Ezequiel

13 Jeová koʼalia tan mai haʼu, hodi dehan: 2 “Oan-mane husi ema, fó sai profesia hodi kontra profeta sira iha rai-Izraél,+ no koʼalia ba profeta sira neʼebé inventa sira-nia profesia rasik:*+ ‘Rona Jeová nia liafuan bá. 3 Jeová, Naʼi Ukun-Naʼin Boot Liu, dehan nuneʼe: “Susar ba profeta beik sira neʼebé koʼalia tuir deʼit sira-nia hanoin,* maibé sira la haree vizaun ida!+ 4 Oh ema Izraél, imi-nia profeta sira sai ona hanesan asu-rapoza* iha fatin neʼebé rahun. 5 Imi sei la bá atu hadiʼa umakain Izraél nia moru fatuk nian neʼebé rahun ona,+ atu bele proteje Izraél iha Jeová nia loron funu nian.”+ 6 “Sira haree ona vizaun neʼebé la loos no fó sai lia-bosok, hodi dehan: ‘Jeová nia liafuan mak neʼe’, maski Jeová rasik la haruka sira, no sira hein katak sira-nia liafuan sei sai loos.+ 7 Imi haree ona vizaun neʼebé la loos no fó sai lia-bosok kona-ba futuru bainhira imi dehan: ‘Jeová nia liafuan mak neʼe’, maibé haʼu la fó sai buat ida ba imi.”’

8 “‘Tan neʼe, Jeová, Naʼi Ukun-Naʼin Boot Liu, dehan nuneʼe: “‘Haʼu sei kontra imi tanba imi fó sai ona lia-bosok no haree ona vizaun neʼebé la loos’, Jeová, Naʼi Ukun-Naʼin Boot Liu, dehan.”+ 9 Haʼu-nia liman sei kontra profeta sira neʼebé haree vizaun la loos no fó sai lia-bosok.+ Sira sei la sai tan parte ba povu neʼebé haʼu hadomi;* no sira-nia naran sei la hakerek tan iha lista hamutuk ho umakain Izraél, no mós sira sei la fila fali ba rai-Izraél. Nuneʼe imi sei hatene duni katak haʼu mak Jeová, Naʼi Ukun-Naʼin Boot Liu.+ 10 Buat hotu neʼe akontese tanba sira lori haʼu-nia povu laʼo sala dalan, hodi dehan: “Iha dame!” maski tuir loloos la iha dame.+ No kuandu ema harii didin neʼebé la metin, sira pinta mutin ida-neʼe.’*+

11 “Fó-hatene ba sira neʼebé pinta mutin didin katak didin neʼe sei monu. Udan boot sei tun, udan jelu-fatuk mós sei tun, no anin-fuik sei harahun didin neʼe.+ 12 Bainhira didin monu, ema sei husu imi: ‘Imi pinta mutin didin, neʼe lori benefísiu saida?’+

13 “Tan neʼe Jeová, Naʼi Ukun-Naʼin Boot Liu, dehan nuneʼe: ‘Ho haʼu-nia hirus haʼu sei hamosu anin-fuik, ho laran-nakali haʼu hamosu udan boot, no ho hirus makaʼas haʼu hamosu udan jelu-fatuk. 14 Haʼu sei harahun didin neʼebé imi pinta mutin ona no halo neʼe rahun toʼo rai, no hela deʼit didin hun. Bainhira sidade neʼe monu, imi sei mate iha sidade laran, nuneʼe imi sei hatene duni katak haʼu mak Jeová.’

15 “‘Bainhira haʼu hasai hotu haʼu-nia hirus ba didin neʼe no ba sira neʼebé pinta mutin didin neʼe, haʼu sei dehan ba imi: “Didin neʼe la iha tan, no sira neʼebé pinta mutin didin la iha tan.+ 16 Izraél nia profeta sira la iha tan. Sira fó sai profesia kona-ba Jeruzalein no haree vizaun kona-ba dame iha sidade neʼe, maibé dame la iha”’,+ Jeová, Naʼi Ukun-Naʼin Boot Liu mak dehan.

17 “Oh oan-mane husi ema, fila oin hodi hateke ba povu nia oan-feto sira neʼebé fó sai profesia hodi inventa sira-nia liafuan rasik, no fó sai profesia hodi kontra sira. 18 Koʼalia ba sira: ‘Jeová, Naʼi Ukun-Naʼin Boot Liu, dehan nuneʼe: “Susar ba feto sira neʼebé suku fita* atu ema kesi iha sira-nia liman no halo veu ho medida oioin atu ema taka sira-nia ulun hodi lasu ema seluk! Imi kasa haʼu-nia povu nia moris no imi hanoin katak imi bele salva imi-nia moris ka? 19 Imi hamoe haʼu iha haʼu-nia povu nia leet tan deʼit sevada uitoan no paun-rahun.+ Imi oho ema* neʼebé la merese mate no husik moris ema* neʼebé la merese atu moris, imi halo neʼe hodi bosok haʼu-nia povu neʼebé rona imi-nia lia-bosok.”’+

20 “Tan neʼe, Jeová, Naʼi Ukun-Naʼin Boot Liu, dehan nuneʼe: ‘Oh feto sira, haʼu sei kontra imi-nia fita sira neʼebé imi uza atu kasa povu hanesan sira mak manu, no haʼu sei dada kotu tiha fita husi imi-nia liman no halo livre ema neʼebé imi kasa hanesan manu. 21 Haʼu sei lees veu sira husi imi-nia ulun no salva haʼu-nia povu husi imi-nia liman. Sira sei la sai tan buat neʼebé imi koko atu lasu, nuneʼe imi sei hatene duni katak haʼu mak Jeová.+ 22 Imi halo ema laran-loos sai triste tanba imi-nia lia-bosok+ maski haʼu lakohi halo sira neon-susar,* no imi fó kbiit ba ema aat,+ atu nuneʼe sira labele hasees an husi sira-nia sala hodi bele kontinua moris.+ 23 Tan neʼe, imi feto sira sei la haree tan vizaun neʼebé la loos no la siʼik tan futuru.+ Haʼu sei salva haʼu-nia povu husi imi-nia liman, nuneʼe imi sei hatene duni katak haʼu mak Jeová.’”