Ezequiel
30 Jeová koʼalia tan ba haʼu, hodi dehan: 2 “Oan-mane husi ema, fó sai profesia bá, hodi dehan: ‘Jeová, Naʼi Ukun-Naʼin Boot Liu, dehan nuneʼe:
“Imi tanis bá, hodi hatete: ‘Susar boot ba ami, tanba loron neʼe mai daudaun!’
3 Loron neʼe besik ona, sin, Jeová nia loron besik ona.+
Loron neʼe sei iha kalohan metan,+ loron neʼe mak tempu neʼebé deside nanis ona atu tesi-lia ba nasaun sira.+
4 Surik ida sei mai ataka rai-Ejitu, no Etiópia sei sai taʼuk bainhira ema barak mate iha rai-Ejitu.
Ema sei foti rai-Ejitu nia rikusoin no sobu rai neʼe nia hun.+
5 Etiópia,+ Put,+ Lud, ema hotu husi nasaun sira seluk,
No Kube, hamutuk ho oan-mane sira husi rai neʼebé halo ona aliansa,*
Sira hotu sei mate ho surik.”’
6 Jeová dehan nuneʼe:
‘Ema neʼebé apoia rai-Ejitu mós sei mate,
No Ejitu nia kbiit neʼebé halo nia foti an sei lakon.’+
“Jeová, Naʼi Ukun-Naʼin Boot Liu, dehan: ‘Ema hotu sei mate ho surik iha rai neʼe husi Migdol+ toʼo Siene.+ 7 Rai-Ejitu sei sai mamuk no fuik liu rai sira seluk, no ninia sidade sira sei sai fuik liu sidade sira seluk.+ 8 Bainhira haʼu sunu ahi iha rai-Ejitu no halo rahun ninia belun sira hotu, sira sei hatene duni katak haʼu mak Jeová. 9 Iha loron neʼebá, haʼu sei haruka ema saʼe ró atu lori mensajen hodi halo taʼuk ema Etiópia neʼebé fiar an, no sira sei sai taʼuk iha loron neʼebé rai-Ejitu hetan kastigu, tanba neʼe sei akontese duni.’
10 “Jeová, Naʼi Ukun-Naʼin Boot Liu, dehan nuneʼe: ‘Haʼu sei halakon ema-lubun boot husi Ejitu liuhusi Liurai Nabukodonozór* husi Babilónia nia liman.+ 11 Haʼu sei lori Liurai Nabukodonozór no ninia tropa neʼebé laran-aat liu nasaun hotu+ atu halakon rai neʼe. Sira sei losu sira-nia surik hodi kontra rai-Ejitu no halo nakonu rai neʼe ho ema nia mate-isin.+ 12 Haʼu sei halo Nilo nia mota kiʼik sira+ sai maran no faʼan rai neʼe ba ema aat sira. Haʼu sei uza ema estranjeiru sira atu halo rai neʼe mamuk no halakon buat hotu.+ Haʼu, Jeová, mak fó sai liafuan sira-neʼe.’
13 “Jeová, Naʼi Ukun-Naʼin Boot Liu, dehan nuneʼe: ‘Haʼu mós sei halakon estátua sira neʼebé haʼu hakribi* no halakon maromak folin-laek sira husi Nof.*+ No sei la iha tan ulun-naʼin* ida iha rai-Ejitu. Haʼu sei halo ema iha rai-Ejitu sai taʼuk.+ 14 Haʼu sei harahun Patros+ no sunu ahi iha Zoan no tesi-lia ba sidade Nó.*+ 15 Haʼu sei fakar sai haʼu-nia hirus ba sidade Sim, rai-Ejitu nia fatin seguru, no halakon ema iha sidade Nó. 16 Haʼu sei sunu rai-Ejitu. Sidade Sim sei sai taʼuk no inimigu sei tama sidade Nó, no inimigu sei ataka Nof* durante loron! 17 Mane joven husi On* no Pibeset sei mate ho surik, no ema iha sidade sira-neʼe sei sai dadur. 18 Loron sei sai nakukun iha Tafnes bainhira haʼu halo tohar rai-Ejitu nia ai-leba iha fatin neʼe.+ Ninia* kbiit neʼebé halo nia foti an sei la iha tan,+ kalohan sei taka nia, no ninia ema iha knua sira sei sai dadur.+ 19 Haʼu sei tesi-lia ba rai-Ejitu, nuneʼe sira sei hatene duni katak haʼu mak Jeová.’”
20 Iha loron hitu fulan-primeiru tinan 11,* Jeová koʼalia tan mai haʼu, hodi dehan: 21 “Oan-mane husi ema, haʼu halo tohar ona Faraó, liurai Ejitu, nia liman. Ninia kanek neʼe sei la falun tiha hodi bele sai diʼak ka la bobar ho ligadura hodi bele iha forsa atu kaer surik.”
22 “Tan neʼe Jeová, Naʼi Ukun-Naʼin Boot Liu, dehan nuneʼe: ‘Haʼu sei kontra Faraó, liurai Ejitu,+ no haʼu sei halo tohar ninia liman rua, liman neʼebé forte no liman neʼebé tohar ona,+ no haʼu sei halo surik monu sai husi ninia liman.+ 23 Tuirmai haʼu sei halo ema Ejitu namkari ba nasaun no rai oioin.+ 24 Haʼu sei fó forsa ba liurai Babilónia+ nia liman* no tau haʼu-nia surik ba ninia liman,+ no haʼu sei halo tohar Faraó nia liman, no iha ninia oin* mak Faraó sei halerik makaʼas hanesan mane neʼebé atu mate ona. 25 Haʼu sei fó forsa ba liurai Babilónia nia liman, maibé Faraó nia liman sei la iha forsa. Bainhira haʼu tau haʼu-nia surik ba liurai Babilónia nia liman no nia uza surik neʼe hodi kontra rai-Ejitu,+ sira sei hatene duni katak haʼu mak Jeová. 26 Haʼu sei halo ema Ejitu namkari ba nasaun no rai oioin,+ nuneʼe sira sei hatene duni katak haʼu mak Jeová.’”