Ezequiel

5 “Kona-ba ó, oan-mane husi ema, ó tenke foti surik kroʼat ida atu uza hanesan lámina. Koi ó-nia fuuk no hasarahun, tuirmai foti dasin hodi tetu ó-nia fuuk no hasarahun, no fahe ba parte tolu. 2 Ó tenke sunu parte ida iha sidade laran bainhira ó remata halo serku ba sidade neʼe.+ Tuirmai foti parte ida seluk no ataka ida-neʼe ho surik iha sidade* nia sorin-sorin,+ no parte ida ikus ó tenke soe namkari ba anin, no haʼu sei losu surik ida hodi duni tuir sira.+

3 “Ó mós tenke foti fuuk no hasarahun balu no falun neʼe iha ó-nia roupa.* 4 No ó tenke foti balu tan no soe neʼe ba ahi no sunu tiha. Husi neʼe mak ahi sei habelar ba umakain Izraél tomak.+

5 “Jeová, Naʼi Ukun-Naʼin Boot Liu, dehan nuneʼe: ‘Neʼe mak Jeruzalein. Haʼu tau ona sidade neʼe iha nasaun sira-nia leet, no rai oioin mak haleʼu nia. 6 Maibé nia kontra ona haʼu-nia lei no ukun-fuan sira, nia halo hahalok aat liu fali nasaun no rai hotu neʼebé haleʼu nia.+ Povu neʼe la simu ona haʼu-nia lei sira, no la halo tuir haʼu-nia ukun-fuan sira.’

7 “Tan neʼe, Jeová, Naʼi Ukun-Naʼin Boot Liu, dehan nuneʼe: ‘Imi halo hahalok aat liu fali nasaun hotu neʼebé haleʼu imi no la halo tuir haʼu-nia ukun-fuan no la kumpre haʼu-nia lei, maibé imi halo tuir fali lei husi nasaun hotu neʼebé haleʼu imi.+ 8 Entaun, Jeová, Naʼi Ukun-Naʼin Boot Liu, dehan nuneʼe: “Oh sidade, haʼu sei kontra ó,+ no haʼu rasik sei fó kastigu ba ó iha nasaun sira-nia oin.+ 9 Tanba hahalok aat hotu neʼebé ó halo beibeik ona, haʼu sei halo ba ó buat neʼebé uluk haʼu nunka halo no haʼu mós sei la halo fali.+

10 “‘“Entaun aman sira iha ó-nia leet sei han sira-nia oan,+ no oan sira sei han sira-nia aman. Haʼu sei tesi-lia iha ó-nia leet no halo namkari povu restu hotu ba fatin oioin.”’*+

11 “Jeová, Naʼi Ukun-Naʼin Boot Liu, dehan: ‘Haʼu jura hodi haʼu-nia moris rasik katak haʼu sei la simu ó,* tanba ó hafoʼer haʼu-nia fatin sagradu ho ó-nia estátua hotu neʼebé haʼu hakribi* no ho ó-nia hahalok aat hotu.+ Haʼu* sei la hanoin ó, no haʼu sei la hatudu laran-sadiʼa.+ 12 Haʼu sei fahe ó-nia ema ba grupu tolu. Grupu ida sei mate tanba moras-peste* ka lakon mohu tanba hamlaha boot iha ó-nia leet. Grupu seluk sei mate iha ó-nia sorin-sorin tanba surik.+ No grupu ikus haʼu sei halo namkari ba fatin oioin,* no haʼu sei losu surik ida hodi duni tuir sira.+ 13 Tuirmai haʼu sei la hirus tan, no haʼu sei hatún haʼu-nia hirus hasoru sira, no haʼu sei sente kontente.+ Bainhira haʼu hasai hotu ona haʼu-nia hirus hasoru sira, sira sei hatene duni katak haʼu, Jeová, mak koʼalia nuneʼe tanba haʼu hakarak ema atu adora haʼu mesak deʼit.+

14 “‘Haʼu sei halo ó sai fatin neʼebé rahun, no nasaun hotu neʼebé haleʼu ó no ema hotu neʼebé laʼo liu sei hatún ó.+ 15 Bainhira haʼu tesi-lia ba ó no kastigu ó ho haʼu-nia hirus no laran-nakali, ó sei sai buat neʼebé ema goza no hatún,+ no ezemplu ida atu fó avizu, no ó sei halo nasaun sira neʼebé haleʼu ó sai taʼuk. Haʼu, Jeová, mak fó sai ida-neʼe.

16 “‘Haʼu sei hamosu hamlaha boot atu oho imi hanesan rama-oan.+ Haʼu sei halo hamlaha boot neʼe sai aat liután hodi hamenus imi-nia ai-han.*+ 17 Haʼu sei hamosu hamlaha boot no haruka animál fuik ba imi,+ no sira sei halo imi-nia oan mate. Moras-peste no oho malu sei haleʼu imi, no haʼu sei lori surik atu ataka imi.+ Haʼu, Jeová, mak fó sai ida-neʼe.’”