Deuteronómio
6 “Neʼe mak mandamentu, ukun-fuan no lei sira neʼebé Jeová, imi-nia Maromak, haruka haʼu atu hanorin ba imi, atu nuneʼe imi bele halo tuir bainhira imi hakur ona hodi tama ba rai neʼebé imi sei foti nuʼudar imi-nian, 2 atu nuneʼe imi no imi-nia oan no bei-oan bele hamtaʼuk Jeová,+ imi-nia Maromak, durante loron hotu neʼebé imi moris no halo tuir ninia ukun-fuan no mandamentu hotu neʼebé haʼu fó sai ba imi, atu nuneʼe imi bele moris naruk.+ 3 No imi tenke rona, oh ema Izraél, no halo tuir ho didiʼak, atu nuneʼe buat hotu bele sai diʼak ba imi no imi sei sai barak loos iha rai neʼebé iha susubeen no bani-been barak, hodi tuir buat neʼebé Jeová, imi-nia beiʼala nia Maromak, promete ona ba imi.
4 “Rona bá, oh ema Izraél: Jeová ita-nia Maromak mak Jeová mesak ida deʼit.+ 5 Imi tenke hadomi Jeová, imi-nia Maromak, ho imi-nia laran tomak, ho imi-nia moris* tomak+ no ho imi-nia kbiit tomak.+ 6 Liafuan sira neʼebé haʼu fó sai ba imi ohin tenke rai iha imi-nia laran, 7 no imi tenke hanorin* liafuan sira-neʼe ba imi-nia oan+ no koʼalia kona-ba buat sira-neʼe kuandu imi tuur iha imi-nia uma, kuandu imi laʼo iha dalan, kuandu imi toba, no kuandu imi hadeer.+ 8 Kesi buat sira-neʼe nuʼudar sinál iha imi-nia liman, no neʼe tenke sai nuʼudar hena neʼebé kesi iha imi-nia reen-toos.+ 9 Hakerek buat sira-neʼe iha imi-nia odamatan nia arus iha imi-nia uma no mós iha imi-nia portaun.
10 “Jeová, imi-nia Maromak, sei lori imi tama ba rai neʼebé nia jura ona ba imi-nia beiʼala Abraão, Isaac no Jacob atu fó ba imi;+ rai neʼe iha ona sidade sira neʼebé boot no furak neʼebé imi rasik la harii,+ 11 no iha uma sira neʼebé nakonu ho sasán diʼak oioin neʼebé laʼós imi mak serbisu atu hetan, iha tanke* neʼebé imi la keʼe, no toʼos-uvas no ai-oliveira hun neʼebé imi la kuda. No bainhira imi han no sai bosu iha rai neʼe,+ 12 kuidadu bá atu imi la haluha Jeová,+ ida neʼebé lori imi sai husi rai-Ejitu, husi uma atan nian. 13 Imi tenke hamtaʼuk deʼit Jeová, imi-nia Maromak,+ no imi tenke serbí deʼit nia,+ no imi tenke jura deʼit hodi ninia naran.+ 14 Imi labele laʼo tuir maromak sira seluk, katak maromak sira hotu husi povu neʼebé haleʼu imi,+ 15 tanba Jeová, imi-nia Maromak, neʼebé iha imi-nia leet mak Maromak neʼebé hakarak ema atu adora nia mesak deʼit.+ Se lae, Jeová, imi-nia Maromak, sei sai hirus tebes hasoru imi+ no nia sei halakon imi husi rai leten.+
16 “Imi labele koko Jeová, imi-nia Maromak,+ hanesan imi koko nia iha Massá.+ 17 Imi tenke badinas hodi halo tuir mandamentu sira husi Jeová, imi-nia Maromak, no halo tuir ninia avizu sira no ninia ukun-fuan sira neʼebé nia haruka ona imi atu halo tuir. 18 Imi tenke halo buat neʼebé loos no diʼak tuir Jeová nia haree atu nuneʼe buat hotu bele sai diʼak ba imi no atu imi bele tama no foti rai diʼak neʼebé Jeová jura ona ba imi-nia beiʼala sira,+ 19 no imi sei duni sai imi-nia inimigu hotu husi imi-nia oin hodi tuir buat neʼebé Jeová promete ona.+
20 “Iha futuru, se imi-nia oan sira husu imi: ‘Avizu, ukun-fuan no lei sira neʼebé Jeová, ita-nia Maromak, fó sai ba imi katak sá?’ 21 entaun imi tenke hatán ba imi-nia oan sira: ‘Uluk ami sai atan ba Faraó* iha rai-Ejitu, maibé Jeová lori ami sai husi rai-Ejitu ho liman neʼebé forte. 22 No iha ami-nia oin mak Jeová halo sinál no milagre boot oioin neʼebé estraga buat barak, nia halo nuneʼe ba rai-Ejitu,+ ba Faraó, no ba ninia umakain tomak.+ 23 No nia hasai ami husi neʼebá hodi lori ami mai iha neʼe atu fó ba ami rai neʼebé nia jura ona ba ami-nia beiʼala sira.+ 24 Tuirmai Jeová haruka ita atu halo tuir ukun-fuan sira-neʼe hotu no atu hamtaʼuk Jeová, ita-nia Maromak, tanba neʼe sei lori diʼak nafatin ba ita,+ atu nuneʼe ita bele kontinua moris+ hanesan ita moris ohin loron. 25 No Maromak sei haree ita nuʼudar ema loos se ita moris tuir ho didiʼak ninia ukun-fuan sira-neʼe hotu no halo tuir Jeová, ita-nia Maromak, hodi tuir mandamentu neʼebé nia fó ba ita.’+