Primeiru Korinto

7 Kona-ba buat sira neʼebé imi hakerek ona ba haʼu, diʼak ba mane ida atu la kona* feto ida. 2 Maibé tanba ema barak halo sala seksuál,* diʼak atu mane ida-idak iha feen rasik+ no feto ida-idak iha laʼen rasik.+ 3 Laʼen tenke fó ba ninia feen buat neʼebé ninia feen iha direitu atu simu,* no feen mós tenke halo hanesan neʼe ba ninia laʼen.+ 4 Feen la ukun ninia isin rasik maibé ninia laʼen mak ukun. Nuneʼe mós, laʼen la ukun ninia isin rasik, maibé ninia feen mak ukun. 5 Keta hanetik imi-nia kaben nia direitu;* maibé se imi konkorda ona, imi bele para ba tempu balu atu nuneʼe imi bele uza tempu hodi harohan, no tuirmai imi bele hamutuk fali, hodi nuneʼe Satanás labele kontinua atu tenta imi tanba imi ladún kontrola an. 6 Maibé, haʼu koʼalia liafuan sira-neʼe nuʼudar matadalan ba imi, laʼós nuʼudar ukun-fuan. 7 Maibé, haʼu hakarak atu ema hotu klosan hanesan haʼu. Maski nuneʼe, ema ida-idak simu ninia prezente rasik+ husi Maromak, ema ida iha dalan neʼe, ida fali iha dalan seluk.

8 Agora haʼu koʼalia ba sira neʼebé la kaben no ba faluk sira, katak diʼak liu ba sira atu nafatin moris hanesan haʼu.+ 9 Maibé se sira labele kontrola an, sira bele kaben, tanba diʼak liu atu kaben duké sai lakan ho hakarak seksuál nian.+

10 Ba kaben-naʼin sira, haʼu fó matadalan tuirmai neʼe, laʼós husi haʼu maibé husi Naʼi, katak feen labele haketak an husi ninia laʼen.+ 11 Maibé se nia haketak an, nia tenke mesak nafatin ka hadame malu fali ho ninia laʼen. No laʼen ida labele husik ninia feen.+

12 Maibé ba sira seluk haʼu dehan, sin husi haʼu, laʼós husi Naʼi:+ Se maun-alin ida iha feen neʼebé laʼós fiar-naʼin, no ninia feen kontente atu nafatin moris ho nia, nia labele husik ninia feen. 13 No se feto ida iha laʼen neʼebé laʼós fiar-naʼin, no ninia laʼen kontente atu nafatin moris ho nia, nia labele husik ninia laʼen. 14 Tanba laʼen neʼebé laʼós fiar-naʼin sai santu* iha Maromak nia oin tanba ninia feen, no feen neʼebé laʼós fiar-naʼin sai santu iha Maromak nia oin tanba ninia laʼen neʼebé fiar-naʼin. Se lae karik, imi-nia oan sira sei sai la moos, maibé agora sira santu ona. 15 Maibé se kaben-naʼin ida neʼebé laʼós fiar-naʼin hili atu haketak an,* husik nia bá. Iha situasaun neʼe, fiar-naʼin neʼe la presiza atu hela ho ninia kaben, maibé Maromak bolu ona imi ba dame.+ 16 Feen sira, oinsá mak imi hatene katak imi labele salva imi-nia laʼen?+ Ka, laʼen sira, oinsá mak imi hatene katak imi labele salva imi-nia feen?

17 Maski nuneʼe, diʼak atu ema ida-idak moris tuir buat neʼebé Jeová* fó ona ba nia hodi tuir situasaun neʼebé iha ona kuandu Maromak bolu nia atu sai fiar-naʼin.+ Tan neʼe mak haʼu fó mandamentu neʼe ba kongregasaun hotu. 18 Iha mane ruma neʼebé simu ona sirkunsizaun* bainhira nia sai fiar-naʼin ka lae?+ Diʼak atu nia nafatin moris tuir ninia situasaun neʼe. Iha mane ruma neʼebé la hetan sirkunsizaun bainhira nia sai fiar-naʼin ka lae? Nia lalika hetan sirkunsizaun.+ 19 Hetan sirkunsizaun la iha folin, no la hetan sirkunsizaun mós la iha folin,+ maibé halo tuir Maromak nia mandamentu sira mak iha folin.+ 20 Iha situasaun moris neʼebé Maromak bolu ema ida-idak, diʼak ba nia atu nafatin moris tuir situasaun neʼe.+ 21 Se Maromak bolu ó bainhira ó sei moris nuʼudar atan, keta hanoin demais kona-ba ida-neʼe.+ Maibé se ó bele sai livre, kaer metin ba oportunidade neʼe. 22 Tanba ema neʼebé Maromak bolu atu sai Naʼi nia dixípulu bainhira nia sei atan hela, nia sai ema neʼebé livre ona nuʼudar Naʼi nian.+ Nuneʼe mós ema neʼebé Maromak bolu atu sai dixípulu kuandu nia mak ema livre, nia sai atan ba Kristu. 23 Maromak sosa imi ho folin neʼebé karun;+ keta sai atan tan ba ema. 24 Entaun maun-alin sira, iha situasaun moris neʼebé Maromak bolu ema ida-idak, diʼak atu nia nafatin moris tuir situasaun hanesan neʼe iha Maromak nia oin.

25 Kona-ba virjen sira,* haʼu la iha ukun-fuan husi Naʼi, maibé haʼu fó sai haʼu-nia hanoin+ nuʼudar ema neʼebé laran-metin, tanba hetan ona laran-sadiʼa husi Naʼi. 26 Haʼu hanoin katak diʼak liu atu mane ida kontinua moris hanesan nia moris daudaun tanba agora mak tempu susar. 27 Se ó kesi metin ona ba feen ida, keta koko atu sai livre.+ Ó sai livre ona husi feen ida ka? Keta buka tan feen. 28 Maibé se ó kaben karik, ó la halo sala ida. No se virjen ida kaben, nia la halo sala ida. Maski nuneʼe, sira neʼebé kaben sei hetan susar iha sira-nia moris.* Maibé haʼu lakohi imi hasoru susar hanesan neʼe.

29 Liután neʼe, haʼu dehan ida-neʼe ba imi, maun-alin sira, katak tempu hela uitoan deʼit ona.+ Hahú husi ohin ba oin, diʼak atu sira neʼebé iha feen moris hanesan sira la iha feen, 30 no sira neʼebé tanis, moris hanesan sira neʼebé la tanis, no sira neʼebé haksolok, moris hanesan sira neʼebé la haksolok, no sira neʼebé sosa sasán, moris hanesan sira neʼebé la iha sasán, 31 no sira neʼebé uza mundu neʼe, moris hanesan sira neʼebé la aproveita tomak mundu neʼe, tanba situasaun iha mundu neʼe troka daudaun. 32 Tuir loloos, haʼu hakarak atu imi livre husi laran-taridu. Ema neʼebé la kaben hanoin liu kona-ba buat neʼebé Naʼi nian, kona-ba oinsá Naʼi bele simu nia. 33 Maibé ema neʼebé kaben ona hanoin liu kona-ba buat sira iha mundu neʼe,+ kona-ba oinsá atu halo ninia feen kontente, 34 no ninia hanoin fahe ba rua. Liután neʼe, feto neʼebé la kaben no feto virjen, hanoin liu kona-ba buat neʼebé Naʼi nian,+ atu nuneʼe nia bele sai santu iha isin no neon.* Maibé feto neʼebé kaben ona hanoin liu kona-ba buat sira iha mundu neʼe, kona-ba oinsá atu halo ninia laʼen kontente. 35 Haʼu koʼalia nuneʼe ba imi-nia diʼak, laʼós atu hanetik* imi, maibé atu book imi hodi halo buat neʼebé diʼak no kontinua serbí deʼit Naʼi hodi la fahe imi-nia hanoin.

36 Maibé se ema ruma liu ona tempu foin-saʼe nian, no nia hanoin katak nia labele kontrola ninia hakarak seksuál nian,* entaun nia bele kaben se neʼe mak ninia hakarak. Nia la halo sala ida.+ 37 Maibé se ema ida deside ona iha ninia laran no kaer metin ba ninia desizaun neʼe, no sente katak nia la presiza kaben,* no nia bele kontrola ninia hakarak, neʼe mak desizaun neʼebé diʼak ba nia.+ 38 Nuneʼe mós, ema neʼebé kaben* halo desizaun neʼebé diʼak, maibé ema neʼebé la kaben halo desizaun neʼebé diʼak liután.+

39 Feen ida kesi metin ba ninia laʼen kuandu ninia laʼen sei moris hela.+ Maibé se ninia laʼen mate,* nia livre atu kaben fali ho ema neʼebé nia hakarak, naran katak iha Naʼi.*+ 40 Maibé tuir haʼu-nia hanoin, nia sei kontente liu se nia la kaben fali. Haʼu hanoin duni katak haʼu mós iha Maromak nia espíritu.