Salmo
Knananuk ba loron Sábadu.
92 Oh Jeová, diʼak duni atu fó agradese ba Ita+
No atu kanta knananuk hahiʼi nian* ba Ita-nia naran, oh Maromak neʼebé Aas Liu Hotu,
2 Atu fó sai Ita-nia domin neʼebé laran-metin+ iha dadeer
No Ita-nia laran-metin durante kalan,
3 Hodi akompaña ho instrumentu neʼebé iha talin sanulu,
No ho lian furak husi arpa.+
4 Oh Jeová, Ita halo haʼu haksolok tanba Ita-nia hahalok sira;
Haʼu haklalak ho haksolok tanba serbisu neʼebé Ita halo ho Ita-nia liman rasik.
5 Oh Jeová, buat sira neʼebé Ita halo ona mak kmanek tebes!+
Ita-nia hanoin mak kleʼan tebes!+
6 Ema neʼebé la iha neon labele hatene buat sira-neʼe;
No ema beik labele komprende buat tuirmai neʼe:+
7 Bainhira ema aat sira sai buras hanesan duʼut
No ema hotu neʼebé halo sala sai barak,
Neʼe akontese atu sira lakon ba nafatin.+
8 Maibé, oh Jeová, Ita mak aas liu buat seluk hotu ba nafatin.
9 Oh Jeová, hateke ba Ita-nia inimigu sira neʼebé Ita manán,
Haree oinsá mak Ita-nia inimigu sira sei lakon;
Ema hotu neʼebé halo sala sei namkari tiha.+
10 Maibé Ita sei aumenta haʼu-nia kbiit* hanesan kbiit husi karau-aman fuik;
Haʼu sei kose mina fresku ba haʼu-nia isin.+
11 Haʼu-nia matan sei hateke ba haʼu-nia inimigu sira neʼebé Ita manán;+
Haʼu-nia tilun sei rona kona-ba oinsá ema aat sira neʼebé ataka haʼu sei monu.
12 Maibé ema laran-loos sira sei sai buras hanesan ai-palmeira
No sai boot hanesan ai-sedru iha Líbanu.+
13 Sira hanesan ai neʼebé kuda iha Jeová nia uma;
Sira sai buras iha ita-nia Maromak nia pátiu.+
14 Maski sira fuuk mutin ona,* sira sei kontinua buras;+
Sira nafatin forte no fresku,+
15 Hodi fó sai katak Jeová mak laran-loos.
Nia mak haʼu-nia Fatuk Boot,+ no nia nunka hatudu hahalok la loos.