Ezequiel

36 “Kona-ba ó, oan-mane husi ema, fó sai profesia kona-ba Izraél nia foho sira no dehan: ‘Oh Izraél nia foho sira, rona ba Jeová nia liafuan. 2 Jeová, Naʼi Ukun-Naʼin Boot Liu, dehan nuneʼe: “Inimigu koʼalia tiha ona kona-ba imi, hodi dehan: ‘Merese duni! Fatin aas sira husi tempu antigu sai ona ita-nian!’”’+

3 “Entaun fó sai profesia bá no hatete: ‘Jeová, Naʼi Ukun-Naʼin Boot Liu, dehan nuneʼe: “Sira halo rahun imi no ataka imi husi imi-nia sorin-sorin, no nasaun sira seluk* hakarak imi atu sai sira-nian no ema kontinua koʼalia aat hodi hafoʼer imi-nia naran.+ 4 Tan neʼe, oh Izraél nia foho sira, rona ba Jeová, Naʼi Ukun-Naʼin Boot Liu, nia liafuan! Jeová, Naʼi Ukun-Naʼin Boot Liu, dehan nuneʼe ba foho no foho-oan sira, mota no foho-leet sira, fatin neʼebé rahun ona,+ no sidade sira neʼebé mamuk tanba ema hadau ona sasán no sidade sira neʼebé hetan goza husi ema restu iha nasaun sira neʼebé haleʼu sidade sira-neʼe.+ 5 Jeová, Naʼi Ukun-Naʼin Boot Liu, dehan: ‘Ho haʼu-nia laran-manas neʼebé lakan makaʼas,+ haʼu sei koʼalia kontra ema restu husi nasaun sira no mós kontra Edom tomak. Sira haksolok boot no koʼalia liafuan goza+ hodi hadau tiha haʼu-nia rai, no hadau ona fatin neʼebé iha duʼut barak no rai neʼe nia sasán sira.’”’+

6 “Entaun fó sai profesia kona-ba rai-Izraél, no koʼalia ba foho sira, foho-oan sira, mota sira no foho-leet sira, hodi dehan: ‘Jeová, Naʼi Ukun-Naʼin Boot Liu, dehan nuneʼe: “Haʼu sei koʼalia ho laran-manas no hirus, tanba nasaun sira hamoe imi.”’+

7 “Tan neʼe Jeová, Naʼi Ukun-Naʼin Boot Liu, dehan nuneʼe: ‘Haʼu rasik foti saʼe ona liman hodi jura katak nasaun sira neʼebé haleʼu imi sei lori sira-nia moe rasik.+ 8 Maibé imi, oh Izraél nia foho sira, imi sei fó moris ba ai-sanak sira no fó ai-fuan ba haʼu-nia povu Izraél,+ tanba lakleur tan sira sei fila fali. 9 Tanba haʼu hamutuk ho imi, no haʼu sei apoia fali imi, no ema sei fila rai no kuda fini iha imi. 10 Haʼu sei aumenta tan povu, katak umakain Izraél tomak, no sira sei hela fali iha imi-nia sidade+ no sei harii fali sidade neʼebé rahun ona.+ 11 Sin, haʼu sei aumenta imi-nia povu no animál-hakiak.+ Sira sei aumenta no sai barak. Haʼu sei halo sira hela iha imi hanesan tempu uluk,+ no haʼu sei halo imi moris diʼak liu fali tempu uluk.+ Nuneʼe imi sei hatene duni katak haʼu mak Jeová.+ 12 Haʼu sei halo haʼu-nia povu Izraél atu hela iha imi, no sira sei foti imi nuʼudar sira-nian.+ Imi sei sai nuʼudar sira-nia liman-rohan, no imi sei la halo tan sira-nia oan mate.’”+

13 “Jeová, Naʼi Ukun-Naʼin Boot Liu, dehan nuneʼe: ‘Tanba sira dehan ba imi: “Imi mak rai neʼebé tolan povu no oho imi-nia nasaun sira-nia oan”, 14 tan neʼe, imi sei la tolan tan povu no la oho tan imi-nia nasaun sira-nia oan’, Jeová, Naʼi Ukun-Naʼin Boot Liu, mak dehan. 15 ‘Haʼu sei la husik tan nasaun sira atu goza imi ka la husik tan imi atu sente todan tanba ema sadik imi,+ no imi sei la halo tan imi-nia nasaun sira sidi’, Jeová, Naʼi Ukun-Naʼin Boot Liu, mak dehan.”

16 Jeová koʼalia tan mai haʼu, hodi dehan: 17 “Oan-mane husi ema, uluk bainhira umakain Izraél sei hela iha sira-nia rai, sira hafoʼer rai neʼe ho sira-nia hahalok no moris.+ Ba haʼu, sira-nia hahalok mak hanesan menstruasaun neʼebé foʼer.+ 18 Tan neʼe, haʼu fakar sai haʼu-nia laran-nakali ba sira tanba sira fakar ema nia raan iha rai neʼe+ no tanba sira hafoʼer rai neʼe ho sira-nia estátua sira neʼebé haʼu hakribi.*+ 19 Entaun haʼu halo sira namkari ba nasaun sira-nia leet no ba rai oioin.+ Haʼu tesi-lia ba sira tuir sira-nia dalan no sira-nia hahalok. 20 Maibé bainhira sira laʼo ba nasaun sira-neʼe, povu sira iha neʼebá hafoʼer haʼu-nia naran neʼebé santu+ hodi koʼalia kona-ba sira, dehan: ‘Sira mak Jeová nia povu, maibé sira tenke husik tiha ninia rai.’ 21 Tan neʼe, haʼu sei hatudu katak haʼu hanoin haʼu-nia naran neʼebé santu, neʼebé umakain Izraél hafoʼer ona iha nasaun sira-nia leet neʼebé sira laʼo namkari bá.”+

22 “Tan neʼe, hatete ba umakain Izraél: ‘Jeová, Naʼi Ukun-Naʼin Boot Liu, dehan nuneʼe: “Oh umakain Izraél, haʼu sei lori imi fila laʼós tanba imi maibé tanba haʼu-nia naran neʼebé santu, neʼebé imi hafoʼer ona iha nasaun sira-nia leet neʼebé imi laʼo namkari bá.”’+ 23 Jeová, Naʼi Ukun-Naʼin Boot Liu, dehan: ‘Haʼu sei halo duni haʼu-nia naran neʼebé boot sai santu,+ neʼebé sai foʼer ona iha nasaun sira-nia leet. Imi hafoʼer ona naran neʼe iha sira-nia leet. Nasaun sira sei hatene duni katak haʼu mak Jeová+ bainhira haʼu halo santu* haʼu-nia an iha imi-nia leet iha nasaun sira-nia oin. 24 Haʼu sei foti imi husi nasaun sira-nia leet no halibur imi husi rai hotu no lori imi ba imi-nia rai.+ 25 Haʼu sei hisik bee moos ba imi-nia leten, nuneʼe imi sei sai moos.+ Haʼu sei halo imi sai moos husi imi-nia hahalok foʼer hotu+ no husi imi-nia estátua hotu neʼebé haʼu hakribi.*+ 26 Haʼu sei fó imi laran neʼebé foun+ no tau espíritu* foun ba imi.+ Haʼu sei hasai tiha laran neʼebé toos hanesan fatuk+ husi imi-nia isin no fó fali laran neʼebé mamar ba imi.* 27 Haʼu sei tau haʼu-nia espíritu iha imi-nia laran, no haʼu sei halo imi laʼo tuir haʼu-nia ukun-fuan sira.+ Imi sei halo tuir no kumpre haʼu-nia desizaun sira. 28 Tuirmai imi sei hela iha rai neʼebé haʼu entrega ona ba imi-nia beiʼala sira. Imi sei sai haʼu-nia povu no haʼu sei sai imi-nia Maromak.’+

29 “‘Haʼu sei salva imi husi imi-nia hahalok foʼer hotu. Haʼu sei haruka fini atu fó fuan barak, no haʼu sei la lori rai-hamlaha ba imi.+ 30 Haʼu sei halo ai-hun sira fó fuan barak no toʼos sira fó ai-han barak, atu nuneʼe imi nunka sente moe tan tanba rai-hamlaha iha nasaun sira-nia leet.+ 31 Tuirmai imi sei hanoin-hetan imi-nia hahalok aat sira no imi-nia hahalok neʼebé la diʼak, no imi sei hakribi imi-nia an tanba imi-nia sala no tanba imi-nia hahalok neʼebé aat.+ 32 Maibé hatene bá katak haʼu halo ida-neʼe laʼós tanba imi’,+ Jeová, Naʼi Ukun-Naʼin Boot Liu, mak dehan. ‘Oh umakain Izraél, sai moe bá no sente sala tanba imi-nia hahalok sira.’

33 “Jeová, Naʼi Ukun-Naʼin Boot Liu, dehan nuneʼe: ‘Iha loron neʼebé haʼu hamoos imi husi imi-nia sala hotu, haʼu mós sei halo imi hela fali iha sidade sira+ no harii fali fatin neʼebé rahun ona.+ 34 Rai neʼebé uluk rahun no husik mamuk hodi ema neʼebé laʼo liu bele haree, imi sei kuda fali buat oioin iha rai neʼe. 35 No ema sei dehan: “Rai neʼebé uluk rahun sai fali ona hanesan jardín Eden,+ no sidade sira neʼebé naksobu, rahun no mamuk, agora sai ona sidade neʼebé metin no ema hela fali iha laran.”+ 36 No nasaun restu neʼebé la lakon iha ó-nia sorin-sorin sei hatene duni katak haʼu, Jeová, mak harii fali buat neʼebé rahun ona, no haʼu mak kuda fali iha fatin neʼebé sai mamuk ona. Haʼu, Jeová, mak fó sai liafuan sira-neʼe, no haʼu kumpre ona ida-neʼe.’+

37 “Jeová, Naʼi Ukun-Naʼin Boot Liu, dehan nuneʼe: ‘Haʼu mós sei husik umakain Izraél husu haʼu atu aumenta sira-nia povu hanesan bibi-lubun. 38 Sidade sira neʼebé uluk rahun sei sai nakonu ho ema-lubun,+ hanesan ema-lubun neʼebé santu, hanesan Jeruzalein nia bibi-lubun* durante tempu festa nian.+ Nuneʼe sira sei hatene duni katak haʼu mak Jeová.’”