Lamentasaun
א [Alef]*
1 Oh sidade neʼebé uluk nakonu ho ema, agora nia tuur mesak deʼit!+
Sidade neʼebé uluk importante* iha nasaun sira-nia leet,+ agora sai ona hanesan feto-faluk ida!
Uluk nia hanesan liurai nia oan-feto iha provínsia sira-nia leet, maibé agora sai ona atan ida!+
ב [Bet]
2 Nia tanis makaʼas durante kalan,+ no ninia matan-been suli tun iha ninia hasan.
Ninia doben ida mós la fó kmaan ba nia.+
Ninia belun hotu fila kotuk ona ba nia.+ Sira sai ona ninia inimigu.
ג [Gimel]
3 Judá sai ona dadur,*+ hetan terus no serbisu makaʼas nuʼudar atan.+
Nia tenke hela iha nasaun sira-nia leet.+ Nia la hetan fatin atu deskansa.
Ema hotu neʼebé haterus nia, manán ona nia iha ninia tempu susar.
ד [Dalet]
4 Dalan sira ba Siaun halerik tanba la iha ema ida mak mai atu tuir festa.+
Siaun nia portaun hotu aat ona;+ ninia amlulik sira halerik.
Ninia feto virjen* sira tanis, no nia laran-triste tebes.
ה [Hei]
5 Agora ninia inimigu sira sai fali ninia naʼi.* Ninia inimigu sira la hanoin barak tan.+
Jeová lori ona triste ba nia tanba nia halo ona sala barak.+
Inimigu kaer ona ninia oan no lori sira nuʼudar dadur.+
ו [Vau]
6 Buat kmanek hotu dook ona husi Siaun nia oan-feto.+
Ninia ulun-naʼin sira mak hanesan bibi-rusa aman neʼebé la hetan rai neʼebé iha duʼut matak,
No sira laʼo ho kole tanba sira halai husi ema neʼebé duni tuir sira.
ז [Zain]
7 Iha tempu neʼebé Jeruzalein hetan terus no la iha hela-fatin,
Nia hanoin-hetan buat folin-boot hotu neʼebé nia hetan iha tempu uluk.+
Bainhira ninia povu monu ba inimigu nia liman no la iha ema ida mak ajuda nia,+
ח [Hetes]
8 Jeruzalein halo ona sala boot.+
Tan neʼe mak nia sai ona buat neʼebé ema hakribi.
Ema hotu neʼebé uluk respeitu nia, haree nia hanesan buat foʼer, tanba sira haree ona ninia isin-molik.+
Nia rasik halerik+ no fila kotuk tanba moe.
ט [Tet]
9 Ninia hahalok foʼer mak hanesan noda iha ninia roupa.
Nia la hanoin kona-ba ninia futuru.+
Ema hakfodak bainhira nia monu. La iha ema ida mak fó kmaan ba nia.
Oh Jeová, haree haʼu-nia terus, tanba inimigu gaba an ona.+
י [Iod]
10 Inimigu lolo ona liman hodi hadau ninia rikusoin hotu.+
Tanba nia haree ona nasaun sira tama ba ninia fatin sagradu,+
Sira mak ema neʼebé Ita bandu atu labele tama ba Ita-nia kongregasaun.*
כ [Kaf]
11 Povu hotu iha Jeruzalein halerik. Sira buka hahán.+
Sira fó sira-nia sasán folin-boot atu sosa ai-han ruma atu han, hodi bele kontinua moris.
Oh Jeová, haree bá, haʼu* sai ona hanesan feto neʼebé folin-laek.
ל [Lamed]
12 Imi hotu neʼebé laʼo liu, imi la hanoin haʼu ka?
Haree toʼok bá!
Sé mak sente moras hanesan moras neʼebé haʼu sente?
Haʼu sente moras tanba Jeová kastigu haʼu iha loron neʼebé ninia hirus lakan makaʼas.+
מ [Mem]
13 Nia haruka ahi husi lalehan hodi sunu haʼu-nia ruin ida-idak.+
Nia nahe rede ba haʼu-nia ain. Nia obriga haʼu atu hakiduk fali.
Nia halo haʼu sai hanesan feto neʼebé mesamesak.
Haʼu sente moras loron tomak.
נ [Nun]
14 Haʼu-nia sala sira hanesan naha todan neʼebé tau ba haʼu-nia kabaas.
Nia tau naha sira-neʼe ho ninia liman rasik, no haʼu lakon ona haʼu-nia forsa.
Jeová entrega ona haʼu ba ema sira neʼebé haʼu labele kontra.+
ס [Samek]
15 Jeová soe tiha ona haʼu-nia asuwaʼin hotu husi haʼu-nia leet.+
Nia bolu ona grupu boot ida hodi kontra haʼu atu halakon haʼu-nia mane joven sira.+
Jeová sama ona Judá nia oan-feto virjen iha fatin sama uvas nian.+
ע [Ain]
16 Haʼu lelir tanba buat sira-neʼe.+ Haʼu-nia matan-been suli.
Tanba ema neʼebé bele fó kmaan ba haʼu dook husi haʼu.
Haʼu-nia oan-mane sira la iha esperansa, tanba inimigu manán ona.
פ [Pei]
17 Siaun loke ninia liman.+ La iha ema ida mak fó kmaan ba nia.
Jeová fó ona orden ida ba Jacob nia inimigu hotu atu kontra Jacob.+
Jeruzalein sai ona buat neʼebé sira hakribi.+
צ [Sade]
18 Jeová nia hahalok mak loos,+ tanba haʼu kontra ona ninia mandamentu sira.+
Rona bá, oh povu hotu, haree ba haʼu-nia terus.
Haʼu-nia feto virjen* no mane joven sira sai ona dadur.+
ק [Kof]
19 Haʼu bolu ona haʼu-nia doben sira, maibé sira fila kotuk ba haʼu.+
Iha sidade laran haʼu-nia amlulik no katuas sira mate,
Bainhira sira buka hela hahán atu han hodi bele kontinua moris.+
ר [Reix]
20 Oh Jeová, haree bá, tanba haʼu iha susar boot nia laran.
Haʼu-nia laran* la hakmatek.
Haʼu-nia laran susar, tanba haʼu kontra ona Ita-Boot.+
Surik oho haʼu-nia oan sira iha uma nia liʼur.+ Iha uma laran haʼu sente hanesan mate.
ש [Xin]
21 Ema rona ona haʼu-nia halerik. La iha ema ida mak fó kmaan ba haʼu.
Haʼu-nia inimigu hotu rona ona kona-ba haʼu-nia terus.
Sira haksolok, tanba Ita lori ona terus neʼe ba haʼu.+
Maibé loron sei toʼo mai bainhira Ita halo ba sira hanesan Ita promete ona,+ no sira sei sai hanesan haʼu.+
ת [Tau]
22 Haʼu hein katak Ita sei haree sira-nia hahalok aat hotu, no fó kastigu makaʼas ba sira,+
Hanesan Ita fó kastigu makaʼas ba haʼu tanba haʼu-nia sala hotu.
Tanba haʼu halerik beibeik, no haʼu-nia laran moras.