Segundu Korinto
2 Haʼu deside ona katak haʼu sei la halo tan imi triste iha haʼu-nia vizita tuirmai. 2 Se haʼu halo imi hotu triste, sé mak halo haʼu sente haksolok? Só sira neʼebé haʼu halo triste mak fó ksolok ba haʼu, loos ka lae? 3 Kona-ba buat neʼebé haʼu hakerek uluk, haʼu hakerek neʼe atu haʼu la sai triste kuandu haʼu vizita imi, tanba haʼu lakohi sai triste kona-ba imi, maibé haʼu tenkesér haksolok kona-ba imi. Haʼu iha konfiansa katak buat neʼebé fó ksolok ba haʼu fó ksolok mós ba imi hotu. 4 Tanba ho terus barak no laran-triste mak haʼu hakerek ba imi ho matan-been barak, laʼós atu halo imi triste,+ maibé atu imi hatene haʼu-nia domin boot ba imi.
5 Se ema ida halo imi triste,+ ema neʼe halo triste laʼós haʼu maibé imi hotu. Haʼu lakohi koʼalia makaʼas liu kona-ba neʼe. 6 Kastigu neʼebé imi barak fó ba mane neʼe mak natoon ona ba nia. 7 Agora imi tenke fó perdua ba nia ho laran-diʼak no fó kmaan ba nia,+ atu nuneʼe nia labele mout tanba triste demais.*+ 8 Tan neʼe, haʼu husu imi atu hatudu sai imi-nia domin ba nia.+ 9 Tan razaun neʼe mak haʼu hakerek ba imi: atu hatene se imi sei fó prova katak imi halo tuir iha buat hotu ka lae. 10 Se imi fó perdua ba ema ruma kona-ba buat naran deʼit, haʼu mós sei perdua nia. Tuir loloos, se iha sala ruma atu haʼu fó perdua, kuandu haʼu fó ona perdua, ida-neʼe ba imi-nia diʼak iha Kristu nia oin, 11 atu nuneʼe Satanás labele kaer toman* ita,+ tanba ita hatene ninia lasu* sira.+
12 Uluk kuandu haʼu toʼo Tróade+ atu fó sai liafuan diʼak kona-ba Kristu, iha odamatan ida loke mai haʼu iha Naʼi. 13 Iha momentu neʼebá, haʼu-nia laran* sente la hakmatek tanba haʼu la hetan haʼu-nia maluk Tito,+ tan neʼe haʼu fó adeus ba sira no haʼu bá Masedónia.+
14 Maibé obrigadu ba Maromak neʼebé lori ita hodi marxa hamutuk ho Kristu, hanesan tropa neʼebé marxa fila bainhira sira manán ona funu. Maromak nia koñesimentu neʼebé hanesan buat morin habelar ba fatin hotu liuhusi ita. 15 Ba Maromak, ita neʼebé haklaken kona-ba Kristu mak hanesan buat morin. No buat morin neʼe toʼo ba sira neʼebé atu hetan salvasaun, no mós ba sira neʼebé sei lakon. 16 Ba sira neʼebé sei lakon, morin* neʼe lori ba mate,+ no ba sira neʼebé sei hetan salvasaun, morin neʼe sei lori ba moris. No sé mak kumpre kritéria atu bele halo serbisu sira-neʼe? 17 Ita mak kumpre kritéria, tanba ita la faʼan* Maromak nia liafuan+ hanesan ema barak halo, maibé nuʼudar ema neʼebé Maromak haruka, ita koʼalia ho laran-moos hamutuk ho Kristu iha Maromak nia oin.