Ezequiel

47 Tuirmai nia lori haʼu fila ba fatin atu tama templu,+ no iha neʼebá haʼu haree bee suli sai husi rai okos iha área atu tama ba templu+ hodi suli ba parte leste, tanba templu nia oin hateke ba parte leste. Bee neʼe suli tun husi templu nia sorin loos, liuhusi altár nia parte súl.

2 Tuirmai nia lori haʼu sai ba liʼur liuhusi portaun parte norte nian+ no bá pátiu boot nia portaun neʼebé hateke ba parte leste,+ no haʼu haree bee uitoan suli husi sorin loos.

3 Bainhira mane neʼe sai ba parte leste no kaer hela tali sukat nian iha ninia liman,+ nia komesa sukat husi portaun neʼe toʼo kóvado* 1.000. Nia haruka haʼu hakur liu no bee neʼe toʼo deʼit ain-fukun.

4 Tuirmai nia sukat tan kóvado 1.000, no nia haruka haʼu hakur liu no bee neʼe toʼo ain-tuur.

Nia sukat tan kóvado 1.000, no nia haruka haʼu hakur liu no bee neʼe toʼo knotak.

5 Bainhira nia sukat tan kóvado 1.000, bee neʼe sai ona mota boot no haʼu labele laʼo liu. Tanba mota neʼe kleʼan, entaun ema labele hakur, no ema bele liu hodi nani deʼit.

6 Nia husu haʼu: “Oan-mane husi ema, ó haree ona ida-neʼe ka?”

Tuirmai nia haruka haʼu laʼo no fila fali ba mota ninin. 7 Bainhira haʼu fila fali, haʼu haree katak iha mota ninin iha ai-hun barak tebes iha sorin-sorin.+ 8 Tuirmai nia dehan ba haʼu: “Bee neʼe suli ba parte leste no kontinua suli tun liuhusi área Araba*+ no suli tama ba tasi.* Bainhira bee neʼe tama ba tasi,+ bee iha tasi neʼe sei sai diʼak. 9 Kriatura moris* sira bele moris iha fatin naran deʼit neʼebé bee* neʼe suli bá. Iha neʼebá sei iha ikan barak, tanba bee neʼe sei suli bá neʼebá. Bee iha tasi sei sai diʼak, no buat hotu sei moris iha fatin naran deʼit neʼebé mota neʼe suli bá.

10 “Peskadór sira sei hamriik besik tasi ninin husi En-Gedi+ toʼo En-Eglaim, iha neʼebá sei iha fatin atu habai rede. No sei iha ikan oioin neʼebé barak tebes, hanesan ikan sira iha Tasi Boot.*+

11 “Tasi neʼe sei iha bee-lihun no debu sira neʼebé sei la sai diʼak. Fatin sira-neʼe sei iha nafatin masin.+

12 “Ai-hun oioin neʼebé iha fuan atu han sei moris iha mota ninin nia sorin-sorin. Ai-hun sira-neʼe nia tahan sei la sai namlaek, no sira sei la para atu fó fuan. Fulan-fulan sira sei fó fuan foun, tanba bee neʼebé suli ba sira mak husi fatin santu.+ Ai-hun sira-neʼe nia fuan sira sai nuʼudar ai-han no tahan sira sei kura moras.”+

13 Jeová, Naʼi Ukun-Naʼin Boot Liu, dehan nuneʼe: “Imi sei fahe rai neʼe ba Izraél nia suku 12 nuʼudar liman-rohan, no José sei simu rai rua nuʼudar liman-rohan.+ 14 Imi sei simu rai neʼe nuʼudar liman-rohan no hetan rai neʼe ho medida hanesan deʼit.* Haʼu jura ona atu fó rai neʼe ba imi-nia beiʼala sira,+ no agora haʼu fahe neʼe ba* imi nuʼudar liman-rohan.

15 “Tuirmai neʼe mak fronteira ba rai neʼe iha parte norte: Fronteira neʼe hahú husi Tasi Boot no liu dalan Hetlon+ toʼo Zedad,+ 16 Hamat,+ Berota+ no Sibraim, neʼebé entre área Damasku nian no área Hamat nian toʼo Hazer-Hatikon, neʼebé besik Hauran nia fronteira.+ 17 Entaun fronteira neʼe sei komesa husi tasi toʼo Hazar-Enon,+ liuhusi Damasku nia fronteira iha parte norte, no mós liuhusi Hamat nia fronteira.+ Neʼe mak fronteira iha parte norte.

18 “Fronteira parte leste mak entre Hauran no Damasku no liuhusi Mota Jordaun entre Gilead+ no rai-Izraél. Imi tenke sukat husi fronteira neʼe toʼo tasi parte leste.* Neʼe mak fronteira iha parte leste.

19 “Fronteira parte súl sei hahú husi Tamar toʼo bee Meribat-Kades nian,+ tuirmai liu Uádi* Ejitu no toʼo Tasi Boot.+ Neʼe mak fronteira iha parte súl.

20 “Fronteira parte oeste mak Tasi Boot, husi fronteira neʼe saʼe toʼo fatin ida neʼebé iha Lebo-Hamat*+ nia oin. Neʼe mak fronteira iha parte oeste.”

21 “Imi tenke fahe rai neʼe ba malu, ba Izraél nia suku 12. 22 Imi tenke fahe rai ba malu nuʼudar liman-rohan no fahe ba ema estranjeiru sira neʼebé hela ho imi, neʼebé iha oan durante sira hela iha imi-nia leet. Imi tenke haree sira hanesan ema Izraél neʼebé moris iha rai-Izraél. Sira sei simu liman-rohan iha Izraél nia suku sira-nia leet hamutuk ho imi. 23 Imi tenke fó rai nuʼudar liman-rohan ba ema estranjeiru iha área husi suku ida neʼebé nia hela bá”, Jeová, Naʼi Ukun-Naʼin Boot Liu, mak dehan.