Rute
3 Rute nia banin-feto Noemi hatete ba nia: “Haʼu-nia oan, haʼu tenke buka ema ida ba ó atu sai ó-nia kaben,*+ atu nuneʼe ó bele moris ho seguru. 2 Boaz mak ita-nia família,+ loos ka lae? Ninia atan-feto sira serbisu hamutuk ho ó. Ohin kalan nia sei haliri* sevada iha fatin sama sevada nian. 3 Tan neʼe, hariis bá, kose mina-morin ba ó-nia isin, no hatais ó-nia roupa neʼebé diʼak,* no tun ba fatin sama sevada nian. Keta hatudu ó-nia an ba nia toʼo nia han no hemu hotu ona. 4 Bainhira nia bá toba, ó tenke haree didiʼak nia toba iha neʼebé. Tuirmai bá hodi loke hena neʼebé taka ninia ain no toba iha neʼebá. Depois neʼe, nia sei fó-hatene saida mak ó tenke halo.”
5 Ho ida-neʼe, Rute hatán: “Haʼu sei halo tuir buat hotu neʼebé Ita hatete.” 6 Nuneʼe, nia tun ba fatin sama sevada nian no halo tuir buat hotu neʼebé ninia banin-feto haruka nia atu halo. 7 Iha tempu neʼe, Boaz han-hemu no sente laran-kontente tebes. Tuirmai nia bá toba besik sevada butuk. Depois neʼe, Rute hakbesik neineik-neineik no loke hena neʼebé taka Boaz nia ain no toba iha neʼebá. 8 Iha kalan-boot Boaz komesa nakdedar, no nia hadeer no haree feto ida toba besik ninia ain. 9 Nia husu: “Sé mak neʼe?” Rute hatán: “Haʼu mak Ita-nia atan Rute. Favór ida, taka Ita-nia atan ho Ita-nia roupa,* tanba Ita mak iha direitu atu sosa fali haʼu.”+ 10 Rona tiha neʼe, Boaz dehan: “Haʼu-nia oan, Jeová sei fó bensaun ba ó. Ohin ó hatudu ona domin neʼebé laran-metin liu fali uluk nian,+ tanba ó la buka mane-klosan sira, maski sira riku ka kiak. 11 Agora, haʼu-nia oan, keta taʼuk. Haʼu sei halo tuir buat hotu neʼebé ó dehan,+ tanba ema hotu iha sidade neʼe* hatene katak ó mak feto neʼebé diʼak tebes. 12 Maski haʼu iha duni direitu atu sosa fali ó,+ maibé iha mós mane ida seluk neʼebé mak família besik liu ho ó, no nia iha direitu liu fali haʼu atu sosa fali ó.+ 13 Toba deʼit iha neʼe ohin kalan. Se iha dadeer ema neʼe sosa fali ó, neʼe diʼak. Husik nia mak sosa fali ó.+ Maibé se nia lakohi sosa fali ó, haʼu jura hodi Jeová, Maromak neʼebé moris, katak haʼu rasik mak sei sosa fali ó. Toba lai iha neʼe toʼo dadeer.”
14 Entaun Rute toba iha Boaz nia ain toʼo dadeer, no bainhira rai sei nakukun hela, Rute hadeer atu ema seluk la haree nia. Boaz dehan: “Keta husik ema ida hatene katak feto ida mai iha fatin sama sevada nian.” 15 Boaz mós dehan: “Loke manta neʼebé ó taka.” Entaun Rute loke manta neʼe, no Boaz tau sevada sukat neen* no fó ba Rute atu lori. Depois neʼe, Boaz fila ba sidade.
16 Rute fila fali ba ninia banin-feto, no ninia banin husu: “Haʼu-nia oan, buat hotu laʼo ho diʼak ka lae?”* Rute fó-hatene ba ninia banin-feto kona-ba buat diʼak hotu neʼebé mane neʼe halo ona ba nia. 17 Rute hatutan tan: “Neʼe mak sevada sukat neen neʼebé nia fó mai haʼu, tanba nia dehan: ‘Keta fila ba ó-nia banin-feto ho liman-mamuk.’” 18 Ho ida-neʼe, Noemi dehan: “Haʼu-nia oan, hein deʼit iha neʼe toʼo ó hatene buat hotu sei sai oinsá, tanba mane neʼe sei la deskansa toʼo nia rezolve tiha ida-neʼe ohin.”