Primeiru Korinto

16 Kona-ba halibur osan ba ema santu* sira,+ imi bele halo tuir matadalan neʼebé haʼu fó ona ba kongregasaun sira iha Galásia. 2 Iha loron primeiru semana-semana, imi ida-idak tenke tau ketak buat ruma tuir imi-nia kbiit, atu nuneʼe la presiza halibur tan osan kuandu haʼu toʼo neʼebá. 3 Maibé kuandu haʼu toʼo neʼebá, haʼu sei haruka mane sira neʼebé imi hili no temi ona iha imi-nia karta,+ atu sira lori imi-nia prezente neʼebé imi fó ho laran-diʼak hodi bá Jeruzalein. 4 Maibé se haʼu mós presiza bá Jeruzalein, sira sei bá neʼebá hamutuk ho haʼu.

5 Maibé kuandu haʼu laʼo tiha liuhusi Masedónia haʼu sei bá vizita imi, tanba haʼu sei bá Masedónia.+ 6 Karik haʼu sei hela tempu uitoan ho imi, ka hela durante tempu malirin, atu nuneʼe imi bele lori haʼu toʼo dalan klaran bainhira haʼu laʼo ba fatin neʼebé haʼu sei bá. 7 Haʼu lakohi hasoru imi lalais deʼit bainhira haʼu laʼo liu imi-nia fatin, tanba haʼu hakarak atu hela hamutuk ho imi+ ba tempu balu se neʼe tuir Jeová* nia hakarak. 8 Maibé haʼu sei hela iha Éfeso+ toʼo Festa Pentekostes* nian, 9 tanba Maromak loke tiha ona odamatan boot mai haʼu,+ atu haʼu bele halo serbisu barak liután, maibé iha inimigu barak neʼebé kontra.

10 Se Timóteo+ toʼo ona, apoia nia bá atu nuneʼe nia la sai taʼuk kuandu nia iha imi-nia leet, tanba nia halo Jeová*+ nia serbisu hanesan haʼu mós halo. 11 Tan neʼe, ema ida labele haree nia la vale. Husik nia fila ho dame, atu nuneʼe nia bele mai toʼo haʼu, tanba haʼu no mós maun-alin sira hein hela nia.

12 Kona-ba Apolo,+ ita-nia maluk, haʼu husu namanas ona ba nia atu laʼo hamutuk ho maun-alin sira kuandu sira vizita imi. Maski nuneʼe agora nia lakohi laʼo ba imi, maibé kuandu nia iha tempu nia sei bá vizita imi.

13 Matan-moris nafatin bá,+ kaer metin ba imi-nia fiar,+ sai aten-brani bá,*+ sai forte liután.+ 14 Halo buat hotu ho domin.+

15 Imi hatene katak Estéfanas nia umakain mak dixípulu primeiru* iha Akaia no katak sira fó sira-nia an atu serbí ema santu sira. Neʼe duni haʼu husu imi maun-alin sira: 16 Diʼak atu imi mós kontinua hakruʼuk ba ema hanesan neʼe no ba sira hotu neʼebé serbisu hamutuk ho ita no serbisu makaʼas.+ 17 Haʼu haksolok tanba Estéfanas,+ Fortunato no Akaiko mai iha neʼe, tanba maski imi la iha neʼe, maibé sira bele taka imi-nia fatin. 18 Tanba sira fó kmaan ba haʼu* no mós ba imi. Tan neʼe, hafolin ema sira hanesan neʼe.

19 Kongregasaun sira iha Ázia haruka kumprimentus ba imi. Áquila no Prisca* no mós kongregasaun neʼebé iha sira-nia uma+ haruka kumprimentus ba imi ho laran iha Naʼi. 20 Maun-alin hotu kumprimenta imi. Kumprimenta malu bá ho reʼi.*

21 Haʼu, Paulo, mak hakerek kumprimentus neʼe ho haʼu-nia liman rasik.

22 Se ema ruma la hadomi Naʼi, husik nia hetan malisan. Oh ita-nia Naʼi, mai. 23 Haʼu harohan katak Naʼi Jesus nia laran-diʼak neʼebé boot hela ho imi. 24 Haʼu-nia domin hela ho imi hotu neʼebé ida deʼit ho Kristu Jesus.