Ezequiel

43 Tuirmai nia lori haʼu ba portaun neʼebé hateke ba parte leste.+ 2 Iha neʼebá haʼu haree Izraél nia Maromak nia glória mai husi parte leste,+ no ninia lian mak hanesan lian husi bee barak neʼebé suli makaʼas,+ no ninia glória halo rai sai nabilan.+ 3 Vizaun neʼebé haʼu haree mak hanesan ho vizaun neʼebé uluk haʼu haree ona bainhira haʼu* mai atu harahun sidade neʼe,* no hanesan ho vizaun neʼebé uluk haʼu haree besik Mota Kebar.+ Tan neʼe, haʼu hakneʼak no hakruʼuk ho oin ba rai.

4 Tuirmai Jeová nia glória tama ba templu* liuhusi portaun neʼebé hateke ba parte leste.+ 5 Depois neʼe, espíritu* ida halo haʼu hamriik no lori haʼu ba pátiu* kiʼik, no haʼu haree templu sai nakonu ona ho Jeová nia glória.+ 6 Tuirmai haʼu rona mane ida nia lian koʼalia mai haʼu husi templu, no mane neʼe mai hamriik iha haʼu-nia sorin.+ 7 Nia dehan ba haʼu:

“Oan-mane husi ema, neʼe mak fatin ba haʼu-nia kadunan+ no fatin ba haʼu-nia ain,+ fatin neʼebé haʼu hela bá iha povu Izraél nia leet ba nafatin.+ Uluk umakain Izraél no sira-nia liurai sira hafoʼer haʼu-nia naran tanba sira la hatudu laran-metin ba haʼu* no tanba sira-nia liurai nia mate-isin,* maibé sira sei la hafoʼer tan haʼu-nia naran neʼebé santu.+ 8 Haʼu halakon sira ho haʼu-nia hirus tanba sira tau sira-nia templu nia odamatan iha haʼu-nia templu nia odamatan nia sorin, no tau sira-nia odamatan riin iha haʼu-nia odamatan riin nia sorin, só didin deʼit mak haketak haʼu ho sira.+ Nuneʼe sira hafoʼer haʼu-nia naran neʼebé santu tanba hahalok aat neʼebé sira halo ona.+ 9 Agora husik sira soe tiha sira-nia hahalok la laran-metin* no soe sira-nia liurai nia mate-isin dook husi haʼu, nuneʼe haʼu sei hela iha sira-nia leet ba nafatin.+

10 “Oan-mane husi ema, ó tenke esplika kona-ba templu neʼe ba umakain Izraél,+ atu nuneʼe sira bele sente moe tanba sira-nia sala,+ no sira tenke estuda* didiʼak kona-ba templu nia modelu. 11 Se sira sente moe kona-ba buat hotu neʼebé sira halo ona, ó tenke fó sai ba sira kona-ba templu nia modelu, ninia arranju sira, ninia fatin atu sai no fatin atu tama.+ Ó tenke hatudu ba sira templu nia modelu hotu no ninia ukun-fuan ho lei sira. Pinta no hakerek neʼe iha sira-nia oin, atu nuneʼe sira bele hatene buat hotu kona-ba templu nia modelu no kumpre ninia ukun-fuan sira.+ 12 Templu nia lei mak tuirmai neʼe: Área tomak neʼebé haleʼu foho neʼe nia tutun mak santu liu hotu.+ Neʼe mak templu nia lei.

13 “Tuirmai neʼe mak altár nia medida tuir kóvado (kóvado ida-idak aumenta tan liman-fuan haat nia luan):*+ Altár nia hun aas kóvado ida no luan kóvado ida. Ninia ninin neʼebé haleʼu luan liman-sukat ida.* Neʼe mak altár nia hun. 14 Altár nia plataforma neʼebé kiʼik iha altár nia hun leten, aas kóvado rua. Plataforma neʼe luan liu kóvado ida se kompara ho plataforma ida iha nia leten. Plataforma neʼebé boot, aas kóvado haat. Plataforma neʼe mós luan liu kóvado ida se kompara ho parte ida iha nia leten. 15 Altár nia parte leten liu mak fatin atu sunu ahi, neʼe aas kóvado haat, no dikur haat iha ninia sikun haat.+ 16 Altár nia fatin atu sunu ahi neʼe mak kuadradu, naruk kóvado 12 no luan kóvado 12.+ 17 Plataforma neʼebé boot nia sorin haat, naruk kóvado 14 no luan kóvado 14; no ninia ninin neʼebé haleʼu, mak kóvado sorin deʼit,* no altár nia hun iha sorin-sorin, mak kóvado ida.

“No altár nia eskada hateke ba parte leste.”

18 Tuirmai nia hatete ba haʼu: “Oan-mane husi ema, Jeová, Naʼi Ukun-Naʼin Boot Liu, dehan nuneʼe: ‘Neʼe mak matadalan neʼebé ó tenke tuir bainhira halo altár, atu nuneʼe bele uza ba sakrifísiu sunu nian neʼebé hasaʼe tomak no hisik raan iha leten.’+

19 “Jeová, Naʼi Ukun-Naʼin Boot Liu, dehan: ‘Ó tenke fó karau-aman* ida husi karau-lubun ba amlulik Levi sira husi umakain Zadoc,+ neʼebé hakbesik atu halo serbisu ba haʼu, no sira sei hasaʼe ida-neʼe nuʼudar sakrifísiu sala nian.+ 20 Ó tenke foti karau neʼe nia raan balu no kose iha altár nia dikur haat, no iha plataforma nia lidun haat, no mós iha ninia ninin neʼebé haleʼu, atu nuneʼe bele halo santu altár neʼe.*+ 21 Tuirmai ó tenke foti karau-aman* atu hasaʼe nuʼudar sakrifísiu sala nian atu bele sunu iha fatin neʼebé hili tiha ona iha templu, iha fatin sagradu nia liʼur.+ 22 Iha loron segundu, ó tenke hasaʼe bibi-timur aman ida neʼebé la iha moras nuʼudar sakrifísiu sala nian. No amlulik sira sei hamoos altár neʼe* hanesan sira hamoos altár hodi hasaʼe karau-aman* nuʼudar sakrifísiu.’

23 “‘Bainhira ó hamoos tiha ona altár neʼe, ó tenke hasaʼe karau-aman* ida husi karau-lubun no bibi-malae aman ida husi bibi-lubun nuʼudar sakrifísiu. Animál sira-neʼe labele iha moras ida. 24 Ó tenke lori animál sira-neʼe ba Jeová nia oin, no amlulik sira tenke kari masin iha animál sira-neʼe nia leten+ no hasaʼe tomak nuʼudar sakrifísiu sunu nian ba Jeová. 25 Ba loron hitu ó tenke hasaʼe bibi-timur aman ida loroloron nuʼudar sakrifísiu sala nian,+ no mós hasaʼe karau-aman* ida husi karau-lubun no bibi-malae aman ida husi bibi-lubun loroloron. Ó tenke hasaʼe animál sira neʼebé la iha moras.* 26 Ba loron hitu amlulik sira tenke halo santu altár neʼe, no sira tenke hamoos no inaugura* altár neʼe. 27 Bainhira loron hitu neʼe remata ona, hahú husi loron ualu+ ba oin, amlulik sira sei hasaʼe imi-nia* sakrifísiu sunu nian neʼebé hasaʼe tomak no sakrifísiu dame nian iha altár neʼe, no haʼu sei sai kontente ho imi’,+ Jeová, Naʼi Ukun-Naʼin Boot Liu, mak dehan.”