Deuteronómio

14 “Imi mak Jeová, imi-nia Maromak, nia oan sira. Keta hakanek imi-nia isin+ ka koi imi-nia matan-fulun* tanba ema mate.+ 2 Tanba imi mak povu neʼebé santu+ ba Jeová, imi-nia Maromak, no Jeová hili ona imi atu sai ninia povu neʼebé espesiál* husi nasaun hotu iha mundu.+

3 “Imi labele han buat naran deʼit neʼebé foʼer.+ 4 Animál sira neʼebé imi bele han mak tuirmai neʼe:+ karau, bibi-malae, bibi-timur, 5 bibi-rusa, bibi-rusa gazela, bibi-rusa korsu, bibi-timur fuik, bibi-antílope, bibi-malae fuik no bibi foho nian. 6 Imi bele han animál hotu neʼebé ninia ain-kukun sakat ba rua no mós nata fali ai-han neʼebé nia tolan ona. 7 Imi labele han animál neʼebé nata fali ai-han neʼebé nia tolan ona maibé ain-kukun la sakat ba rua, hanesan tuirmai neʼe: kuda-kamelu, koellu, no koellu-hiraks, tanba sira nata fali ai-han maibé ain-kukun la sakat ba rua. Animál sira-neʼe la moos* ba imi.+ 8 No imi mós labele han fahi, tanba fahi sira-nia ain-kukun sakat ba rua maibé sira la nata fali ai-han neʼebé sira tolan ona. Neʼe la moos ba imi. Imi labele han animál sira-neʼe nia naʼan no mós labele kona sira-nia mate-isin.

9 “Husi buat hotu neʼebé moris iha bee laran, imi bele han buat tuirmai neʼe: Imi bele han ikan hotu neʼebé iha liras no kikit.+ 10 Maibé imi labele han ikan hotu neʼebé la iha liras no kikit. Neʼe la moos ba imi.

11 “Imi bele han manu hotu neʼebé moos.* 12 Maibé imi labele han manu sira tuirmai neʼe: manu-makikit, manu-makikit tasi, manu-abutre metan,+ 13 manu-makikit mean, manu-makikit metan, manu-makikit seluk ho modelu oioin, 14 manu-metan ho modelu oioin, 15 manu-avestrús, manu-kakuuk, manu-tasi, manu-falkaun ho modelu oioin, 16 manu-kakuuk kiʼik, manu-kakuuk tilun naruk, manu-sizne, 17 manu-pelikanu, manu-abutre, manu-tasi metan, 18 manu-segoña, manu-tasi garsa ho modelu oioin, manu-poupa no niki. 19 No mós insetu* hotu neʼebé iha liras mak la moos ba imi. Imi labele han ida-neʼe. 20 Imi bele han animál moos hotu neʼebé semo.

21 “Imi labele han animál neʼebé mate mesak deʼit.+ Imi bele fó ida-neʼe ba ema estranjeiru neʼebé hela iha imi-nia sidade laran,* no sira bele han ida-neʼe, ka imi bele faʼan ba ema estranjeiru. Tanba imi mak povu neʼebé santu ba Jeová, imi-nia Maromak.

“Imi labele daʼan bibi-timur oan iha ninia inan nia susubeen.+

22 “Tinan-tinan imi tenke fó porsentu sanulu husi buat hotu neʼebé imi hetan husi imi-nia toʼos.+ 23 Imi sei han porsentu sanulu husi imi-nia trigu,* tua-uvas foun no mina, imi-nia karau no bibi nia oan primeiru. Imi sei han neʼe iha Jeová, imi-nia Maromak, nia oin iha fatin neʼebé nia hili atu lori ninia naran,+ atu nuneʼe imi bele aprende atu sempre hamtaʼuk Jeová, imi-nia Maromak.+

24 “Se fatin neʼebé Jeová, imi-nia Maromak, sei hili ba ninia naran mak dook liu ba imi atu halo viajen,+ no tanba Jeová, imi-nia Maromak, haraik ona bensaun barak ba imi toʼo imi la iha kbiit atu lori buat sira-neʼe ba neʼebá, 25 entaun imi bele faʼan tiha buat sira-neʼe, no lori osan iha imi-nia liman, no halo viajen ba fatin neʼebé Jeová, imi-nia Maromak, sei hili. 26 Imi bele uza osan neʼe atu sosa buat naran deʼit neʼebé imi hakarak, hanesan karau, bibi-malae, bibi-timur, tua-uvas no tua sira seluk, no buat naran deʼit neʼebé imi gosta. Imi no imi-nia umakain sei han buat sira-neʼe iha Jeová, imi-nia Maromak, nia oin iha fatin neʼe no haksolok.+ 27 No imi labele haluha ema Levi neʼebé hela iha imi-nia sidade laran,+ tanba sira la hetan parte ka liman-rohan hanesan imi.+

28 “Kada tinan tolu nia rohan, imi tenke lori porsentu sanulu hotu husi buat neʼebé imi hetan iha tinan neʼe no tau ida-neʼe iha imi-nia sidade laran.+ 29 Tuirmai ema Levi neʼebé la hetan parte ka liman-rohan hanesan imi, ema estranjeiru, oan-kiak* no feto-faluk sira iha imi-nia sidade sei mai no han toʼo bosu,+ atu nuneʼe Jeová, imi-nia Maromak, bele haraik bensaun ba buat hotu neʼebé imi halo.+