira neʼebé foti ita-nia sasán.