Miqueias
6 Oh imi povu sira, favór ida, rona ba buat neʼebé Jeová hatete.
Hamriik bá, fó sai imi-nia kazu iha foho sira-nia oin,
No husik foho-oan sira rona imi-nia lian.+
2 Oh imi foho sira,
Oh imi rai nia hun sira neʼebé metin,+ rona ba Jeová nia kazu,
Tanba Jeová iha kazu ida ho ninia povu;
Nia sei foti kazu kontra Izraél,+ hodi dehan:
3 “Haʼu-nia povu, haʼu halo sala saida ba imi?
Iha dalan saida mak haʼu halo imi sai kole?+
Fó sasin hasoru haʼu.
4 Tanba uluk haʼu lori imi sai husi rai-Ejitu,+
Haʼu sosa fali imi husi uma atan nian.+
Haʼu haruka Moisés, Arão no Miriam ba imi.+
5 Haʼu-nia povu, favór ida, hanoin-hetan Liurai Balak husi Moab nia planu,+
No buat neʼebé Beor nia oan-mane Balám hatán ba nia.+
Hanoin-hetan buat neʼebé akontese husi Sitim+ toʼo Gilgal,+
Atu nuneʼe imi bele hatene Jeová nia hahalok loos sira.”
6 Haʼu sei lori saida bainhira haʼu bá iha Jeová nia oin?
Haʼu sei lori saida bainhira haʼu bá hodi hakruʼuk ba Maromak neʼebé hela iha fatin aas?
Haʼu sei bá iha ninia oin hodi lori sakrifísiu sunu nian neʼebé hasaʼe tomak ka?
Haʼu sei lori karau-oan sira neʼebé tinan ida ka?+
7 Jeová sei kontente ho bibi-malae aman rihun ba rihun ka lae?
Haʼu sei entrega haʼu-nia oan-mane primeiru atu taka haʼu-nia hahalok kontra ka?
Haʼu sei hasaʼe haʼu-nia oan rasik nuʼudar sakrifísiu atu taka haʼu-nia sala ka?+
8 Oh ema sira, nia fó-hatene ona ba imi buat neʼebé diʼak.
Saida mak Jeová husu* ba imi atu halo?
9 Jeová koʼalia ba sidade neʼe.
Sira neʼebé matenek sei hamtaʼuk Ita-nia naran.
See tilun didiʼak ba naʼi neʼebé kaer rota kastigu iha ninia liman.+
10 Ema aat nia uma sei iha rikusoin neʼebé nia hetan husi hahalok aat ka lae?
No sei iha fatin sukat nian* neʼebé la loos, neʼebé Maromak hakribi ka lae?
11 Se haʼu uza dasin neʼebé la loos,
Ka uza dasin-fuan hodi hamatak ema,+ haʼu bele moos* nafatin ka lae?
12 Tanba ema riku iha sidade neʼe sempre halo violénsia,
No ninia povu koʼalia lia-bosok.+
Sira-nia nanál mak nakonu ho lohi.+
13 “Tan neʼe, haʼu sei baku ó hodi hakanek ó,+
No halo ó sai mamuk tanba ó-nia sala sira.
14 Ó sei han maibé la sai bosu.
Ó-nia kabun sei mamuk.+
Ó sei foti sasán sira atu rai didiʼak, maibé ó labele rai hela ida-neʼe.
No buat neʼebé ó lori, haʼu sei entrega ba surik.
15 Ó sei kuda fini, maibé ó sei la koʼa.
Ó sei sama oliveira-fuan, maibé ó sei la uza ninia mina.
Ó sei halo tua-uvas foun, maibé ó sei la hemu tua-uvas.+
16 Ó halo tuir Onri nia ukun-fuan sira no umakain Acab nia hahalok sira,+
No ó laʼo tuir sira-nia konsellu.