Deuteronómio

27 Tuirmai Moisés hamutuk ho Izraél nia katuas sira fó mandamentu ba povu, hodi dehan: “Halo tuir mandamentu hotu neʼebé haʼu fó ba imi ohin. 2 No iha loron neʼebé imi hakur Mota Jordaun hodi tama ba rai neʼebé Jeová, imi-nia Maromak, sei fó ba imi, imi tenke hada fatuk boot sira no reboka* ida-neʼe.+ 3 Tuirmai imi tenke hakerek liafuan hotu husi Ukun-Fuan neʼe iha fatuk sira-neʼe bainhira imi hakur tiha mota neʼe, atu bele tama ba rai neʼebé Jeová, imi-nia Maromak, sei fó ba imi, rai neʼebé iha susubeen no bani-been barak, hodi tuir buat neʼebé Jeová, imi-nia beiʼala nia Maromak, promete ona ba imi.+ 4 No bainhira imi hakur tiha Mota Jordaun, imi tenke hada fatuk sira-neʼe iha Foho Ebal+ no reboka* neʼe, hodi halo tuir mandamentu neʼebé haʼu fó ba imi ohin. 5 Iha neʼebá mós imi tenke harii altár ida husi fatuk ba Jeová, imi-nia Maromak. No imi labele fera fatuk sira-neʼe ho besi.+ 6 Imi tenke uza fatuk sira neʼebé tomak hodi halo altár ba Jeová, imi-nia Maromak, no hasaʼe sakrifísiu sunu nian ba Jeová, imi-nia Maromak, iha altár neʼe nia leten. 7 Imi tenke hasaʼe sakrifísiu dame nian+ no han iha neʼebá,+ no imi sei haksolok iha Jeová, imi-nia Maromak, nia oin.+ 8 No imi tenke hakerek ho klaru liafuan hotu husi Ukun-Fuan neʼe iha fatuk sira-neʼe.”+

9 Tuirmai Moisés no amlulik Levi sira koʼalia ba ema Izraél hotu, dehan: “Oh ema Izraél, nonook no rona bá. Ohin imi sai ona povu ba Jeová, imi-nia Maromak.+ 10 Imi tenke rona ba Jeová, imi-nia Maromak, nia liafuan no halo tuir ninia mandamentu+ no ninia ukun-fuan sira, neʼebé haʼu fó sai ba imi ohin.”

11 Iha loron neʼebá Moisés fó mandamentu ba povu neʼe, hodi dehan: 12 “Bainhira imi hakur tiha Mota Jordaun, suku sira tuirmai neʼe sei hamriik iha Foho Gerizim+ atu fó sai bensaun ba povu sira: Simeão, Levi, Judá, Issacar, José no Benjamim. 13 No suku sira tuirmai neʼe sei hamriik iha Foho Ebal+ atu fó sai malisan: Ruben, Gad, Aser, Zebulão, Dan no Naftali. 14 No ema Levi tenke koʼalia ba ema Izraél hotu ho lian makaʼas, dehan:+

15 “‘Malisan ba ema neʼebé bahat estátua+ ka halo estátua husi besi,+ buat neʼebé Jeová hakribi,+ neʼebé badaen sira halo ho sira-nia liman, no malisan ba ema neʼebé subar ida-neʼe.’ No povu hotu tenke hatán: ‘Amen!’*

16 “‘Malisan ba ema neʼebé hatudu hahalok aat hodi la respeitu ninia aman ka inan.’+ No povu hotu tenke hatán: ‘Amen!’

17 “‘Malisan ba ema neʼebé muda marka ba baliza husi ninia maluk nia rai.’+ No povu hotu tenke hatán: ‘Amen!’

18 “‘Malisan ba ema neʼebé halo ema matan-delek laʼo sala dalan.’+ No povu hotu tenke hatán: ‘Amen!’

19 “‘Malisan ba ema neʼebé bobar lia-loos bainhira tesi-lia+ ba ema estranjeiru, oan-kiak,* ka feto-faluk.’+ No povu hotu tenke hatán: ‘Amen!’

20 “‘Malisan ba ema neʼebé toba* ho ninia aman nia feen, tanba nia hamoe ona ninia aman.’*+ No povu hotu tenke hatán: ‘Amen!’

21 “‘Malisan ba ema neʼebé toba* ho animál.’+ No povu hotu tenke hatán: ‘Amen!’

22 “‘Malisan ba ema neʼebé toba* ho ninia feton, maski ho ninia aman nia oan-feto ka ninia inan nia oan-feto.’+ No povu hotu tenke hatán: ‘Amen!’

23 “‘Malisan ba ema neʼebé toba* ho ninia banin-feto.’+ No povu hotu tenke hatán: ‘Amen!’

24 “‘Malisan ba ema neʼebé hein subasubar atu ataka no oho ninia maluk.’+ No povu hotu tenke hatán: ‘Amen!’

25 “‘Malisan ba ema neʼebé simu prezente atu oho* ema* neʼebé la halo sala.’+ No povu hotu tenke hatán: ‘Amen!’

26 “‘Malisan ba ema neʼebé la kaer metin ba Ukun-Fuan neʼe hodi la halo tuir ninia liafuan sira.’+ No povu hotu tenke hatán: ‘Amen!’