Deuteronómio
8 “Imi tenke halo tuir ho didiʼak mandamentu hotu neʼebé haʼu fó ba imi ohin, atu nuneʼe imi bele kontinua moris,+ sai barak no tama hodi foti rai neʼebé Jeová jura ona ba imi-nia beiʼala sira.+ 2 Hanoin-hetan dalan dook neʼebé Jeová, imi-nia Maromak, halo imi laʼo durante tinan 40 neʼe nia laran iha rai-fuik;+ nia halo nuneʼe hodi treinu imi atu sai haraik an no koko imi+ hodi hatene saida mak iha imi-nia laran,+ no atu hatene se imi sei halo tuir ninia mandamentu ka lae. 3 Entaun nia treinu imi hodi sai haraik an no husik imi sai hamlaha+ no fó maná ba imi atu han,+ neʼe mak ai-han neʼebé imi seidauk hatene no imi-nia beiʼala sira mós seidauk hatene; nia halo nuneʼe atu imi hatene katak ema labele moris deʼit ho paun,* maibé moris ho liafuan hotu neʼebé sai husi Jeová nia ibun.+ 4 Durante tinan 40 neʼe imi-nia roupa neʼebé imi uza la sai bosan no imi-nia ain mós la bubu.+ 5 Imi rasik mós hatene didiʼak iha imi-nia laran katak hanesan aman ida korrije ninia oan-mane, Jeová, imi-nia Maromak, mós korrije imi.+
6 “Agora imi tenke halo tuir Jeová, imi-nia Maromak, nia mandamentu sira hodi laʼo tuir ninia dalan sira no hodi hamtaʼuk nia. 7 Tanba Jeová, imi-nia Maromak, sei lori imi tama ba rai neʼebé diʼak,+ rai neʼebé iha mota* barak no bee-matan sira neʼebé suli iha rai-tetuk no iha área foho nian, 8 rai neʼebé iha trigu no sevada,* uvas-hun, ai-figeira no romaun sira,+ rai neʼebé iha mina-oliveira no bani-been,+ 9 rai neʼebé ai-han la sai menus no imi sei la falta buat ida, rai neʼebé iha besi iha ninia fatuk sira no husi ninia foho sira mak imi sei keʼe riti.
10 “Bainhira imi han no sai bosu tiha, imi tenke hahiʼi Jeová, imi-nia Maromak, tanba rai diʼak neʼebé nia fó ona ba imi.+ 11 Kuidadu bá atu imi la haluha Jeová, imi-nia Maromak, hodi la halo tuir tan ninia mandamentu, ukun-fuan no lei sira neʼebé haʼu fó sai ba imi ohin. 12 Bainhira imi han no sai bosu tiha no imi harii uma diʼak sira no hela ona iha laran,+ 13 bainhira imi-nia karau no bibi sira sai barak no imi-nia osan-mutin no osan-mean aumenta, no imi hetan sasán barak, 14 keta husik imi-nia laran sai foti an+ hodi halo imi haluha Jeová, imi-nia Maromak, ida neʼebé lori imi sai husi rai-Ejitu, husi uma atan nian,+ 15 ida neʼebé lori imi laʼo liu rai-fuik neʼebé luan no hamosu taʼuk,+ neʼebé iha samea venenu no sakunar, no rai-maran neʼebé la iha bee. Nia halo bee suli sai ba imi husi fatuk boot neʼebé toos,*+ 16 no iha rai-fuik nia fó maná ba imi atu han,+ no neʼe mak ai-han neʼebé imi-nia beiʼala sira seidauk hatene; nia halo nuneʼe atu treinu imi hodi sai haraik an+ no koko imi hodi imi bele hetan buat diʼak iha futuru.+ 17 Se imi hanoin iha imi-nia laran: ‘Ho haʼu-nia kbiit rasik no ho haʼu-nia liman nia forsa mak haʼu hetan rikusoin neʼe ba haʼu-nia an’,+ 18 hanoin-hetan bá katak Jeová, imi-nia Maromak, mak fó ba imi kbiit atu buka rikusoin,+ hodi halo tuir ninia aliansa neʼebé nia jura ona ba imi-nia beiʼala sira, hanesan nia halo toʼo ohin loron.+
19 “Se karik imi haluha Jeová, imi-nia Maromak, no laʼo tuir fali maromak sira seluk hodi serbí sira no hakruʼuk ba sira, agora haʼu fó avizu ba imi katak imi sei mate duni.+ 20 Hanesan nasaun sira neʼebé Jeová halakon daudaun iha imi-nia oin, iha dalan neʼebé hanesan mak imi mós sei lakon, tanba imi la rona ba Jeová, imi-nia Maromak, nia lian.+