Juís

19 Iha tempu neʼebá, la iha liurai ida iha Izraél.+ Ema Levi ida neʼebé hela iha fatin dook iha Efraim nia área foho nian,+ hola feen-kiʼik ida husi Belein+ iha rai-Judá. 2 Maibé ninia feen-kiʼik neʼe halo sala seksuál, no feto neʼe husik hela nia laʼen hodi bá fali ninia aman nia uma iha Belein iha rai-Judá. Feto neʼe hela iha neʼebá ba fulan haat. 3 Tuirmai ninia laʼen bá tuir hodi hamaus nia atu fila fali. Ninia laʼen lori ninia atan-mane no lori mós kuda-burru rua ho nia. Entaun feto neʼe lori nia laʼen ba ninia aman nia uma. Bainhira feto neʼe nia aman hasoru ninia laʼen, ninia aman sai kontente tebes. 4 Entaun ninia banin-mane, katak feto neʼe nia aman, hamaus nia atu hela loron tolu iha uma neʼe. Sira han-hemu, no nia hela kalan iha neʼebá.

5 Iha loron haat, bainhira sira hadeer sedu iha dadeer atu bá, feto joven neʼe nia aman hatete ba ninia mane-foun: “Han lai buat ruma atu fó forsa bá ó, no tuirmai ó bele bá.” 6 Entaun sira tuur, no sira naʼin-rua han-hemu hamutuk. Tuirmai feto joven neʼe nia aman hatete ba mane neʼe: “Favór ida, hela lai kalan neʼe no sai kontente bá.” 7 Bainhira mane neʼe hamriik atu bá, ninia banin-mane kontinua hamaus nia, entaun nia hela kalan ida tan iha neʼebá.

8 Iha loron lima, bainhira nia hadeer sedu iha dadeer atu bá, feto joven neʼe nia aman hatete: “Favór ida, han lai buat ruma atu fó forsa ba ó.” Sira nafatin demora toʼo lokraik, no sira naʼin-rua kontinua han. 9 Bainhira mane neʼe hamriik atu bá hamutuk ho ninia feen-kiʼik no ninia atan, ninia banin-mane, katak feto joven neʼe nia aman, hatete: “Agora besik kalan ona. Favór ida, hela lai kalan neʼe. Loron neʼe atu remata ona. Toba tan kalan neʼe no sai kontente bá. Aban imi bele hadeer sedu hodi halo imi-nia viajen no fila fali ba imi-nia uma.”* 10 Maibé, mane neʼe lakohi hela tan kalan ida, entaun nia hamriik no laʼo dook toʼo Jebus, katak Jeruzalein.+ Nia lori ninia feen-kiʼik, ninia atan no kuda-burru rua hamutuk ho nia.

11 Bainhira sira besik Jebus, rai besik nakukun ona. Entaun atan neʼe hatete ba nia naʼi: “Ita hakarak atu para iha ema Jebus nia sidade hodi bele toba iha neʼe ka lae?” 12 Maibé ninia naʼi hatete ba nia: “Ita labele para iha sidade ema estranjeiru nian neʼebé laʼós ema Izraél. Ita tenke kontinua laʼo toʼo Gibea.”+ 13 Tuirmai nia hatete ba ninia atan: “Mai ita koko atu bá sidade Gibea ka Ramá,+ no ita sei toba iha sidade sira-neʼe ida.” 14 Entaun sira kontinua laʼo, no loro-matan tun ona bainhira sira besik Gibea, ema Benjamim nia sidade.

15 Entaun sira para iha Gibea no tama atu toba iha neʼebá. Bainhira sira tama ona sidade laran, sira tuur iha sidade nia fatin públiku, maibé la iha ema ida mak konvida sira ba ninia uma hodi toba kalan neʼe.+ 16 Ikusmai iha kalan neʼe, katuas ida fila husi ninia serbisu iha toʼos no tama ba sidade. Nia husi Efraim nia área foho nian,+ no nia hela ona tempu balu iha Gibea, maibé ema sira iha sidade neʼe mak ema Benjamim.+ 17 Bainhira nia hateke no haree ema laʼo-rai neʼe iha sidade nia fatin públiku, katuas neʼe dehan: “Ó atu bá neʼebé? Ó mai husi neʼebé?” 18 Nia hatán: “Ami laʼo husi Belein iha Judá atu bá fatin dook iha Efraim nia área foho nian, no haʼu mai husi fatin neʼe. Haʼu foin bá Belein iha Judá,+ no agora haʼu atu bá Jeová nia uma,* maibé la iha ema ida mak konvida haʼu atu tama ba ninia uma. 19 Ami iha duʼut-maran no hahán seluk neʼebé natoon ba ami-nia kuda-burru sira,+ no ami mós iha paun+ no tua-uvas natoon ba haʼu, ba feto neʼe, no ba ami-nia atan. Ami la presiza buat ida.” 20 Maibé katuas neʼe hatete: “Sai haʼu-nia bainaka bá!* Husik haʼu tau matan ba buat hotu neʼebé imi presiza. Keta toba iha sidade nia fatin públiku.” 21 Entaun katuas neʼe lori sira tama ba nia uma no fó-han ba kuda-burru sira. Tuirmai sira fase sira-nia ain no han-hemu.

22 Nuʼudar sira kontente hela, mane aat balu husi sidade neʼe haleʼu uma no tuku makaʼas odamatan, no sira hatete fila-fila ba katuas uma-naʼin, hodi dehan: “Lori sai mane neʼebé mai ó-nia uma, atu nuneʼe ami bele halo relasaun seksuál ho nia.”+ 23 Ho ida-neʼe, uma-naʼin sai no hatete ba sira: “Lae, haʼu-nia maun-alin sira, favór ida, keta halo hahalok aat. Mane neʼe mak bainaka ida iha haʼu-nia uma. Keta halo hahalok aat neʼe. 24 Haʼu iha oan-feto virjen ida no iha mós mane neʼe nia feen-kiʼik. Husik haʼu lori sira sai, no imi bele estraga* sira tuir imi-nia hakarak.+ Maibé keta halo hahalok aat ba mane neʼe.”

25 Maibé mane sira-neʼe lakohi rona ba nia, entaun ema Levi neʼe kaer ninia feen-kiʼik+ no lori nia sai. Sira estraga feto neʼe no halo aat ba nia kalan tomak toʼo dadeer-saan nakukun. Tuirmai sira haruka nia bá. 26 Iha dadeer-saan, feto neʼe mai no monu iha katuas neʼe nia uma oin, katak uma neʼebé ninia naʼi hela bá, no feto neʼe latan iha neʼebá toʼo rai naroman. 27 Bainhira ninia naʼi hadeer iha dadeer no loke odamatan husi uma neʼe atu kontinua ninia viajen, nia haree feto neʼe, ninia feen-kiʼik, latan hela iha uma neʼe nia oin no ninia liman kona hela odamatan. 28 Entaun nia hatete ba feto neʼe: “Hadeer bá, mai ita bá ona.” Maibé la iha resposta ida. Tuirmai mane neʼe tau feto neʼe iha kuda-burru leten no laʼo fila ba ninia uma.

29 Bainhira nia toʼo iha ninia uma, nia foti tudik* no kaer ninia feen-kiʼik nia mate-isin no tesi nia isin ba pedasuk 12 no haruka ba área Izraél nian ida-idak. 30 Ema hotu neʼebé haree ida-neʼe dehan: “Buat ida hanesan neʼe nunka akontese no ema seidauk haree husi tempu neʼebé ema Izraél sai husi rai-Ejitu toʼo agora. Hanoin didiʼak kona-ba neʼe,* fó sai imi-nia hanoin,+ no fó-hatene ba ami saida mak ami tenke halo.”