Primeiru Krónikas

11 Liutiha tempu balu, ema Izraél hotu halibur hamutuk hodi bá hasoru David iha Hebron+ no dehan: “Ami mak Ita-nia família rasik no raan ida deʼit.*+ 2 Iha tempu uluk bainhira Saul ukun hela nuʼudar liurai, Ita mak dirije ema Izraél bá funu.*+ No Jeová, Ita-nia Maromak, hatete ona ba Ita: ‘Ó mak sei tau matan ba haʼu-nia povu Izraél nuʼudar bibi-atan, no ó sei sai ulun-naʼin ba haʼu-nia povu Izraél.’”+ 3 Ho ida-neʼe, Izraél nia katuas hotu bá hasoru liurai iha Hebron, no David halo aliansa ida ho sira iha Hebron iha Jeová nia oin. Tuirmai sira foti* David nuʼudar liurai ba Izraél,+ hodi tuir liafuan neʼebé Jeová fó sai ona liuhusi Samuel.+

4 Depois neʼe, David no tropa Izraél hotu bá Jeruzalein, neʼe katak Jebus,+ no ema Jebus+ hela iha neʼebá. 5 Ema Jebus sadik David, hodi dehan: “Ó sei nunka bele tama iha sidade neʼe!”+ Maibé David manán sidade Siaun+ neʼebé seguru, tan neʼe agora sai nuʼudar David nia Sidade.+ 6 Entaun David hatete: “Ema neʼebé ataka uluk ema Jebus hodi halakon sira, nia sei sai xefe no ulun-naʼin.” Rona tiha neʼe, Zeruia nia oan-mane Joab+ saʼe uluk hodi bá ataka, no nia sai nuʼudar xefe. 7 Tuirmai David hela iha fatin seguru neʼe. Tan neʼe mak sira hanaran fatin neʼe David nia Sidade. 8 David komesa harii sidade nia moru no uma sira seluk haleʼu sidade, husi Millo* toʼo área hotu neʼebé haleʼu Millo, no Joab hadiʼa fali parte sira seluk iha sidade neʼe. 9 Ho ida-neʼe, David nia kbiit kontinua sai boot liután,+ no Jeová neʼebé ukun tropa lalehan nian hamutuk ho nia.

10 Tuirmai neʼe mak xefe sira neʼebé tau matan ba David nia asuwaʼin kbiit boot sira, neʼebé hamutuk ho povu Izraél hotu apoia David nia pozisaun nuʼudar liurai. Sira hili David nuʼudar liurai tuir Jeová nia liafuan kona-ba Izraél.+ 11 Neʼe mak lista ba David nia asuwaʼin kbiit boot sira: Ema Hakmoni ida nia oan-mane naran Jasobeam,+ neʼebé serbí nuʼudar ulun-naʼin ba asuwaʼin kbiit boot naʼin-tolu.+ Iha tempu ida, nia uza ninia diman hodi oho mane naʼin-300.+ 12 Depois nia mak Dodo nia oan-mane Eleazar+ ema Ahohi.+ Nia mós ida husi asuwaʼin kbiit boot naʼin-tolu. 13 Uluk nia hamutuk ho David iha Pas-Damim,+ fatin neʼebé ema Filístia halibur hamutuk atu halo funu. Iha fatin neʼebá iha toʼos ida neʼebé nakonu ho sevada, no povu Izraél halai tanba ema Filístia. 14 Maibé Samá hamriik iha toʼos neʼe nia klaran no defende toʼos neʼe hodi kontinua oho ema Filístia, nuneʼe Jeová fó salvasaun boot* ba ema Izraél.+

15 Mane naʼin-tolu husi ulun-naʼin naʼin-30 bá foho neʼebé iha fatuk barak, hodi hasoru David iha fatuk-kuak Adulam.+ Iha tempu neʼe tropa Filístia sira hela iha Rai-Tetuk Refaim.+ 16 Iha tempu neʼebá David hela iha fatin seguru, no tropa Filístia sira hela iha Belein. 17 David fó sai ninia hakarak, hodi dehan: “Haʼu hakarak tebes atu hemu bee husi tanke* neʼebé besik portaun Belein!”+ 18 Rona tiha neʼe, ulun-naʼin naʼin-tolu neʼe tama ba tropa Filístia nia hela-fatin no kuru bee husi tanke neʼebé besik portaun Belein no lori ba David. Maibé David lakohi hemu no nia fakar bee neʼe ba rai iha Jeová nia oin. 19 David hatete: “Haʼu sei nunka hemu bee neʼe tanba haʼu hamtaʼuk Maromak! Haʼu sei la hemu raan husi mane sira neʼebé tau sira-nia moris iha perigu laran hodi kuru bee neʼe ba haʼu.”+ Ho ida-neʼe, nia lakohi hemu. Neʼe mak buat neʼebé asuwaʼin kbiit boot naʼin-tolu halo.

20 Joab+ nia maun Abisai+ mak sai ulun-naʼin ba asuwaʼin naʼin-tolu seluk. Iha tempu ida nia uza ninia diman hodi oho mane naʼin-300, no ninia naran-boot hanesan ho asuwaʼin kbiit boot naʼin-tolu.+ 21 Husi asuwaʼin naʼin-tolu neʼe, Abisai mak naran-boot liu fali sira naʼin-rua, no nia mak sira-nia xefe. Maibé ninia pozisaun la boot liu asuwaʼin kbiit boot naʼin-tolu.

22 Jeoada nia oan-mane Benaias+ mak mane neʼebé aten-brani,* nia halo buat barak iha Kabzeel.+ Nia oho Ariel ema Moab nia oan-mane naʼin-rua, no loron ida durante tempu neʼebé jelu-rahun monu, nia tama ba bee-posu ida no oho leaun ida.+ 23 Nia mós oho mane Ejitu ida neʼebé isin-boot loos, mane neʼe aas metru rua liu.*+ Maski mane Ejitu neʼe kaer hela diman neʼebé boot hanesan ai neʼebé ema uza atu soru hena,+ maibé Benaias bá kontra mane neʼe ho ai-tonka ida no hadau tiha diman husi mane Ejitu neʼe nia liman no oho mane neʼe ho ninia diman rasik.+ 24 Neʼe mak buat sira neʼebé Jeoada nia oan-mane Benaias halo, no nia naran-boot hanesan ho asuwaʼin kbiit boot naʼin-tolu. 25 Maski Benaias iha naran-boot liu fali ulun-naʼin naʼin-30, maibé ninia pozisaun la boot liu asuwaʼin kbiit boot naʼin-tolu.+ Maski nuneʼe, David foti nia nuʼudar ulun ba ninia guarda.

26 Asuwaʼin sira husi tropa sira-neʼe mak Joab nia alin Asael;+ Elanan, nia mak Dodo ema Belein nia oan-mane;+ 27 Samot ema Haror; Helez ema Pelonit; 28 Ira,+ nia mak Ikes ema Tekoa nia oan-mane; Abi-Ezer+ ema Anatot; 29 Sibekai+ ema Husa; Ilai ema Ahohi; 30 Maarai+ ema Netofa; Heled,+ nia mak Baaná ema Netofa nia oan-mane; 31 Itai, nia mak Ribai nia oan-mane, ema Gibea husi suku Benjamim;+ Benaias ema Piraton; 32 Hurai husi mota* sira iha Gaas;+ Abiel ema Araba; 33 Azmavet ema Baurim; Eliaba ema Saalbim; 34 Hasem ema Gizon nia oan-mane sira; Jonatan, nia mak Sage ema Harari nia oan-mane; 35 Ahiam, nia mak Sakar ema Harari nia oan-mane; Elifal, nia mak Ur nia oan-mane; 36 Hefer ema Mekera; Ahias ema Pelonit; 37 Hezro ema Karmel; Ezbai nia oan-mane Naarai; 38 Natan nia alin-mane Joel; Hagri nia oan-mane Mibar; 39 Zelek ema Ammon; Naarai ema Beerot, neʼebé lori Zeruia nia oan-mane Joab nia armas; 40 Ira ema Itri; Gareb ema Itri; 41 Urias+ ema Hetes; Alai nia oan-mane Zabad; 42 Siza nia oan-mane Adina ema Ruben, neʼebé serbí nuʼudar ulun-naʼin ba ema Ruben, no iha mane naʼin-30 hamutuk ho nia; 43 Maaka nia oan-mane Hanan; Josafat ema Mitni; 44 Uzia ema Astarot; Sama no Jeiel, sira mak Hotam ema Aroer nia oan-mane; 45 Sinri nia oan-mane Jediael, no ninia alin-mane Joa ema Tize; 46 Eliel ema Mavi; Elnaam nia oan-mane sira Jeribai no Josavias; no Itma ema Moab; 47 Eliel; Obed; no Jaasiel ema Mezoba.