Deuteronómio

19 “Bainhira Jeová, imi-nia Maromak, halakon nasaun sira, no Jeová, imi-nia Maromak, fó sira-nia rai ba imi, no imi hasai tiha sira no hela ona iha sira-nia sidade no sira-nia uma,+ 2 imi tenke haketak sidade tolu iha imi-nia rai neʼebé Jeová, imi-nia Maromak, sei fó ba imi nuʼudar imi-nian.+ 3 Imi tenke fahe rai neʼe ba parte tolu, katak rai neʼebé Jeová, imi-nia Maromak, fó ba imi nuʼudar imi-nian, no imi tenke prepara dalan sira atu nuneʼe ema neʼebé oho ema seluk bele halai ba sidade sira-neʼe.

4 “Neʼe mak buat neʼebé imi tenke halo ba ema neʼebé oho ema seluk no halai ba fatin sira-neʼe atu nia bele kontinua moris: Bainhira nia hakanek ninia maluk la ho neon no uluk nia mós la odi ninia maluk neʼe;+ 5 porezemplu, bainhira nia ho ninia maluk ida bá ai-laran atu hili ai no nia hiʼit saʼe baliu hodi fera ai, maibé baliu ulun semo sai no kona ninia maluk neʼe no ninia maluk mate, entaun ida neʼebé oho ninia maluk neʼe tenke halai ba sidade sira-neʼe ida atu bele moris.+ 6 Maibé se dalan ba sidade neʼe mak dook liu, família husi ema neʼebé mate*+ karik bele duni tuir nia ho hirus makaʼas no toman nia no oho nia.* Maibé tuir loloos, nia la merese atu mate, tanba uluk nia la odi ninia maluk.+ 7 Tan neʼe mak haʼu haruka imi: ‘Imi tenke haketak sidade tolu.’

8 “Se Jeová, imi-nia Maromak, haluan imi-nia rai hodi tuir buat neʼebé nia jura ona ba imi-nia beiʼala sira,+ no se nia entrega ona ba imi rai hotu neʼebé nia promete atu fó ba imi-nia beiʼala sira,+ 9 tanba imi ho laran-metin halo tuir ninia mandamentu hotu neʼebé haʼu fó sai ba imi ohin, atu hadomi Jeová, imi-nia Maromak, no sempre laʼo iha ninia dalan sira,+ se nuneʼe imi tenke aumenta sidade tolu tan ba sidade tolu neʼe.+ 10 Atu nuneʼe ema laran-moos nia raan sei la fakar+ iha imi-nia rai neʼebé Jeová, imi-nia Maromak, sei fó ba imi nuʼudar liman-rohan, no imi sei la hetan sala kona-ba raan.+

11 “Maibé se mane ida rai odi ba ninia maluk+ no nia hein subasubar hodi ataka ninia maluk neʼe no baku nia* toʼo mate, no mane neʼe halai ba sidade sira-neʼe ida, 12 entaun katuas sira husi ninia sidade tenke bolu nia sai husi neʼebá no entrega nia ba família husi ema neʼebé mate neʼe,* no nia tenke mate.+ 13 Imi* labele hanoin nia, no imi tenke hamoos tiha sala kona-ba ema laran-moos nia raan husi Izraél nia leet,+ atu nuneʼe buat hotu bele sai diʼak ba imi.

14 “Bainhira imi simu imi-nia liman-rohan iha rai neʼebé Jeová, imi-nia Maromak, sei fó ba imi atu hela bá, imi labele muda marka ba baliza+ husi imi-nia maluk nia rai neʼebé imi-nia beiʼala sira tau ona.

15 “Imi labele duun katak ema ida sala ka halo hahalok aat ruma ho liafuan husi sasin ida deʼit.+ Maibé liuhusi sasin naʼin-rua ka tolu nia liafuan* mak kazu ida bele sai metin.+ 16 Se sasin-naʼin neʼebé laran-aat fó sasin kontra ema ida hodi duun katak nia halo sala ruma,+ 17 sira naʼin-rua tenke hamriik iha Jeová nia oin, iha amlulik no juís sira neʼebé serbí iha tempu neʼebá nia oin.+ 18 Juís sei buka-hatene didiʼak kazu neʼe,+ no se ema neʼebé fó sasin neʼe mak koʼalia bosok, no nia hasaʼe lia-bosok hasoru ninia maluk, 19 imi tenke halo ba nia hanesan nia planu ona atu halo ba ninia maluk,+ no imi tenke hasai tiha buat neʼebé aat husi imi-nia leet.+ 20 Atu nuneʼe ema seluk neʼebé rona kona-ba neʼe sei sai taʼuk, no sira sei nunka halo tan buat aat hanesan neʼe iha imi-nia leet.+ 21 Imi* labele hanoin nia:+ Moris troka moris, matan troka matan, nehan troka nehan, liman troka liman, ain troka ain.+