Ezequiel

34 Jeová koʼalia tan mai haʼu, hodi dehan: 2 “Oan-mane husi ema, fó sai profesia bá hodi kontra Izraél nia bibi-atan sira. Fó sai profesia no dehan ba bibi-atan sira: ‘Jeová, Naʼi Ukun-Naʼin Boot Liu, dehan nuneʼe: “Susar ba Izraél nia bibi-atan sira+ neʼebé buka deʼit hahán ba sira-nia an rasik! Tuir loloos, sira tenke fó-han ba bibi-lubun, loos ka lae?+ 3 Imi han naʼan bokur, no imi uza hena neʼebé halo husi bibi-malae fulun, no imi oho animál neʼebé bokur liu,+ maibé imi la fó-han ba bibi-lubun.+ 4 Imi la fó kmaan ba bibi neʼebé fraku, la kura bibi neʼebé moras, la falun bibi neʼebé kanek, la lori fali bibi neʼebé laʼo sala dalan, no la buka bibi neʼebé lakon.+ Maibé imi ukun sira ho makaʼas no laran-aat.+ 5 Entaun sira laʼo namkari tanba la iha bibi-atan.+ Sira laʼo namkari no sai nuʼudar ai-han ba animál fuik sira iha rai-luan. 6 Haʼu-nia bibi-malae sira laʼo-lemo iha foho no foho-oan hotu. Haʼu-nia bibi sira laʼo namkari iha mundu tomak, la iha ema ida mak buka sira hodi hetan fali sira.

7 “‘“Tan neʼe imi bibi-atan sira, rona ba Jeová nia liafuan: 8 ‘Jeová, Naʼi Ukun-Naʼin Boot Liu, dehan: “Haʼu jura hodi haʼu-nia moris rasik katak haʼu-nia bibi-malae sira sai ona vítima, sai ona ai-han ba animál fuik iha rai-luan, tanba la iha bibi-atan, no haʼu-nia bibi-atan sira la buka tuir haʼu-nia bibi, maibé sira kontinua buka hahán ba sira-nia an rasik no la fó-han ba haʼu-nia bibi”’, 9 tan neʼe imi bibi-atan sira, rona ba Jeová nia liafuan. 10 Jeová, Naʼi Ukun-Naʼin Boot Liu, dehan nuneʼe: ‘Haʼu sei kontra bibi-atan sira, no haʼu sei husu sira atu hatán ba buat neʼebé sira halo ba haʼu-nia bibi-malae.* Haʼu sei hasai tiha sira-nia knaar atu fó-han* ba haʼu-nia bibi,+ no bibi-atan sira-neʼe sei la buka tan hahán ba sira-nia an rasik. Haʼu sei salva haʼu-nia bibi husi sira-nia ibun, no sira sei la han tan haʼu-nia bibi.’”

11 “‘Jeová, Naʼi Ukun-Naʼin Boot Liu, dehan nuneʼe: “Haʼu mak neʼe, haʼu rasik sei buka haʼu-nia bibi-malae sira, no haʼu sei tau matan ba sira.+ 12 Haʼu sei tau matan ba haʼu-nia bibi hanesan bibi-atan neʼebé foin hetan ninia bibi sira neʼebé laʼo namkari no fó hela hahán ba sira.+ Haʼu-nia bibi laʼo namkari iha tempu neʼebé iha kalohan metan no nakukun.+ Haʼu sei salva haʼu-nia bibi husi fatin hotu neʼebé sira namkari bá. 13 Haʼu sei lori sira sai husi povu seluk nia leet no halibur sira hamutuk husi rai oioin no lori sira ba sira-nia rai no fó-han sira iha Izraél nia foho leten,+ besik mota no ema nia hela-fatin hotu iha rai neʼe. 14 Haʼu sei fó-han sira iha rai neʼebé iha duʼut barak, no sira sei han duʼut iha Izraél nia foho sira neʼebé aas.+ Sira sei toba iha rai neʼebé matak no kapás,+ no sira sei han duʼut neʼebé diʼak liu iha Izraél nia foho leten.”

15 “‘Jeová, Naʼi Ukun-Naʼin Boot Liu, dehan: “Haʼu rasik sei fó-han ba haʼu-nia bibi-malae sira,+ no haʼu sei husik sira deskansa.+ 16 Haʼu sei buka bibi neʼebé lakon,+ haʼu sei lori fila bibi neʼebé laʼo sala dalan, haʼu sei falun bibi neʼebé kanek, no haʼu sei fó kmaan ba bibi neʼebé fraku. Maibé haʼu sei halakon bibi neʼebé bokur no forte. Haʼu sei tesi-lia ba sira no fó kastigu ba sira nuʼudar sira-nia ai-han.”

17 “‘Jeová, Naʼi Ukun-Naʼin Boot Liu, dehan nuneʼe ba ninia bibi-lubun: “Lakleur tan haʼu sei tesi-lia entre bibi-malae ida ho bibi-malae seluk, entre bibi-malae aman ho bibi-timur aman.+ 18 Imi han ona duʼut matak neʼebé diʼak liu, neʼe la toʼo ba imi ka? Tanbasá mak imi mós sama tan duʼut restu ho imi-nia ain? Bainhira imi hemu tiha bee moos, imi mós tenke halo merak tiha bee neʼe ho imi-nia ain ka? 19 Haʼu-nia bibi-malae sira tenke han duʼut neʼebé imi sama ona ka? Sira tenke hemu bee neʼebé imi halo merak ona ho imi-nia ain ka?”

20 “‘Tan neʼe Jeová, Naʼi Ukun-Naʼin Boot Liu, dehan nuneʼe ba sira: “Haʼu mak neʼe, no haʼu rasik sei tesi-lia entre bibi-malae bokur ho bibi-malae krekas, 21 tanba imi kontinua dudu bibi hotu neʼebé moras ho imi-nia sorin no imi-nia kabaas, no imi kontinua tuku sira ho imi-nia dikur hodi halo sira namkari ba rai seluk. 22 Haʼu sei salva haʼu-nia bibi-malae, no sira sei la sai tan nuʼudar vítima.+ Haʼu sei tesi-lia entre bibi-malae ida ho bibi-malae seluk. 23 Haʼu sei hili bibi-atan ida ba sira,+ katak haʼu-nia atan David,+ no nia sei fó-han sira. Nia rasik sei fó-han sira no sai sira-nia bibi-atan.+ 24 Haʼu, Jeová, sei sai sira-nia Maromak,+ no haʼu-nia atan David sei sai sira-nia ulun-naʼin.+ Haʼu, Jeová, mak fó sai liafuan sira-neʼe.

25 “‘“Haʼu sei halo aliansa dame nian ho sira,+ no haʼu sei halakon tiha animál fuik neʼebé siʼak husi rai neʼe,+ atu nuneʼe sira bele hela ho seguru iha rai-fuik no toba iha ai-laran.+ 26 Haʼu sei halo sira no mós fatin neʼebé haleʼu haʼu-nia foho-oan sai nuʼudar bensaun ida,+ no haʼu sei halo udan tun tuir tempu neʼebé loos. Haʼu sei fakar tun bensaun hanesan udan.+ 27 Ai-hun sira iha toʼos sei fó fuan, no rai sei fó rezultadu,+ no sira sei moris ho hakmatek iha sira-nia rai. Bainhira haʼu halo tohar tiha sira-nia ai-leba+ no salva sira husi ema neʼebé halo sira sai atan, sira sei hatene duni katak haʼu mak Jeová. 28 Sira sei la sai vítima tan ba nasaun seluk, no animál fuik iha rai sei la tolan sira, no sira sei moris hakmatek, no la iha ema ida mak halo sira taʼuk.+

29 “‘“Haʼu sei halo ba sira toʼos ida neʼebé naran-boot, no sira sei la mate hamlaha tan iha sira-nia rai,+ no ema husi nasaun seluk sei la hamoe tan sira.+ 30 ‘Tuirmai umakain Izraél sei hatene duni katak haʼu Jeová, sira-nia Maromak, mak hamutuk ho sira no katak sira mak haʼu-nia povu’,+ Jeová, Naʼi Ukun-Naʼin Boot Liu, mak dehan.”’

31 “Jeová, Naʼi Ukun-Naʼin Boot Liu, dehan: ‘Oh haʼu-nia bibi-malae,+ bibi neʼebé haʼu tau matan, imi mak ema deʼit, no haʼu mak imi-nia Maromak.’”