Isaias
58 “Hakilar ho lian makaʼas; keta dada an!
Hasai ó-nia lian hanesan dikur nia lian.
Fó sai ba haʼu-nia povu kona-ba sira-nia hahalok kontra,+
Fó sai ba umakain Jacob kona-ba sira-nia sala.
2 Loroloron sira buka haʼu,
Sira fó sai katak sira haksolok tanba hatene haʼu-nia dalan sira,
Hanesan sira mak nasaun neʼebé hatudu hahalok loos,
Sira husu haʼu atu tesi-lia ho loloos,
Hanesan sira kontente atu hakbesik ba Maromak.+
3 Agora sira husu: ‘Tanbasá mak Ita la haree bainhira ami halo jejún?+
Tanbasá mak Ita la haree bainhira ami hatudu katak ami triste?’*+
Tanba iha loron neʼebé imi halo jejún, imi buka imi-nia hakarak rasik,*
No imi hanehan imi-nia serbisu-naʼin.+
4 Imi remata imi-nia jejún ho haksesuk malu no baku malu,
No ho laran-aat mak imi baku ema ho imi-nia liman.
Imi labele halo jejún hanesan agora no hanoin katak haʼu rona imi-nia lian iha lalehan.
5 Jejún neʼebé halo haʼu kontente mak hanesan neʼe ka?
Neʼe mak loron ba ó atu hatudu katak ó triste,*
Atu hakruʼuk hanesan duʼut naruk
No atu halo kama husi hena karón* no ahi-kadesan ka?
Neʼe mak buat neʼebé ó bolu jejún no bolu nuʼudar loron neʼebé halo Jeová kontente ka?
6 Lae. Jejún neʼebé halo haʼu kontente mak tuirmai neʼe:
Atu hasai tiha korrente neʼebé halo ho laran-aat,
Atu kore ai-leba nia talin,+
Atu husik livre sira neʼebé ema hanehan,+
No atu halo tohar ba rua ai-leba hotu neʼebé uza atu lori naha;
7 Atu fahe ó-nia paun ba ema neʼebé hamlaha,+
Atu lori ema kiak no ema neʼebé la iha uma hodi tama ba ó-nia uma,
Atu fó roupa ba ema neʼebé isin-tanan bainhira ó haree nia,+
No atu la fila kotuk ba ó-nia maluk rasik.
8 Ho ida-neʼe mak ó-nia naroman sei nabilan hanesan rai naroman,+
No ó-nia kanek sei sai diʼak lalais.
Ó-nia hahalok loos sei laʼo iha ó-nia oin,
No Jeová nia glória sei proteje ó iha ó-nia kotuk.+
9 Tuirmai bainhira ó bolu, Jeová sei hatán.
Bainhira ó halerik hodi husu ajuda, nia sei dehan: ‘Haʼu mak neʼe!’
Se ó hasai tiha ai-leba neʼebé uza atu lori naha husi ó-nia leet
No la hatudu tan liman no la koʼalia aat ema seluk,+
10 Se ó fó buat neʼebé ó rasik gosta ba ema neʼebé hamlaha+
No halo kontente ema neʼebé hetan terus,
Entaun ó-nia naroman sei nabilan maski iha nakukun laran,
No ó-nia nakukun sei sai naroman hanesan meiudia.+
11 Jeová sei nafatin dirije ó
No halo ó kontente maski iha rai neʼebé maran-dekor;+
Nia sei fó forsa fali ba ó-nia ruin sira,
No ó sei sai hanesan jardín neʼebé rega ho bee barak,+
Hanesan bee-matan neʼebé sempre iha bee.
12 Tanba ó mak ema sei harii fali sidade antigu neʼebé rahun ona,+
No ó sei harii fali uma nia fundasaun neʼebé rahun ona ba jerasaun barak.+
Ema sei bolu ó nuʼudar badaen neʼebé hadiʼa fali moru sira neʼebé aat ona,*+
Badaen neʼebé hadiʼa fali dalan boot no hela-fatin.
13 Se ó halaʼo haʼu-nia loron Sábadu no la halo tuir deʼit ó-nia hakarak* iha haʼu-nia loron santu+
No se ó bolu loron Sábadu nuʼudar loron ksolok boot nian, loron santu ba Jeová, loron neʼebé tenke hafolin,+
No se ó hafolin loron neʼe duké buka ó-nia hakarak rasik no la koʼalia liafuan naranaran deʼit,
14 Entaun ó sei hetan ksolok boot tanba Jeová,
No haʼu sei halo ó domina rai nia fatin aas sira.+
Haʼu sei halo ó han ai-han husi ó-nia beiʼala Jacob nia liman-rohan,+
Tanba Jeová nia ibun mak fó sai ona ida-neʼe.”