Isaias
18 Susar ba rai neʼebé nakonu ho lian husi insetu sira*
Iha área neʼebé besik mota sira iha Etiópia!+
2 Rai neʼe haruka ema sira lori lia-menon liuhusi tasi,
Sira hakur tasi ho ró husi duʼut-papiru, hodi dehan:
“Imi neʼebé lori lia-menon, bá, halai lalais,
Bá hasoru nasaun neʼebé ninia ema sira ain-aas no isin kabeer,
Bá hasoru povu neʼebé halo ema iha fatin hotu taʼuk,+
Bá hasoru nasaun neʼebé forte no manán funu,
Nasaun neʼebé mota sira sobu tiha ninia rai.”
3 Oh ema hotu neʼebé hela iha rai neʼe, no ema neʼebé hela iha mundu tomak,
Buat neʼebé imi sei haree mak hanesan sinál* neʼebé tau ona iha foho sira,
No imi sei rona lian hanesan ema huu dikur.
4 Tanba Jeová dehan nuneʼe ba haʼu:
“Haʼu sei hakmatek nafatin no hateke ba* haʼu-nia fatin neʼebé metin ona,
Neʼe sei sai hanesan manas no naroman husi loro-matan,
Hanesan mahobeen neʼebé tun durante rai-manas iha tempu koʼa nian.
5 Antes tempu koʼa nian,
Bainhira uvas-hun la iha funan ona no ninia fuan sira atu tasak ona,
Ema tesi tiha ninia dikin sira ho sabit
No hasai tiha ninia talin neʼebé nani.
6 Sira-nia mate-isin hotu sei husik ba manu-makikit sira husi foho
No ba animál sira iha rai.
Manu-makikit sira sei han sira-nia mate-isin durante tempu manas,
No animál hotu iha rai sei han sira-nia mate-isin durante tempu koʼa nian.
7 Iha tempu neʼebá ema sei lori prezente ba Jeová neʼebé ukun tropa lalehan nian,
Husi nasaun neʼebé ninia ema sira ain-aas no isin kabeer,
Husi povu neʼebé halo ema iha fatin hotu taʼuk,
Husi nasaun neʼebé forte no manán funu,
Nasaun neʼebé mota sira sobu tiha ninia rai.
Sira sei lori prezente neʼe ba Foho Siaun, katak fatin neʼebé lori Jeová neʼebé ukun tropa lalehan nian nia naran.”+