Deuteronómio

31 Tuirmai Moisés sai hodi koʼalia liafuan sira-neʼe ba ema Izraél tomak, 2 hodi dehan: “Agora haʼu tinan 120 ona.+ Haʼu labele dirije tan imi tanba Jeová hatete ona ba haʼu: ‘Ó sei la hakur Mota Jordaun neʼe.’+ 3 Jeová, imi-nia Maromak, sei hakur iha imi-nia oin, no nia rasik sei halakon nasaun sira-neʼe iha imi-nia oin, no imi sei duni sai sira.+ Josué mak sei dirije imi hodi hakur mota neʼe,+ hanesan Jeová fó sai ona. 4 Jeová sei halo ba sira hanesan nia halo ona ba ema Amoreu nia liurai sira, Sihon+ no Og,+ no ba sira-nia rai bainhira nia halakon sira.+ 5 Jeová sei entrega nasaun sira-neʼe ba imi, no imi tenke halo ba sira tuir mandamentu hotu neʼebé haʼu fó sai ona ba imi.+ 6 Sai aten-brani no sai forte bá.+ Keta taʼuk ka nakdedar iha sira-nia oin,+ tanba Jeová, imi-nia Maromak, mak laʼo hamutuk ho imi. Nia sei la hadook an no la husik imi.”+

7 Tuirmai Moisés bolu Josué no koʼalia ba nia iha povu Izraél hotu nia oin, hodi dehan: “Sai aten-brani no sai forte bá,+ tanba ó mak sei lori povu neʼe tama ba rai neʼebé Jeová jura ona ba sira-nia beiʼala atu fó ba sira, no ó sei entrega rai neʼe ba sira nuʼudar liman-rohan.+ 8 Jeová mak laʼo iha ó-nia oin, no nia sei kontinua hamutuk ho ó.+ Nia sei la hadook an no la husik ó. Labele sai taʼuk ka nakdedar.”+

9 Depois neʼe, Moisés hakerek Ukun-Fuan+ neʼe no fó ba amlulik sira, katak ema Levi sira, neʼebé lori Jeová nia Arka Aliansa nian, no nia mós fó ba Izraél nia katuas hotu. 10 Moisés fó mandamentu ba sira, hodi dehan: “Kada tinan hitu nia rohan, iha tempu neʼebé deside tiha ona iha tinan livre nian,+ durante Festa Barraka nian,*+ 11 bainhira ema Izraél hotu hamriik iha Jeová,+ imi-nia Maromak, nia oin iha fatin neʼebé nia sei hili, imi tenke lee Ukun-Fuan neʼe ba ema Izraél tomak atu sira bele rona.+ 12 Halibur hamutuk povu,+ mane, feto, labarik no ema estranjeiru sira neʼebé hela iha imi-nia sidade sira,* atu nuneʼe sira bele rona no aprende hodi hamtaʼuk Jeová, imi-nia Maromak, no halo tuir ho didiʼak liafuan hotu husi Ukun-Fuan neʼe. 13 Nuneʼe sira-nia oan sira neʼebé seidauk hatene Ukun-Fuan neʼe sei rona+ no aprende hodi hamtaʼuk Jeová, imi-nia Maromak, durante imi moris iha rai neʼebé imi sei hakur Mota Jordaun atu foti nuʼudar imi-nian.”+

14 Tuirmai Jeová dehan ba Moisés: “Haree bá! Tempu besik ona ba ó atu mate.+ Entaun bolu Josué, no imi naʼin-rua laʼo ba* tenda reuniaun nian, atu nuneʼe haʼu bele fó knaar ba nia.”+ Nuneʼe Moisés no Josué laʼo ba tenda reuniaun nian. 15 Tuirmai Jeová mosu iha tenda neʼe iha kalohan* laran, no kalohan neʼe para besik odamatan tenda nian.+

16 No Jeová dehan ba Moisés: “Haree bá! Ó besik ona atu mate,* no povu neʼe sei komesa atu la hatudu laran-metin ba haʼu hodi adora* maromak falsu* neʼebé haleʼu sira iha rai neʼebé sira sei tama bá.+ Sira sei husik haʼu+ no kontra haʼu-nia aliansa neʼebé haʼu halo ona ho sira.+ 17 Iha tempu neʼebá haʼu sei sai hirus tebes hasoru sira,+ no haʼu sei husik sira+ no subar haʼu-nia oin husi sira+ toʼo sira lakon mohu tiha. Tuirmai susar no terus barak sei kona sira,+ no sira sei dehan: ‘Ita hetan susar sira-neʼe tanba ita-nia Maromak la iha tan iha ita-nia leet, loos ka lae?’+ 18 Maibé haʼu sei kontinua subar haʼu-nia oin iha loron neʼe tanba hahalok aat hotu neʼebé sira halo hodi adora maromak sira seluk.+

19 “Agora imi hakerek knananuk neʼe+ no hanorin ba ema Izraél.+ Haruka sira aprende knananuk neʼe,* hodi ida-neʼe bele fó-hanoin ba povu Izraél kona-ba haʼu-nia avizu sira.+ 20 Bainhira haʼu lori sira tama ba rai neʼebé haʼu jura ona ba sira-nia beiʼala,+ katak rai neʼebé iha susubeen no bani-been barak,+ no sira han bosu tiha no moris diʼak ona,*+ sira sei komesa atu adora maromak sira seluk no serbí sira no la hatudu tan respeitu ba haʼu no kontra haʼu-nia aliansa.+ 21 Bainhira susar no terus barak kona sira,+ knananuk neʼe sei fó-hanoin ba sira kona-ba haʼu-nia avizu sira (tanba sira-nia bei-oan sira labele haluha ida-neʼe), tanba haʼu hatene ona sira-nia hakarak neʼebé sira haburas+ antes haʼu lori sira tama ba rai neʼebé haʼu jura ona ba sira.”

22 Entaun iha loron neʼe Moisés hakerek no hanorin knananuk neʼe ba ema Izraél.

23 Tuirmai Maromak fó knaar ba Nun nia oan-mane Josué,+ no dehan: “Sai aten-brani no sai forte bá,+ tanba ó mak sei lori ema Izraél tama ba rai neʼebé haʼu jura ona ba sira,+ no haʼu sei kontinua hamutuk ho ó.”

24 Bainhira Moisés hakerek ona liafuan hotu husi Ukun-Fuan neʼe iha livru ida,+ 25 Moisés fó mandamentu ba ema Levi sira neʼebé lori Jeová nia Arka Aliansa nian, hodi dehan: 26 “Lori livru Ukun-Fuan+ neʼe no tau iha Jeová, imi-nia Maromak, nia Arka+ Aliansa sorin, no neʼe sei sai nuʼudar Maromak nia sasin hasoru imi. 27 Tanba haʼu rasik hatene didiʼak imi-nia hahalok kontra+ no imi-nia ulun-toos.*+ Durante haʼu sei moris hela hamutuk ho imi, imi kontra ona hasoru Jeová, sá tan bainhira haʼu mate, imi sei kontra barak liután! 28 Halibur hamutuk katuas suku nian no ulun-naʼin sira iha haʼu-nia oin, no haʼu sei koʼalia liafuan sira-neʼe atu sira bele rona, no haʼu sei halo lalehan no rai sai nuʼudar sasin hasoru sira.+ 29 Tanba haʼu hatene didiʼak katak bainhira haʼu mate tiha, imi sei halo duni hahalok aat+ no sees husi dalan neʼebé haʼu fó sai ba imi. No susar sei kona duni imi+ iha futuru, tanba imi sei halo buat neʼebé aat tuir Jeová nia haree no imi sei hakanek nia laran ho buat neʼebé imi halo ho imi-nia liman.”

30 Tuirmai bainhira kongregasaun Izraél rona hela, Moisés komesa hatoʼo fali liafuan husi knananuk neʼe husi primeiru toʼo rohan:+