Ezequiel
35 Jeová koʼalia tan mai haʼu, hodi dehan: 2 “Oan-mane husi ema, fila oin ba área foho nian iha Seir,+ no fó sai profesia bá hodi kontra Seir.+ 3 Hatete ba nia: ‘Jeová, Naʼi Ukun-Naʼin Boot Liu, dehan nuneʼe: “Oh área foho nian iha Seir, haʼu sei kontra ó, no haʼu sei lolo liman hasoru ó hodi halo ó-nia rai sai fatin neʼebé rahun no mamuk.+ 4 Haʼu sei halo ó-nia sidade sira sai rahun, no ó sei sai fatin neʼebé rahun no mamuk.+ Nuneʼe ó sei hatene duni katak haʼu mak Jeová. 5 Tanba ó odi ema Izraél ba tempu kleur,+ no ó entrega sira ba surik iha tempu neʼebé dezastre kona sira, iha tempu neʼebé sira hetan kastigu ikus.”’+
6 “Jeová, Naʼi Ukun-Naʼin Boot Liu, dehan: ‘Tan neʼe, haʼu jura hodi haʼu-nia moris rasik katak haʼu sei prepara ó atu ema oho, no mate sei duni tuir ó.*+ Tanba ó odi ema nia raan neʼebé ó fakar ona, entaun mate sei duni tuir ó.+ 7 Haʼu sei halo área foho nian iha Seir sai fatin neʼebé rahun no mamuk,+ no haʼu sei oho tiha ema neʼebé laʼo liu fatin neʼe no ema neʼebé fila fali mai. 8 Haʼu sei halo nakonu ó-nia foho sira ho ema nia mate-isin; no ema sei mate ho surik iha ó-nia foho-oan sira, iha ó-nia foho-leet sira, no iha ó-nia mota hotu. 9 Haʼu sei halo ó sai fatin neʼebé rahun ba nafatin, no ema sei la hela tan iha ó-nia sidade sira.+ Nuneʼe imi sei hatene duni katak haʼu mak Jeová.’
10 “Maski haʼu, Jeová, mak iha neʼebá, maibé ó dehan: ‘Nasaun rua neʼe no rai rua neʼe sei sai haʼu-nian, no haʼu sei foti fatin sira-neʼe nuʼudar haʼu-nian.’+ 11 Tan neʼe, Jeová, Naʼi Ukun-Naʼin Boot Liu, dehan: ‘Haʼu jura hodi haʼu-nia moris rasik. Haʼu sei halo ba ó tuir ó-nia hirus no ó-nia laran-moras no ó-nia odi neʼebé ó hatudu ona ba sira.+ Bainhira haʼu tesi-lia ba ó, haʼu sei halo sira hatene kona-ba haʼu. 12 Tuirmai ó sei hatene duni katak haʼu, Jeová, rona ona liafuan aat hotu neʼebé ó koʼalia kontra Izraél nia foho sira bainhira ó dehan: “Sira sai mamuk ona no ita iha oportunidade atu harahun sira.”* 13 Imi koʼalia ho foti an hasoru haʼu, no imi koʼalia liafuan barak hodi kontra haʼu.+ Haʼu rona liafuan sira-neʼe hotu.’
14 “Jeová, Naʼi Ukun-Naʼin Boot Liu, dehan nuneʼe: ‘Mundu tomak sei haksolok bainhira haʼu halo ó-nia rai sai fatin neʼebé rahun no mamuk. 15 Uluk ó haksolok bainhira umakain Izraél nia liman-rohan sai rahun no mamuk, entaun haʼu mós sei halo hanesan neʼe ba ó.+ Oh área foho nian iha Seir, sin, oh Edom tomak,+ ó sei rahun no sai fatin mamuk. Nuneʼe sira sei hatene duni katak haʼu mak Jeová.’”