Primeiru Krónikas
21 Tuirmai Satanás* kontra ema Izraél no book David atu sura ema Izraél.+ 2 Entaun David dehan ba Joab+ no ba povu nia xefe sira: “Bá, sura ema Izraél husi Beer-Seba toʼo Dan,+ tuirmai fó-hatene fali haʼu atu nuneʼe haʼu bele hatene povu neʼe hamutuk hira.” 3 Maibé Joab hatete: “Haʼu hein katak Jeová sei aumenta povu neʼe ba dala 100! Haʼu-nia naʼi liurai, povu hotu mak sai ona Ita-nia atan, loos ka lae? Tanbasá mak haʼu-nia naʼi hakarak atu halo ida-neʼe? Tanbasá mak Ita tenke halo ema Izraél monu ba sala?”
4 Maibé liurai nia liafuan manán Joab nian. Entaun Joab sai no laʼo haleʼu rai-Izraél tomak, depois neʼe nia fila fali ba Jeruzalein.+ 5 No Joab fó sai ba David númeru ba povu neʼebé rejistu ona. Tropa Izraél hotu hamutuk naʼin-1.100.000 neʼebé kaer surik, no tropa Judá hamutuk naʼin-470.000 neʼebé kaer surik.+ 6 Maibé Joab la rejistu ema Levi no ema Benjamim,+ tanba nia la gosta liurai nia mandamentu.+
7 Maromak loos la gosta buat neʼebé David halo, tan neʼe nia fó kastigu ba ema Izraél. 8 Tuirmai David dehan ba Maromak loos: “Haʼu halo ona sala+ boot hodi rejistu povu neʼe. Agora favór ida, fó perdua ba Ita-nia atan nia sala,+ tanba haʼu halo ona hahalok neʼebé beik tebes.”+ 9 Depois neʼe, Jeová hatete ba Gad,+ neʼebé fó sai vizaun husi Maromak ba David, hodi dehan: 10 “Bá hatete ba David: ‘Jeová dehan nuneʼe: “Haʼu fó sai kastigu tolu ba ó. Hili kastigu ida-neʼebé mak haʼu sei halo ba ó.”’” 11 Entaun Gad bá hasoru David no hatete: “Jeová dehan nuneʼe: ‘Ó tenke hili kastigu ida husi kastigu tolu tuirmai neʼe: 12 Rai-hamlaha ba tinan tolu,+ ka ba fulan tolu ó-nia inimigu sei manán ó,+ ka kastigu ba loron tolu ho Jeová nia surik, neʼe katak ba loron tolu mosu moras-peste* iha rai neʼe+ no Jeová nia anju sei lori susar+ iha rai-Izraél tomak.’ Agora hanoin didiʼak no fó-hatene haʼu saida mak haʼu sei hatán fali ba Ida neʼebé haruka haʼu mai.” 13 Entaun David hatete ba Gad: “Neʼe halo haʼu neon-susar tebes. Favór ida, husik haʼu monu ba Jeová nia liman tanba ninia laran-sadiʼa mak boot tebetebes.+ Maibé keta husik haʼu monu ba ema nia liman.”+
14 Tuirmai Jeová lori moras-peste+ ba ema Izraél, ho ida-neʼe povu Izraél naʼin-70.000 mate.+ 15 No mós Maromak loos haruka anju ida bá Jeruzalein atu halakon sidade neʼe. Maibé bainhira anju komesa halo nuneʼe, Jeová haree no sente triste kona-ba susar neʼe,+ no nia hatete kedas ba anju neʼebé lori susar: “Toʼo ona!+ Agora hatún ó-nia liman.” Iha tempu neʼebá Jeová nia anju hamriik besik Ornan+ ema Jebus+ nia fatin sama trigu nian.
16 Bainhira David foti matan, nia haree Jeová nia anju hamriik daudaun entre lalehan no rai no anju neʼe nia surik losu sai ona+ hodi lolo ba Jeruzalein. David no katuas sira hatais hena karón,*+ no sira hakneʼak kedas hodi hakruʼuk ho oin ba rai.+ 17 David dehan ba Maromak loos: “Haʼu mak haruka atu sura povu neʼe, loos ka lae? Haʼu mak halo sala, no haʼu mak halo buat aat.+ Maibé kona-ba bibi sira-neʼe, sala saida mak sira halo ona? Oh Jeová, haʼu-nia Maromak, favór ida, foti Ita-nia liman hasoru haʼu no haʼu-nia aman nia umakain, maibé keta lori moras-peste ba Ita-nia povu.”+
18 Tuirmai Jeová nia anju hatete ba Gad+ atu haruka David hodi saʼe bá no harii altár ida ba Jeová iha Ornan ema Jebus nia fatin sama trigu nian.+ 19 Nuneʼe David bá halo tuir Gad nia liafuan neʼebé nia fó sai ona hodi Jeová nia naran. 20 Iha tempu neʼebá, Ornan fila oin no haree anju neʼe, no Ornan nia oan-mane naʼin-haat neʼebé hamutuk ho nia subar sira-nia an. Iha tempu neʼe Ornan sama hela trigu. 21 Bainhira David bá hasoru Ornan, Ornan hateke no haree David, no nia sai kedas husi fatin sama trigu nian no hakruʼuk ho oin ba rai iha David nia oin. 22 David hatete ba Ornan: “Faʼan* fatin sama trigu nian neʼe ba haʼu, atu nuneʼe haʼu bele harii altár ida ba Jeová. Faʼan neʼe ba haʼu tuir folin neʼebé loloos, hodi nuneʼe moras-peste neʼebé kona povu neʼe bele para tiha.”+ 23 Maibé Ornan hatete ba David: “Haʼu-nia naʼi liurai, foti deʼit fatin neʼe hanesan Ita-nian rasik, no halo buat neʼebé Ita-Boot hanoin mak diʼak. Haʼu mós fó karau sira hodi hasaʼe nuʼudar sakrifísiu sunu nian, no fó ai-kabelak neʼebé uza atu sama trigu+ hodi Ita-Boot bele uza nuʼudar ai sunu nian, no haʼu mós fó trigu nuʼudar sakrifísiu trigu nian. Haʼu fó buat hotu neʼe ba Ita-Boot.”
24 Maibé Liurai David hatete ba Ornan: “Lae, haʼu tenke sosa neʼe tuir folin neʼebé loos, tanba haʼu labele foti deʼit buat neʼebé ó-nian no entrega neʼe ba Jeová no hasaʼe sakrifísiu sunu nian hodi la selu buat ida.”+ 25 Entaun David fó osan-mean kilograma hitu* ba Ornan hodi sosa fatin neʼe. 26 David harii altár ida+ iha fatin neʼe ba Jeová no hasaʼe sakrifísiu sunu nian no sakrifísiu dame nian. Nia bolu Maromak Jeová nia naran, no Maromak hatán ba nia ho ahi+ husi lalehan hodi han sakrifísiu sunu nian iha altár leten. 27 Tuirmai Jeová haruka anju neʼe+ atu hatama fali surik ba ninia fatin. 28 Iha tempu neʼebá, bainhira David haree katak Jeová hatán ona ba ninia orasaun iha Ornan ema Jebus nia fatin sama trigu nian, entaun David kontinua hasaʼe sakrifísiu iha neʼebá. 29 Maibé iha tempu neʼebá, Jeová nia tenda santu neʼebé Moisés harii ona iha rai-fuik no mós altár ba sakrifísiu sunu nian mak sei iha hela iha fatin aas iha Gibeão.+ 30 Maibé David labele bá iha altár oin atu husu Maromak, tanba nia sai taʼuk ba Jeová nia anju nia surik.