Primeiru Krónikas
15 David kontinua harii uma sira ba ninia an rasik iha David nia Sidade. Nia mós prepara fatin ida ba Maromak loos nia Arka no harii tenda ida hodi tau Arka neʼe.+ 2 Depois neʼe mak David hatete: “Ema ida labele lori Maromak loos nia Arka só ema Levi deʼit, tanba Jeová hili ona sira atu lori Jeová nia Arka no atu nafatin serbí nia.”+ 3 Tuirmai David halibur ema Izraél hotu iha Jeruzalein hodi lori Jeová nia Arka ba fatin neʼebé nia prepara ona.+
4 David halibur Arão nia bei-oan sira+ no mós ema Levi+ hanesan tuirmai neʼe: 5 Husi Kohat nia família mak xefe Uriel hamutuk ho ninia maun-alin naʼin-120; 6 husi Merari nia família mak xefe Asaias+ hamutuk ho ninia maun-alin naʼin-220; 7 husi Gerson nia família mak xefe Joel+ hamutuk ho ninia maun-alin naʼin-130; 8 husi Elizafan+ nia bei-oan sira mak xefe Semaias hamutuk ho ninia maun-alin naʼin-200; 9 husi Hebron nia bei-oan sira mak xefe Eliel hamutuk ho ninia maun-alin naʼin-80; 10 no husi Uziel+ nia bei-oan sira mak xefe Aminadab hamutuk ho ninia maun-alin naʼin-112. 11 Liután neʼe, David mós bolu amlulik Zadoc+ no Abiatar+ no mós ema Levi sira tuirmai neʼe: Uriel, Asaias, Joel, Semaias, Eliel no Aminadab. 12 David dehan ba sira: “Imi mak ulun-naʼin ba imi-nia aman nia umakain husi suku Levi. Imi no imi-nia maun-alin sira tenke halo santu* imi-nia an, no lori Jeová, Izraél nia Maromak, nia Arka ba fatin neʼebé haʼu prepara ona. 13 Uluk ba dala primeiru laʼós imi mak hulan Arka neʼe,+ entaun Jeová, ita-nia Maromak, sai hirus tebes hasoru ita,+ tanba ita la buka-hatene matadalan kona-ba oinsá atu lori Arka neʼe.”+ 14 Ho ida-neʼe, amlulik no ema Levi sira halo sira-nia an santu atu lori Jeová, Izraél nia Maromak nia Arka.
15 Tuirmai, ema Levi sira hulan Maromak loos nia Arka iha sira-nia kabaas hodi uza ai-loos sira,+ hodi tuir Jeová nia mandamentu neʼebé fó sai ona liuhusi Moisés. 16 Tuirmai David hatete ba ema Levi nia xefe sira atu hili sira-nia maun-alin kantadór sira atu kanta ho haksolok, hodi akompaña ho instrumentu múzika nian hanesan instrumentu neʼebé iha talin, arpa+ no simbala.+
17 Entaun ema Levi hili mane sira husi sira-nia suku, sira hili Joel nia oan-mane Heman,+ Berekias nia oan-mane Asaf,+ no Kusaias nia oan-mane Etan+ husi umakain Merari. 18 Sira-nia maun-alin husi grupu segundu+ neʼebé hamutuk ho sira mak Zacarias, Ben, Jaziel, Semiramot, Jeiel, Uni, Eliab, Benaias, Maseias, Matitias, Elifeleu, Mikneias, no mós Obed-Edom ho Jeiel neʼebé serbí nuʼudar guarda neʼebé hein portaun. 19 Kantadór sira mak Heman,+ Asaf+ no Etan, sira mak baku simbala neʼebé halo husi riti;+ 20 Zacarias, Aziel, Semiramot, Jeiel, Uni, Eliab, Maseias no Benaias, sira mak toka instrumentu neʼebé iha talin no afina ona ba lian Alamot;*+ 21 no Matitias,+ Elifeleu, Mikneias, Obed-Edom, Jeiel no Azazias, sira mak toka arpa neʼebé afina ona ba lian Seminit,*+ sira mak dirije múzika. 22 Kenanias+ neʼebé serbí nuʼudar xefe ba ema Levi, nia mak tau matan ba ema neʼebé lori Arka, tanba nia iha ona esperiénsia. 23 Berekias no Elkana mak guarda ba Arka. 24 Amlulik sira mak Sebanias, Josafat, Netanel, Amasai, Zacarias, Benaias no Eliezer, no sira huu trombeta ho lian makaʼas iha Maromak loos nia Arka oin,+ no Obed-Edom ho Jeias mós guarda ba Arka.
25 Tuirmai David no Izraél nia katuas sira ho xefe sira ba tropa naʼin-1.000 laʼo tuir atu lori Jeová nia Arka Aliansa nian husi Obed-Edom+ nia uma ho haksolok.+ 26 Ema Levi hasaʼe karau-aman hitu no bibi-malae aman hitu nuʼudar sakrifísiu+ tanba Maromak loos ajuda sira atu lori Jeová nia Arka Aliansa nian. 27 David hatais roupa neʼebé la iha liman neʼebé halo husi hena diʼak, hanesan mós ho ema Levi hotu neʼebé lori Arka, kantadór sira, no mós Kenanias neʼebé nuʼudar xefe ba ema sira neʼebé lori Arka no xefe ba kantadór sira. David mós hatais efod* neʼebé halo husi hena-liñu.+ 28 Ema Izraél hotu lori Jeová nia Arka Aliansa nian ho lian haklalak haksolok nian,+ ho lian husi dikur, trombeta,+ simbala, lian boot husi instrumentu neʼebé iha talin no arpa.+
29 Maibé bainhira Jeová nia Arka Aliansa nian toʼo iha David nia Sidade,+ Saul nia oan-feto Mical+ hateke tun liuhusi janela no haree Liurai David haksoit bá-mai hodi selebra loron neʼe, no Mical komesa hakribi David iha ninia laran.+