Deuteronómio

29 Tuirmai neʼe mak liafuan aliansa nian neʼebé Jeová haruka ba Moisés atu halo ho povu Izraél iha rai-Moab, no neʼe la hanesan ho aliansa neʼebé uluk nia halo ho ema Izraél iha Horeb.+

2 Depois neʼe, Moisés halibur ema Izraél hotu no nia dehan ba sira: “Imi haree ona ho imi-nia matan rasik buat hotu neʼebé Jeová halo iha rai-Ejitu ba Faraó no ninia atan hotu no ba ninia rai tomak,+ 3 sin, imi haree ona kastigu boot, sinál boot no milagre sira-neʼe.+ 4 Maibé toʼo ohin loron Jeová seidauk fó ba imi kbiit atu komprende,* matan atu haree no tilun atu rona.+ 5 ‘Bainhira haʼu kontinua dirije imi atu laʼo iha rai-fuik durante tinan 40,+ imi-nia roupa neʼebé imi uza hela la sai bosan no imi-nia sandálias iha imi-nia ain la sai aat.+ 6 Imi la han paun, no imi la hemu tua-uvas ka tua seluk, atu nuneʼe imi hatene katak haʼu mak Jeová, imi-nia Maromak.’ 7 Ikusmai imi toʼo iha fatin neʼe, no Liurai Sihon husi Hesbon+ no Liurai Og husi Basan+ mai hodi halo funu hasoru ita, maibé ita manán sira.+ 8 Depois neʼe, ita foti sira-nia rai no fó rai neʼe nuʼudar liman-rohan ba suku Ruben, suku Gad, no suku Manasés nia sorin balu.+ 9 Tan neʼe, imi tenke rona ba liafuan aliansa nian neʼe no halo tuir, atu nuneʼe buat hotu neʼebé imi halo sei sai diʼak ba imi.+

10 “Ohin imi hotu hamriik iha Jeová, imi-nia Maromak, nia oin: Ulun-naʼin sira husi imi-nia suku, katuas sira, xefe sira, mane hotu husi Izraél, 11 imi-nia oan, imi-nia feen,+ no ema estranjeiru+ neʼebé hela iha imi-nia leet, neʼe inklui mós sira neʼebé hili ai no kuru bee ba imi. 12 Agora imi hamriik iha neʼe atu sai parte ba Jeová, imi-nia Maromak, nia aliansa no ninia juramentu, neʼebé ohin Jeová, imi-nia Maromak, halo ho imi+ 13 atu nuneʼe ohin nia bele halo imi sai nuʼudar ninia povu+ no nia bele sai imi-nia Maromak,+ hanesan nia promete ona ba imi no hanesan nia jura ona ba imi-nia beiʼala sira, Abraão,+ Isaac+ no Jacob.+

14 “Laʼós ho imi deʼit mak haʼu halo aliansa no juramentu neʼe, 15 maibé ho sira neʼebé hamriik hamutuk ho ita ohin iha Jeová, ita-nia Maromak, nia oin no ho jerasaun sira iha futuru.* 16 Tanba imi hatene didiʼak oinsá uluk ita moris iha rai-Ejitu no oinsá ita laʼo liu nasaun oioin nia leet durante ita-nia viajen.+ 17 No uluk imi toman atu haree sira adora buat neʼebé aat no estátua sira neʼebé Maromak hakribi*+ neʼebé halo husi ai no fatuk, husi osan-mutin no osan-mean, neʼebé iha sira-nia leet. 18 Ohin imi tenke kuidadu, atu nuneʼe iha imi-nia leet labele iha mane ka feto ida, família ka suku ida neʼebé nia laran sai dook husi Jeová, ita-nia Maromak, no bá hodi serbí maromak sira husi nasaun sira-neʼe.+ Hodi nuneʼe labele iha abut ida iha imi-nia leet neʼebé hamosu ai-fuan ho venenu no ai-tahan neʼebé moruk.+

19 “Se ema ruma rona liafuan juramentu nian neʼe no gaba an iha ninia laran dehan: ‘Haʼu sei iha dame maski haʼu kontinua laʼo tuir deʼit haʼu-nia hakarak rasik.’ Hanoin hanesan neʼe sei estraga buat hotu iha ninia moris; 20 Jeová sei lakohi fó perdua ba nia.+ Liután neʼe, Jeová sei sai hirus makaʼas hasoru ema neʼe, no malisan hotu neʼebé hakerek iha livru neʼe sei kona duni nia,+ no Jeová sei halakon duni ema neʼe nia naran husi mundu.* 21 Tuirmai Jeová sei haketak nia husi Izraél nia suku hotu nia leet hodi nia hetan kastigu tuir malisan hotu husi aliansa neʼebé hakerek ona iha livru Ukun-Fuan neʼe.

22 “Jerasaun husi imi-nia oan sira iha futuru no ema estranjeiru neʼebé mai husi rai dook sei haree susar sira neʼebé kona rai neʼe, katak malisan neʼebé Jeová fó ona ba rai neʼe. 23 Sira sei haree enxofre,* masin no ahi neʼebé halo rai neʼe sai la diʼak ona atu kuda fini, no ai-horis hotu la moris ona iha rai neʼe tomak hanesan iha Sodoma no Gomorra,+ Adma no Zeboim,+ neʼebé Jeová halakon ona tanba nia hirus no laran-nakali. 24 No imi-nia oan sira no ema husi nasaun hotu sei dehan: ‘Tanbasá mak Jeová halo nuneʼe ba rai neʼe?+ Saida mak halo nia sai hirus makaʼas hanesan neʼe?’ 25 Tuirmai sira sei dehan: ‘Neʼe tanba sira husik tiha aliansa husi Jeová,+ sira-nia beiʼala nia Maromak, aliansa neʼebé nia halo ona ho sira bainhira nia lori sira sai husi rai-Ejitu.+ 26 No sira bá hodi serbí maromak sira seluk no hakruʼuk ba maromak sira-neʼe, neʼebé sira la hatene no nia bandu sira atu adora.+ 27 Tuirmai Jeová sai hirus makaʼas hodi lori malisan ba rai neʼe hodi tuir buat hotu neʼebé hakerek iha livru neʼe.+ 28 Tan neʼe, Jeová hasai sira husi sira-nia rai ho hirus makaʼas+ no laran-nakali no haruka sira ba rai seluk, neʼebé agora sira hela bá.’+

29 “Buat sira neʼebé subar hela mak Jeová ita-nia Maromak nian,+ maibé buat neʼebé hatudu sai ona mak ita-nian no ita-nia bei-oan sira-nian ba nafatin, atu nuneʼe ita bele halo tuir liafuan hotu iha Ukun-Fuan neʼe.+