Ezequiel
29 Iha loron 12 fulan-sanulu tinan sanulu,* Jeová koʼalia ba haʼu, hodi dehan: 2 “Oan-mane husi ema, fila oin ba Faraó, liurai Ejitu, no fó sai profesia hodi kontra nia no rai-Ejitu tomak.+ 3 Fó sai liafuan tuirmai neʼe: ‘Jeová, Naʼi Ukun-Naʼin Boot Liu, dehan nuneʼe:
“Oh Faraó, liurai Ejitu,+ haʼu sei kontra ó.
Ó hanesan animál boot tasi nian neʼebé latan iha Mota Nilo* nia mota kiʼik sira,+
Ó dehan: ‘Mota Nilo mak haʼu-nian.
Haʼu mak halo mota neʼe ba haʼu-nia an rasik.’+
4 Maibé haʼu sei tau besi-kaʼit ba ó-nia hasan-ruin no haʼu sei halo ikan sira iha ó-nia Mota Nilo belit ba ó-nia kikit sira.
Haʼu sei dada sai ó husi Mota Nilo hamutuk ho ikan hotu iha Mota Nilo neʼebé belit ba ó-nia kikit sira.
5 Haʼu sei husik tiha ó ho ikan hotu husi ó-nia Mota Nilo iha rai-fuik maran.
Ó sei mate iha rai-luan, no ema sei la foti ka halibur ó-nia mate-isin.+
Haʼu sei entrega ó-nia mate-isin ba animál fuik sira iha rai no ba manu sira iha lalehan atu han.+
6 Nuneʼe ema hotu iha rai-Ejitu sei hatene duni katak haʼu mak Jeová,
Tanba sira mak hanesan duʼut-kain maran ida neʼebé labele fó apoiu ba umakain Izraél.+
7 Bainhira ema Izraél kaer ó-nia liman, ó rahun tiha,
No ó halo sira-nia kabaas naksalak.
8 “‘Tan neʼe, Jeová, Naʼi Ukun-Naʼin Boot Liu, dehan nuneʼe: “Haʼu sei lori surik kontra ó,+ no haʼu sei oho ó-nia ema no animál sira. 9 Rai-Ejitu sei rahun no sai fatin mamuk.+ Sira sei hatene duni katak haʼu mak Jeová, tanba ó* dehan: ‘Mota Nilo mak haʼu-nian. Haʼu mak halo mota neʼe.’+ 10 Tan neʼe haʼu sei kontra ó no kontra ó-nia Mota Nilo, no haʼu sei halo rai-Ejitu sai fatin neʼebé fuik, maran, rahun no mamuk,+ hahú husi Migdol+ toʼo Siene,+ no toʼo fronteira husi rai-Etiópia. 11 Ema no animál-hakiak sei la laʼo liu rai neʼe,+ no ema sei la hela iha rai neʼe ba tinan 40. 12 Haʼu sei halo rai-Ejitu sai fatin neʼebé fuik liu rai sira seluk, no ninia sidade sira sei sai mamuk no fuik liu sidade sira seluk ba tinan 40.+ Haʼu sei halo ema Ejitu namkari ba nasaun no rai oioin.”+
13 “‘Jeová, Naʼi Ukun-Naʼin Boot Liu, dehan nuneʼe: “Liutiha tinan 40, haʼu sei halibur fali ema Ejitu husi nasaun neʼebé sira namkari bá.+ 14 Haʼu sei lori ema Ejitu neʼebé sai dadur atu fila ba rai-Patros,+ katak sira-nia rai rasik, no iha neʼebá, sira sei sai nasaun neʼebé la importante. 15 Ejitu sei sai kiʼik liu fali nasaun sira seluk no sira sei la domina tan nasaun sira,+ no haʼu sei halo sira sai kiʼik loos atu nuneʼe sira la iha kbiit atu manán nasaun sira seluk.+ 16 Umakain Izraél sei la tau fiar tan ba sira,+ maibé ida-neʼe sei fó-hanoin ema Izraél kona-ba sira-nia sala atu husu ajuda husi ema Ejitu. Nuneʼe sira sei hatene duni katak haʼu mak Jeová, Naʼi Ukun-Naʼin Boot Liu.”’”
17 Iha loron primeiru fulan-primeiru tinan 27,* Jeová koʼalia tan mai haʼu, hodi dehan: 18 “Oan-mane husi ema, Liurai Nabukodonozór*+ husi Babilónia haruka ninia tropa sira serbisu makaʼas hodi halo funu hasoru Tiro.+ Tropa sira hotu nia ulun sai molik, no sira-nia kabaas kulit nakloke. Maibé nia no ninia tropa sira la simu kolen ida ba serbisu neʼebé nia halo atu kontra Tiro.
19 “Tan neʼe Jeová, Naʼi Ukun-Naʼin Boot Liu, dehan nuneʼe: ‘Haʼu sei fó rai-Ejitu ba Liurai Nabukodonozór* husi Babilónia,+ no nia sei hadau no lori tiha rai-Ejitu nia rikusoin barak. Neʼe mak kolen ba ninia tropa sira.’
20 “Jeová, Naʼi Ukun-Naʼin Boot Liu, dehan nuneʼe: ‘Haʼu sei fó rai-Ejitu ba nia nuʼudar ninia kolen tanba nia kumpre haʼu-nia hakarak hodi halo serbisu kontra sidade* neʼe.’+
21 “Iha loron neʼebá haʼu sei halo dikur ida moris iha umakain Izraél,*+ no haʼu sei fó oportunidade ba ó atu koʼalia iha sira-nia leet. Nuneʼe sira sei hatene duni katak haʼu mak Jeová.”