Primeiru Krónikas

18 Liutiha tempu balu, David halo funu hasoru ema Filístia no manán sira, nuneʼe David foti Gat+ no ninia sidade kiʼik sira* husi ema Filístia nia liman.+ 2 Tuirmai nia manán funu hasoru ema Moab,+ no ema Moab sai David nia atan no selu impostu* ba nia.+

3 David manán Liurai Hadadezer+ husi Zoba+ besik Hamat+ bainhira Hadadezer laʼo daudaun ba Mota Eufrates atu domina área neʼe.+ 4 David foti kuda-karreta 1.000 no kaer tropa naʼin-7.000 neʼebé saʼe kuda no tropa naʼin-20.000 neʼebé laʼo ain.+ Tuirmai David tesi kuda hotu nia ain-uat, katak kuda sira neʼebé dada kuda-karreta, maibé nia la tesi kuda 100 nia ain-uat.+ 5 Bainhira ema Síria husi Damasku mai ajuda Liurai Hadadezer husi Zoba, David oho ema Síria naʼin-22.000.+ 6 Tuirmai David tau tropa sira iha Síria iha Damasku, no ema Síria sai David nia atan no selu impostu ba nia. Jeová halo David manán* iha fatin naran deʼit neʼebé nia bá.+ 7 David mós foti eskudu osan-mean neʼebé kabuar husi Hadadezer nia atan sira, no lori eskudu sira-neʼe ba Jeruzalein. 8 David foti riti barak husi Hadadezer nia sidade Tibat no Kun. Salomão uza riti sira-neʼe atu halo tanke boot neʼebé hanaran Tasi,+ templu nia riin sira no sasán oioin.+

9 Bainhira Liurai Tou husi Hamat rona katak David manán ona Liurai Hadadezer+ husi Zoba+ nia tropa tomak, 10 nia haruka kedas ninia oan-mane Hadoram atu kumprimenta no fó parabéns ba Liurai David tanba nia halo ona funu no manán Hadadezer. Tou haruka Hadoram lori sasán oioin neʼebé halo husi osan-mean, osan-mutin no riti, tanba uluk Hadadezer funu hasoru Tou dala barak. 11 Liurai David halo santu buat sira-neʼe ba Jeová,+ no nia mós halo santu osan-mutin no osan-mean neʼebé nia foti ona husi nasaun sira hotu: husi Edom no Moab, husi ema Ammon,+ ema Filístia+ no ema Amalec.+

12 Zeruia+ nia oan-mane Abisai+ oho ema Edom naʼin-18.000 iha Foho-Leet Masin.+ 13 Nia tau tropa sira iha Edom no ema Edom hotu sai David nia atan.+ Jeová halo David manán* iha fatin naran deʼit neʼebé nia bá.+ 14 David kontinua ukun Izraél tomak,+ no nia tesi-lia ba povu hotu ho loloos no tuir justisa.+ 15 Zeruia nia oan-mane Joab mak xefe tropa nian,+ no Ahilud nia oan-mane Jeosafát+ mak hakerek-naʼin, 16 Ahitub nia oan-mane Zadoc no Abiatar nia oan-mane Ahimelec serbí nuʼudar amlulik, no Savsa mak sekretáriu. 17 Jeoada nia oan-mane Benaias mak xefe ba ema Kereti+ no ema Peleti.+ No David nia oan-mane sira mak tuur iha pozisaun nuʼudar xefe boot depois liurai.