Primeiru Samuel
19 Liutiha tempu balu, Saul koʼalia ba ninia oan-mane Jonatan no ba ninia atan hotu katak nia hakarak oho David.+ 2 Maibé tanba Saul nia oan-mane Jonatan gosta tebes David,+ Jonatan hatete ba David: “Haʼu-nia aman Saul hakarak atu oho ó. Favór ida, aban dadeer kuidadu ó-nia an bá, no bá subar iha fatin segredu. 3 Haʼu sei sai hodi hamriik iha haʼu-nia aman nia sorin iha fatin neʼebé ó subar bá. Haʼu sei koʼalia kona-ba ó ba haʼu-nia aman, no se haʼu rona buat ruma, haʼu sei fó-hatene duni ba ó.”+
4 Entaun Jonatan koʼalia diʼak kona-ba David+ ba ninia aman Saul. Nia hatete ba nia aman: “Liurai lalika halo sala hasoru Ita-nia atan David, tanba nia la halo sala hasoru Ita no buat neʼebé nia halo ona mak diʼak ba Ita. 5 Nia tau ninia moris iha perigu laran hodi oho mane Filístia neʼe.+ Ho ida-neʼe, Jeová halo Izraél manán boot.* Ita rasik haree ida-neʼe, no Ita kontente tebes. Entaun, tanbasá mak Ita buka atu oho David la ho razaun?+ Tanbasá mak Ita hakarak halo sala hasoru ema laran-moos?” 6 Saul rona ba Jonatan, no Saul dehan: “Haʼu jura hodi Jeová, Maromak neʼebé moris, David sei la mate.” 7 Depois neʼe, Jonatan bolu David no konta buat sira-neʼe hotu ba nia. Entaun Jonatan lori David ba Saul, no nia kontinua serbisu ba Saul hanesan uluk.+
8 Liutiha tempu balu, funu mosu fali, no David bá halo funu hasoru ema Filístia no oho sira barak, no sira halai husi ninia oin.
9 Loron ida kuandu David toka hela arpa,+ Jeová husik Saul nia hanoin rasik halo nia sai taʼuk*+ bainhira nia tuur iha ninia uma no kaer hela diman iha ninia liman. 10 Saul koko atu tuda diman ba David hodi sona rabat David ba didin, maibé David sees husi Saul, no diman neʼe belit hela iha didin. Iha kalan neʼe David halai sai. 11 Tuirmai Saul haruka ema ba David nia uma hodi hafuhu atu oho nia iha dadeer,+ maibé David nia feen Mical dehan ba nia: “Se ó la halai iha kalan neʼe, aban ó sei mate.” 12 Mical ajuda kedas David tun liuhusi janela, atu nuneʼe nia bele halai. 13 Mical foti estátua terafín* no tau iha kama leten, no nia tau hena husi bibi-timur nia fulun iha fatin neʼebé baibain David tau nia ulun, no nia taka neʼe ho roupa ida.
14 Saul haruka ema atu kaer David, maibé Mical dehan: “Nia moras.” 15 Entaun Saul haruka ema bá haree David no nia dehan ba sira: “Lori nia mai haʼu iha ninia toba-fatin hodi nuneʼe haʼu bele oho nia.”+ 16 Bainhira ema sira-neʼe tama, sira haree estátua terafín* iha kama leten no hena husi bibi-timur nia fulun mak iha fatin neʼebé baibain David tau nia ulun. 17 Saul hatete ba Mical: “Tanbasá mak ó lohi haʼu hanesan neʼe no husik haʼu-nia inimigu+ sai hodi nia bele halai?” Mical hatán ba Saul: “Tanba nia hatete ba haʼu: ‘Se ó la husik haʼu sai, haʼu sei oho ó!’”
18 Bainhira David halai tiha, nia bá Samuel iha Ramá.+ Nia konta ba Samuel kona-ba buat hotu neʼebé Saul halo ba nia. Tuirmai nia ho Samuel sai no sira hela iha Naiot.+ 19 Liutiha tempu balu, ema fó-hatene Saul, hodi dehan: “David hela iha Naiot iha Ramá.” 20 Entaun Saul haruka kedas ema atu bá kaer David. Bainhira ema sira-neʼe haree Maromak nia espíritu book profeta sira neʼebé katuas ona atu fó sai profesia no mós Samuel hamriik hodi dirije sira, Maromak nia espíritu tun ba ema sira neʼebé Saul haruka, no sira mós komesa hatudu hahalok hanesan profeta.
21 Bainhira sira konta neʼe ba Saul, nia haruka kedas ema seluk bá neʼebá, no sira mós komesa hatudu hahalok hanesan profeta. Entaun Saul haruka tan ema seluk, katak grupu terseiru, no sira mós komesa hatudu hahalok hanesan profeta. 22 Ikusmai Saul mós bá Ramá. Bainhira nia toʼo ba tanke* boot neʼebé iha Seku, nia husu: “Samuel ho David iha neʼebé?” Sira hatán: “Iha Naiot+ iha Ramá.” 23 Bainhira Saul laʼo daudaun atu bá Naiot iha Ramá, Maromak nia espíritu tun mós ba nia, no iha dalan nia hatudu hahalok hanesan profeta toʼo nia tama Naiot iha Ramá. 24 Nia mós hasai ninia roupa, no hatudu hahalok hanesan profeta iha Samuel nia oin, no nia latan ho isin-tanan* loron tomak no kalan tomak. Tan neʼe mak ema dehan: “Saul mós profeta ida ka?”+