Ezequiel
24 Iha loron sanulu fulan-sanulu tinan sia,* Jeová koʼalia tan mai haʼu: 2 “Oan-mane husi ema, hakerek data ba loron neʼe. Iha loron neʼe, liurai Babilónia komesa ona atu ataka Jeruzalein.+ 3 Konta lia-dadolin* kona-ba umakain neʼebé kontradór, no koʼalia kona-ba sira:
“‘Jeová, Naʼi Ukun-Naʼin Boot Liu, dehan nuneʼe:
“Hatuur sanan boot iha ahi no tau bee ba laran.+
4 Hatama naʼan pedasuk sira neʼebé diʼak liu,+
Naʼan kelen, no naʼan-isin iha kabaas. Halo nakonu sanan neʼe ho naʼan ruin sira neʼebé diʼak liu.
5 Hili bibi-malae neʼebé diʼak liu,+ no tau ai haleʼu iha sanan okos.
Daʼan naʼan-bibi neʼe no mós naʼan ruin sira iha sanan laran.”’
6 “Tan neʼe, Jeová, Naʼi Ukun-Naʼin Boot Liu, dehan nuneʼe:
‘Susar ba sidade neʼebé fakar ema nia raan,+ sidade neʼebé hanesan sanan ferrujen, no ninia ferrujen seidauk hasai!
Hasai naʼan pedasuk ida-idak husi sanan neʼe.+ Keta dada sorteiu* ba naʼan sira-neʼe.
7 Raan sei iha sidade neʼe nia laran.+ Sidade neʼe fakar sai raan iha fatuk-belar leten.
Nia la fakar raan ba rai hodi taka ho rai-rahun.+
8 Haʼu tau sidade neʼe nia raan iha fatuk-belar leten neʼebé nabilan
Atu nuneʼe, ema sira-neʼe nia raan labele taka tiha,
Atu bele hamosu haʼu-nia hirus hodi fó kastigu.’+
9 “Tan neʼe, Jeová, Naʼi Ukun-Naʼin Boot Liu, dehan nuneʼe:
‘Susar ba sidade neʼebé fakar ema nia raan!+
Haʼu sei butuk aas ai sira.
10 Butuk ai sira no halakan ahi,
Daʼan naʼan toʼo tasak didiʼak, fakar sai ninia been, no husik naʼan ruin sai motuk.
11 Hatuur sanan mamuk iha ahi-klaak leten hodi halo manas
Atu nuneʼe sanan riti neʼe sai manas loos toʼo mean.
Ninia foʼer sira sei nabeen iha sanan neʼe nia laran,+ no ferrujen sei lakon tiha.
12 Ema tenke serbisu makaʼas toʼo sai kole,
Tanba ferrujen neʼe barak loos no susar atu hasai.+
Soe sanan neʼe ba ahi hamutuk ho ninia ferrujen!’
13 “‘Ó* sai la moos tanba ó-nia hahalok foʼer.+ Haʼu koko atu hamoos ó, maibé ó la sai moos husi ó-nia hahalok foʼer sira. Ó sei la sai moos toʼo haʼu-nia hirus lakon husi ó.+ 14 Haʼu, Jeová, mak fó sai liafuan sira-neʼe. Neʼe sei akontese duni. Haʼu sei la dada an, la hanoin no la sente triste ba ó.+ Sira sei tesi-lia ba ó tuir ó-nia dalan sira no ó-nia hahalok sira’, Jeová, Naʼi Ukun-Naʼin Boot Liu, mak dehan.”
15 Jeová koʼalia tan mai haʼu, hodi dehan: 16 “Oan-mane husi ema, ho tuku dala ida deʼit mak haʼu sei halakon ema neʼebé ó hadomi liu.+ Ó keta sai triste,* no keta tanis ka husik ó-nia matan-been tun. 17 Halerik iha ó-nia laran deʼit, no keta lelir hanesan lelir ba ema mate.+ Kesi turbante* iha ó-nia ulun,+ no uza ó-nia sandálias.+ Keta taka netik ó-nia ibun,*+ no keta han paun neʼebé ema lori ba ó.”+
18 Haʼu koʼalia ba povu sira iha dadeer, no iha kalan haʼu-nia feen mate. Iha dadeer tuirmai, haʼu halo tuir mandamentu neʼebé haʼu simu. 19 Povu dehan ba haʼu: “Fó sai ba ami, buat sira neʼebé ó halo neʼe katak sá? Oinsá mak neʼe kona ami?” 20 Haʼu hatán ba sira: “Jeová dehan ona ba haʼu: 21 ‘Hatete ba umakain Izraél: “Jeová, Naʼi Ukun-Naʼin Boot Liu, dehan nuneʼe: ‘Lakleur tan haʼu sei hafoʼer haʼu-nia fatin sagradu,+ neʼebé halo imi sente orgullu tebes, neʼebé imi hafolin no imi-nia laran gosta. Imi-nia oan-mane no oan-feto sira neʼebé imi husik hela iha sidade neʼe sei mate ho surik.+ 22 Tuirmai imi sei halo buat neʼebé haʼu halo ona. Imi sei la taka netik imi-nia ibun,* no imi sei la han paun neʼebé ema lori ba imi.+ 23 Imi sei la hasai turbante husi imi-nia ulun no sandálias husi imi-nia ain. Imi sei la triste ka tanis. Imi sei sai dodok tanba imi-nia sala sira,+ no imi sei halerik ba malu. 24 Ezequiel sai ona nuʼudar sinál ba imi.+ Imi sei halo tuir buat neʼebé nia halo ona. Bainhira susar akontese, imi sei hatene duni katak haʼu mak Jeová, Naʼi Ukun-Naʼin Boot Liu.’”’”
25 “Oan-mane husi ema, iha loron neʼebé haʼu sobu tiha sira-nia uma aas neʼebé seguru, katak buat kmanek neʼebé halo sira orgullu, hafolin no gosta, haʼu mós sei hasai sira-nia oan-mane no oan-feto,+ 26 no ema ida sei halai sai husi neʼebá hodi mai fó-hatene ba ó.+ 27 Iha loron neʼebá, ó sei loke ó-nia ibun no koʼalia ba ema neʼebé halai sai, no ó sei la monok tan.+ Ó sei sai nuʼudar sinál ba sira, nuneʼe sira sei hatene duni katak haʼu mak Jeová.”